رياضة البولو وليه هي لعبة الملوك؟

لعبة البولو من أقدم الألعاب الجماعية اللي عرفتها البشرية وعمرها أكتر من ألفين سنة.. بتتلعب على ضهر الحصان وكل فريق بيحاول يسجل في مرمى الفريق التاني عن طريق ضرب كورة بمضرب طويل.. اللعبة دي معروفة عالميًا بلقب “لعبة الملوك”.

المصادر التاريخية بتقول إن أصل لعبة البولو يرجع لآسيا الوسطى وبلاد فارس القديمة (إيران حاليًا) من حوالي القرن السادس قبل الميلاد.. القبائل الرحل اللي كانت جدود المغول والفرس دلوقتي كانوا بيلعبوا نسخة بدائية من اللعبة دي كجزء من تدريب الفرسان والجيش مش كرياضة ترفيهية بالمعنى اللي إحنا عارفينه دلوقتي.. اللعبة كانت وسيلة عشان المحاربين يتمرنوا على ركوب الخيل والتنسيق مع بعض وكمان بتسليهم وقت السلام.

مع مرور الوقت الفرس خصوصًا في عصر الإمبراطوريتين البارثية والساسانية طوروا اللعبة من مجرد تمرين حربي خشن لرياضة نبيلة بتتلعب في بلاط الملوك وبقت جزء أساسي من حياة الطبقة الأرستقراطية الفارسية.. من فارس انتقلت اللعبة لمناطق تانية زي الهند والتبت والصين واليابان عن طريق طرق التجارة والحملات العسكرية.. في الصين مثلًا في عصر أسرة تانج الإمبراطور نفسه كان من عشاق اللعبة.

ليه بيقولوا عليها “لعبة الملوك”؟

السبب الرئيسي إن اللعبة اتربطت من الأول بالملوك والنبلاء والطبقة الحاكمة من زمن بلاط الفرس اللعبة كانت مقصورة على الملوك وحراسهم الخاصين والصفوة ومكانتش متاحة للعامة خالص وبعدين لما انتقلت للهند المهراجات أمراء وملوك الهند اتبنوها كرياضة رسمية في بلاطهم وده زود من صورتها كرياضة “ملكية” بامتياز.

كمان في العصر الحديث اللعبة فضلت مرتبطة بالنخبة والأثرياء لأن ممارستها مكلفة جدًا محتاج تعرف تركب خيل كويس ومحتاج على الأقل حصانين لكل لاعب في كل ماتش وثمن الحصان الواحد ممكن يوصل لعشرات الآلاف من الدولارات غير تكلفة المعدات والسرج والمضرب والملابس.. عشان كده لسه لحد دلوقتي مرتبطة بالعائلات المالكة والمشاهير  الأمير هاري من أشهر لاعبيها في العصر الحديث وونستون تشرشل كان من عشاقها لدرجة إنه كان بيلعب حتى وهو مصاب وحتى والت ديزني كان بيلعبها بانتظام مع نجوم هوليوود.

إزاي وصلت للعالم الغربي؟

اللعبة بالشكل اللي إحنا عارفينه دلوقتي بالقواعد المنظمة والملعب المحدد اتشكلت في القرن التاسع عشر بفضل الإمبراطورية البريطانية.. الضباط البريطانيين لما كانوا في الهند لقوا اللعبة بتتلعب في منطقة مانيبور شمال شرق الهند وكانت اسمها المحلي “ساجول كانجي”.. اتحمسوا لها جدًا وسنة 1859 الملازم جوزيف شيرر أسس أول نادي بولو غربي في مدينة سيلشار الهندية.. من هناك اللعبة وصلت إنجلترا سنة 1869 وبعدين اتأسست جمعية “هيرلينجهام” للبولو سنة 1874 اللي حطت القواعد الرسمية المعروفة لحد دلوقتي أربعة لاعبين في كل فريق وملعب بمقاس معين وكورة خشبية.

من إنجلترا البريطانيين نشروا اللعبة في كل حتة راحوا لها  مش بس في مستعمراتهم لكن كمان في أماكن زي الأرجنتين وكاليفورنيا وبقت الأرجنتين من أقوى الدول في اللعبة دي لحد النهاردة.

اللعبة دلوقتي

البولو كانت لعبة أوليمبية في أول القرن العشرين (سنين 1900 و1908 ومن 1920 لحد 1924 و1936) لكن اتشالت بعد كده وده يمكن بسبب التكلفة العالية بتاعتها اللي بتخليها صعب إنها تكون رياضة شعبية أو “رياضة جماهيرية”.. حاليًا البولو بقت من الرياضات اللي بتجذب اهتمام أصحاب الأموال في العالم سواء كلاعبين أو مستثمرين أو مشجعين وفي إقبال متزايد عليها في الصين والشرق الأوسط كمان.