ليه الذباب كتير الأيام دي وإزاي ممكن نقلله في بيوتنا؟

لو ملاحظ ومستغرب من أعداد الذباب الكتير في الشارع أو في البيت اليومين دول.. ماتقلقش انت مش لوحدك.. والموضوع ده له أسباب وبرضه له حلول..

حسب موقع “SCIENCE INSIGHTS“

أسباب الظاهرة دي:

– أول وأهم سبب بيكون التغيرات اللي بتحصل في الجو.. خاصة لما درجة الحرارة تزيد.. وده لأن درجات الحرارة العالية بتعمل بيئة مثالية لتسريع نمو الذباب من بيضة لحشرة بالغة
– الرطوبة العالية أو الأماكن الرطبة اللي فيها تجمعات مياه راكدة برضه بتكون مكان مثالي لاحتضان بيض الذباب.. وده لأن الرطوبة بتسرع من تحلل المواد العضوية اللي بيتغذى عليها الذباب
– كمان البيئة المحيطة بيك لو فيها أكوام قمامة أو بقايا أكل مكشوف ده بيجذب الذباب ليها أكتر عشان يتغذى عليها ويفقس فيها البيض بتاعه
– الصرف الصحي المكشوف بيكون برضه من أكبر عوامل جذب الذباب للمكان الموجود فيه 

العوامل دي لو اتجمعت في وقت ومكان واحد بيزيد فيهم أعداد الذباب بشكل كبير.. وده عشان الذباب نفسه بيتكاثر في وقت قليل جدًا ودورة حياته كاملة ممكن تبقى من 7-10 أيام.. والذبابة الأنثى ممكن تبيض من 75 – 150 بيضة وممكن توصل لـ 500 بيضة في الدفعة الواحدة.. وكل ده ممكن يفقس في حدود 8 – 20 ساعة.. 

طب وإيه الحل؟

الحل بيبدأ من إنك تفهم دورة الحياة دي صح وتبدأ تمنع عملية التكاثر نفسها مش بس تقضي على اللي عايش بالفعل.. وده بيكون من خلال: 

– ماتخليش للذباب أكل يساعده في التكاثر.. سواء أكل بايت مكشوف أو أكل في القمامة وحتى الأطباق تتغسل أول بأول
– التخلص من القمامة الموجودة في المكان اللي انت موجود فيه أول بأول وماتسيبهاش مكشوفة
– اتأكد إن المصارف الصحية نضيفة مفيش فيها مياه راكدة وكمان مش مكشوفة
– على قد ما تقدر اقفل الأماكن اللي بيدخل منها.. اقفل سلك على الشبابيك والأبواب
– في كمان مصيدة ممكن تعملهاله.. ودي بتبقى عن شوية خل تفاح في أي كباية أو علبة مفتوحة وحط عليهم شوية صابون سائل.. خل التفاح بيجذب الذباب والصابون بيسهل إنه يزحلقه لتحت السطح.. وبكده تقدر تتخلص من الذباب الموجود في المكان اللي انت فيه.