كـأس العـالـم 2026.. بطولة عنوانها تألق حراس المرمى

كأس العالم 2026 لحد دلوقتي ماشي بشكل مختلف تمامًا عن كل التوقعات… البطولة اللي الناس كانت فاكرة إن هتكون مسرح لتألق المهاجمين والنجوم الكبار طلعت بشكل واضح إن حراسة المرمى هي اللي خطفت الأضواء وبقت العنوان الأهم في أول جولتين لدرجة إن لأول مرة نشوف عدد كبير من الحراس بيكسبوا رجل المباراة وبيأثروا بشكل مباشر في نتائج منتخباتهم وكأن الحارس بقى نص الفريق لوحده.

اللي حاصل فعليًا إن في مباريات كتير اتقلبت بسبب تصديات فردية خارقة وفرق صغيرة قدرت تصمد قدام عمالقة بفضل حراسها وده خلق حالة جديدة في المونديال مونديال الحراس.

إلوى روم… حارس كوراساو والتاريخ اللي اتكتب

أول اسم لازم يتقال هو حارس كوراساو إلوى روم اللي عمل مباراة من العيار التقيل قدام الإكوادور وصد حوالي 15 تسديدة كاملة في 90 دقيقة.

المباراة دي انتهت 0-0 لكن الحقيقة إن النتيجة دي كانت بفضل الحارس بس اللي عمل رقم قياسي تاريخي في عدد التصديات في مباراة واحدة في كأس العالم وخلى منتخب بلاده يطلع بأول نقطة في تاريخه المونديالي.. التقارير

العالمية أكدت إن الأداء ده كان استثنائي لدرجة إن الإعلام وصفه بـ”الجدار اللي مبيتخرقش”.

كاب فيردي… حارس صنع المفاجأة

كمان حارس كاب فيردي “فوزينيا” كان ليه بصمة قوية جدًا خصوصًا في مباراة إسبانيا اللي انتهت 0-0.. الفريق كان بيواجه ضغط هجومي كبير، لكن الحارس كان واقف بثبات رهيب وبيتصدى لكرات صعبة جدًا وده خلّى منتخب كاب فيردي يخرج بنتيجة تاريخية قدام منتخب من أقوى منتخبات العالم.. الفكرة هنا مش بس في التصديات لكن في الثقة اللي بيمنحها لمنتخب كامل واقف قدام عملاق أوروبي وقدر كمان يقدم مباراة كبيرة ضد أوروجواي واللي خرجت بتعادل 2-2.

علي رضا .. جدار حقيقي

أقوى مثال واضح هو علي رضا بيرانوند حارس إيران في ماتش بلجيكا.. المباراة كانت ضغط هجومي مستمر من بلجيكا لكن علي رضا كان في حالة استثنائية وطلع بأداء خرافي وصد كرات كتير جدًا ووصل لحد حوالي 7 تصديات مؤثرة وخد رجل المباراة. 

بلجيكا كانت مسيطرة وبتضغط لكن كل مرة الكرة توصل للمرمى كان بيرجعها تاني بشكل يخلي الفريق يقف قدام “سد منيع”وبسبب أداؤه إيران خرجت بتعادل مهم جدًا 0-0 وده خلاه واحد من نجوم الجولة مش بس في إيران لكن في البطولة كلها.

مصطفى شوبير 

على الجانب المصري مصطفى شوبير كان له تأثير واضح في أول جولتين خصوصًا في مباراتي بلجيكا ونيوزيلندا.. في ماتش بلجيكا رغم الضغط الكبير شوبير كان ثابت جدًا ونجح في إنه يحافظ على شباك مصر في كذا لقطة خطيرة ودي كانت نقطة تحول مهمة في إن المنتخب يطلع بنتيجة إيجابية.

وبعدها في ماتش نيوزيلندا نفس الفكرة تقريبًا… تدخلات سريعة تمركز كويس وقرارات صح في الكرات العالية والفرص القريبة وده خلّى الدفاع المصري يبان أكثر استقرارًا.

اللي حصل إن الأداء ده رجع إحساس عند الجمهور المصري إن عندنا حارس “بيطمنك” وبيتعامل مع الضغط بشكل هادي زي أيام الحراس الكبار في تاريخ الكرة المصرية وده خلاه واحد من الأسماء اللي اتكلم عنها ناس كتير في البطولة.

ياسين بونو… خبرة المواعيد الكبيرة

طبعًا مينفعش ننسى ياسين بونو اللي مكمل عادته في البطولات الكبيرة.. قدام البرازيل، كان واضح جدًا قد إيه بونو بيعرف يتعامل مع الضغط، وتصدى لكرات صعبة جدًا في توقيتات حساسة، وخلّى المغرب يفضل في المباراة لأطول وقت ممكن.

وكمان في مباراة اسكتلندا، كان عنصر أمان واضح، خصوصًا في التعامل مع العرضيات والتسديدات البعيدة، وده خلّى دفاع المغرب دايمًا في وضع مطمئن.

بونو ببساطة بقى من الحراس اللي وجودهم في الملعب بيغيّر شكل الفريق بالكامل.

العويس وحارس أستراليا

حارس أستراليا باتريك بيتش دخل البطولة بشكل مفاجئ وقدم مباراة كبيرة جدًا قدام تركيا ونجح يعمل حوالي 8 تصديات تقريبًا في مباراة واحدة وكان من أهم أسباب فوز أستراليا والحفاظ على شباكه نظيفة.

الناس بدأت تتكلم عنه كواحد من مفاجآت الجولات الأولى بسبب هدوءه تحت الضغط وكثرة إنقاذاته في لحظات صعبة.

وبرضو محمد العويس حارس السعودية كان له دور واضح في مباريات السعودية خصوصًا قدام منتخبات قوية زي أوروجواي وقدم تصديات مهمة جدًا خلت المنتخب السعودي يطلع بنتيجة إيجابية في مباراة صعبة وخد رجل المباراة بأكتر من تصدي مهم في اللقاء.

حارس الكونغو كابوس كولومبيا

الحارس “ليونيل مباسي نزاو” عمل أداء قوي ومميز جدًا قدام منتخب كولومبيا رغم الخسارة 1-0.. الحارس عمل 5 تصديات في أول 20 دقيقة بس عشان يحقق رقم قياسي ويبقى أول حارس يعمل 5 تصديات في الـ20 دقيقة الأولى من 1998 “وارين باريت جامايكا ضد الأرجنتين”.. وقدر ينهى المباراة بـ8 تصديات بالمبارة