بيعجبك طفل أوي لدرجة إنك بتقوله هاكلك؟.. فانت بتعمل ” Cute agression”
ساعات لما بتشوف بيبي أو قطط صغيرة أو حتى ناس بتحبها.. بتحس إنك عايز تاكلهم أو تديهم بوكس من كتر ما هما كيوت كده.. طب ليه العنف وتصعيد الأمور ده؟ المفروض إنك بتحبهم ليه عايز تعنفهم؟ أهو ده بالظبط الـ Cute agression أو العدوانية اللطيفة اللي هنشرحهولك ونقولك ليه بيحصل أصلًا!
إحساس مُلِّح إنك تقرص أو تعض حاجة أو حد من كتر ما هو كيوت.. حالة كده بتجمع بين شعورين متناقضين زي الحب والغضب لأنك مش قادر تستوعب الجمال الكبير ده
رغم إن الجمال واللطافة بتختلف من شخص للتاني بس بشكل عام صفات الأطفال المولودين بتحرك الحب والاهتمام جوانا.. فمثلًا العيون الكبيرة والمناخير الصغننة والجلد الناعم والخدود التُفاحي والدقن الصغيرة.. فعشان كده حتى لما بتشوف حيوانات زي القطط على سبيل المثال بتحس إنك عايز تاكلها لأن هي فيها نفس صفات الأطفال حديثي الولادة
وسنة 1998 عالمة النفس “فريدريكسون وليفينسون” عملت دراسة تكشف العلاقة بين تعابير الوش والتعافي من الإجهاد.. وفرجوا مجموعة من الناس على فيلم حزين ولقوا إن أكتر من نص المشاركين اللي ضحكوا في أكتر المشاهد الحزينة ضربات قلبهم هديت مقارنة بالأشخاص التانيين اللي عيطوا.. وده بيبن إن المشاعر المتناقضة بتقلل الإرهاق والتعب وده بالظبط اللي بيحصل في العدوان اللطيف
1- تنظيم المشاعر: الحاجات الكيوت بتخلي الدماغ تفرز كميات كبيرة من الدوبامين.. وبيبقى صعب على الدماغ استيعاب كل الطاقة الإيجابية دي.. فضروري يحصل موازنة للمشاعر المجزعة الكتيرة دي بشوية غضب مثلًا
2- المسؤولية: الأشخاص أو الحاجات الجميلة مش بس بتحرك إحساس الحب جواك.. لأ هي كمان بتحرك إحساسك بالمسؤولية.. ومينفعش اللي يطغى شعور الحب لأن ده هينسيك دورك في حماية الأشخاص دول.. فالدماغ بتنبهك وبتبقى عدواني بشكل لاواعي
3- التجارب الصعبة: الأشخاص اللي بيمروا بالعدوانية اللطيفة بيعيشوا تجارب عاطفية شديدة أوي.. وعشان كده تلاقي أمهاتنا مثلًا بيعيطوا في فرح بنتهم أو ابنهم.. لأنهم في موقف مشاعره كبيرة أوي عليهم
4- لغة الحب: فيه ناس معينين لغة الحب بتاعتهم الرخامة أو الضرب.. زي شد الشعر اللي بيحصل بينك وبين أخوك وفي الآخر بتاخدوا بعض بالأحضان
1- اعرف إن ده حب ونيتك مش أذى
2- أول ما تحس كده.. تدارك الموقف كويس أوي واعمل تمارين تنفس وهدي شوية يابو الشباب
3- لو حسيت إن مشاعر العنف زيادة أوي.. ابعد عن الشخص أو الحيوان لحد ما تستعيد توازنك
وفي الأخر حاول تلاقي أحسن طريقة تعبر بيها عن حبك لحاجة أو لحد.. عشان الحاجات الكيوت دي خسارة فيها العجن وحافظ عليها
