حكايات لاعيبة ما بعد الاعتزال الرياضي ما بين مشاريع.. وسوشيال ميديا
في عالم الرياضة كلمة “أسطورة” مش سهلة تتقال على أي حد دي بتتقال على ناس وصلت لأعلى مستوى ممكن وكسرت أرقام وسيطرت على لعبتها سنين طويلة بس دايمًا السؤال اللي بييجي بعد كده طب إيه اللي بيحصل بعد الاعتزال؟ النجوم دي بتختفي؟ ولا بتبدأ حياة جديدة بشكل مختلف؟.. وخلينا ناخد جولة سريعة في أكتر من لعبة بعيد عن كرة القدم ونشوف أساطير كانوا في القمة ودلوقتي بقوا فين.
بداية جديدة بره الملاعب
في السباحة محدش يقدر يختلف على عظمة “مايكل فيلبس”.. الراجل ده فرض نفسه كأعظم سبّاح في التاريخ بـ23 ميدالية ذهبية أولمبية رقم خيالي.. بعد ما اعتزل فيلبس مبقاش بعيد عن الرياضة لكنه غيّر طريقه بقى بيتكلم كتير عن الصحة النفسية خصوصًا بعد ما اعترف إنه مرّ بفترات اكتئاب صعبة بعد الأولمبياد كمان بيشتغل كمحلل في البطولات وبيشارك في حملات لتعليم الأطفال السباحة يعني من بطل جوه المية بقى مؤثر مهم بره المية.
نروح لكرة السلة مع الأسطورة مايكل جوردن الاسم اللي غير شكل اللعبة كلها وحقق 6 بطولات NBA.. دلوقتي جوردن بقى رجل أعمال تقيل جدًا عنده استثمارات ضخمة وكان مالك لنادي شارلوت هورنتس الأمريكي وكمان علامة “جوردن” مع شركة Nike بقت من أنجح البراندات الرياضية في العالم.. ثروته بالمليارات وده مثال واضح إن النجاح الرياضي ممكن يتحول لنجاح اقتصادي كبير.
وفي التنس سيرينا ويليامز واحدة من أعظم لاعبات التنس في التاريخ بـ23 لقب جراند سلام بعد الاعتزال سيرينا دخلت عالم البيزنس بقوة وبقى عندها شركة استثمار بتركز على دعم المشاريع الصغيرة خصوصًا اللي بتقودها سيدات كمان بقت أيقونة في عالم الموضة وبتستخدم شهرتها في دعم قضايا اجتماعية مهمة.
بداية بشكل تاني
في ألعاب القوى مستحيل ننسى يوسين بولت أسرع إنسان في التاريخ بعد الاعتزال بولت حاول يخش عالم كرة القدم شوية لكن التجربة ماكملتش لما ادرب فترة مع بوروسيا دورتموند الألماني بعدها ركز على البيزنس وفتح مشاريع خاصة وبيظهر في إعلانات عالمية ولسه محتفظ بشخصيته المرحة اللي خلت الناس تحبه.
وفي الملاكمة فلويد مايويذر واحد من أعظم الملاكمين واعتزل من غير هزيمة تقريبًا.. مايويذر بعد الاعتزال فضل في الصورة من خلال نزالات استعراضية بتجيب له ملايين وكمان عنده شركاته الخاصة وبيعيش حياة فخمة جدًا ودايمًا بيشاركها مع جمهوره.
نروح للجولف معتايجر وودز اللي يعتبر من أعظم لاعبي الجولف رغم الإصابات وودز لسه بيشارك في بطولات على فترات وكمان بقى ليه دور في تصميم ملاعب الجولف وبيساهم في تطوير اللعبة بشكل عام.
وفي الجمباز سيمون بايلز واحدة من أعظم لاعبات الجمباز.. بايلز خدت خطوة مهمة لما قررت تهتم بصحتها النفسية وبقت صوت مهم جدًا في الدفاع عن حقوق اللاعبين وده خلاها رمز مش بس رياضي لكن إنساني كمان.
في النهاية اللي بنشوفه إن الأسطورة مش لازم تختفي بعد الاعتزال بالعكس في ناس كتير بتعرف تبدأ حياة جديدة وتنجح في مجالات تانية زي البيزنس أو الإعلام أو حتى العمل الإنساني.. المجد الرياضي ممكن يكون البداية مش النهاية واللي بيفرق فعلًا هو إنت هتعمل إيه بعد ما الأضواء تروح.
