إيه حكاية رسايل أمازون؟.. وإزاي تقدر تمنع الرسايل دي إنها توصلك!

أغلب مستخدمين أيفون الفترة اللي فاتت اتبعتلهم رسائل Sms بتقول “مرحبًا ، أنا مدير توظيف في أمازون ونبحث حاليًا عن 80 موظفًا عبر الإنترنت بدوام جزئي.  بالعمل من المنزل باستخدام الهاتف المحمول ، يمكنك بسهولة كسب 1000 إلى 3000 جنيه مصري في اليوم ، ويتم دفع الراتب في نفس اليوم.  مهام العمل بسيطة ويمكن القيام بها في أي وقت وفي أي مكان.  يرجى الاتصال بنا عبر Telegram: @ amazonmr525 أو الضغط على الرابط لإضافة Telegram والاتصال بنا https://t.me/amazonmr525

(ملاحظة: يجب ألا يقل عمر المتقدمين عن 20 عامًا ، ولا يمكن للطلاب المشاركة)”

من أكتر الحاجات الغريبة في الرسالة دي هي إنه مش طبيعي الشركات الكبيرة كده تبعت رسايل بشكل عشوائى عشان الناس تقدم على وظايف عندهم، وعادة الإعلانات دي بتكون على موقع الشركة نفسها، عشان كده ناس كتير فهموا على طول أول ما جاتلهم الرسالة إن أكيد الموضوع ده فيه حاجة مخيفة ومافتحوش اللينك اللي فيها وخافوا على موبايلاتهم.

الرسالة دي دايما بتبقى مبعوته من ايميل iCloud عشان كده الناس على السوشيال ميديا ربطوا إن مالهاش علاقة بأرقام التليفونات وإن القصة كلها معتمدة على شبكة الآي كلاود بتاعت أبل و system الـ iMessage اللي بيعتمد على إنه بيسمح لأي شخص عنده اكونت على iCloud إنه يشغل ميزة إرسال رسائل الـ iMessage ويبعت لأي حد آيفون أو ماك براحته.

وكان فيه مقال على موقع “wired” من أغسطس 2014 عن إن ممكن أي حد يقدر يبعت عدد الرسايل اللي عايزها لعدد كبير من الناس حتى من غير ما يعرفهم وده بس عن طريق كود مكون من  4 سطور.. وعن طريق الخطوات دي أي حد يقدر يستهدف دولة معينة برسايل معينة.

القصة دي حصلت في فيتنام السنة اللي فاتت وكانت عن طريق رسائل آي كلاود برضه واتكررت في الفلبين في ديسمبر اللي فات ولكن كانت SMS عادية لاي حد مش شرط نوع الموبايل، وحصلت برضه في أول 2021 في الهند بنفس عرض الشغل ولكن مع اختلاف التفاصيل.

وبعد ما دورنا لقينا بعض الناس كاتبين شوية نصايح يعملوا إيه عشان ماتجيلهمش الرسايل اللي على iMessage ومايجيلهمش نوتفكيشن من رسائل iMessage من أي أرقام غريبة أصلا .. الخطوات هي:

1- افتح الإعدادات Settings واختار Messages

2- تعالى عند Message filtering ودوس على Unkown & Spam 

3- شغل Filter Unknown Senders

4- كده أي رسائل تجيلك من أرقام غريبة هتبقى في “تبويب” لوحدها مخصوص Unknown Senders a

وبالخطوات دي كمان أي حد يبعتلك رسالة وهو اسمه مش متسجل عندك في “الكونتاكتس” مش هتعرف تدوس على لينكات يبعتهالك الا لما تسجل اسمه أو ترد على الرسالة اللي باعتها.

Related Articles

Back to top button