هال سيتي.. مفاجأة البريميرليج اللي محدش كان متوقعها

لو سألت أي حد بيتابع الدوري الإنجليزي إيه أكتر حاجة لفتت نظره في بداية الموسم هيقولك بلا تردد هال سيتي.. الفريق اللي رجع للبريميرليج بعد غياب طويل مش بس رجع وخلاص لأ رجع وبيلعب زي فريق مؤهل لأوروبا مش فريق صاعد من الشامبيونشيب.

العودة للدوري الإنجليزي

آخر مرة هال سيتي لعبوا بريميرليج كانت موسم 2016-17 وبعدها بدأت مرحلة كئيبة فعلاً الوضع وصل أسوأ حالاته موسم 2019-20 لما هال نزلوا لآخر الشامبيونشيب وهبطوا للدرجة التالتة والمفارقة إن الهبوط ده حصل وقت الكورونا يعني حتى ماتشات الهبوط كانت من غير جمهور.. بعدها بموسم واحد رجعوا الشامبيونشيب تاني كأبطال الدرجة التالتة برضو من غير جمهور بسبب استمرار قيود كورونا.

في نفس الفترة العلاقة بين عيلة “آلام” المالكة للنادي والجماهير كانت وصلت لمستوى وحش خصوصاً بعد محاولتهم اللي اتلغت في الآخر يغيروا اسم النادي لـ”هال تايجرز”قرار الجماهير لسه مش سامحينه لحد دلوقتي.

يناير 2022 رجل الأعمال والإعلامي التركي أكون إليجالي اشترى النادي من عيلة آلام في صفقة قيمتها ما بين 20 و30 مليون جنيه إسترليني.. وقتها هال كانوا في المركز التاسع عشر بالشامبيونشيب قريبين من منطقة الهبوط.. إليجالي مالش صبر خالص وفي نفس شهر التولي أقال المدرب جرانت مكان وجه بعده شوتا أرفيلادزه.

المشوار بعد كده كان صعب ومتقلب تغييرات مدربين كتير منأرفيلادزه ليام روزينيور روبن سيلييس خيبات أمل في الملحق وانتقادات للجماهير إن الفلوس اللي بتتصرف مش بترجع نتايج بس النادي كان بيتحسن بالتدريج من المركز التاسع عشر لخامس عشر لسابع وأخيراً السادس اللي منه صعدوا موسم 2025-26.

الصعود.. إزاي حصل بالظبط؟

الموسم اللي فات هال كانوا شغالين تحت حظر انتقالات وخسائر مالية أكتر من الـ40 مليون جنيه إسترليني بعد ما قاوموا الهبوط لليج ون في آخر جولة من الموسم اللي قبله يعني الفريق ده مكانش مرشح للصعود أصلاً كان بقاؤه في الشامبيونشيب نفسه موضع شك.

بس المدرب الجديد سيرجي ياكيروفيتش عمل حاجة غريبة بنى فريق من صفقات مجانية وإعارات وعقود ذكية ولعب بأسلوب براجماتي “الكتلة المنخفضة” والكونترا والنتيجة هال خلص السيزون في المركز السادس ودخل الملحق.. المفاجأة الأكبر كانت في الأرقام حسب تحليلات أوبتا هال كان تاني أسوأ فريق في الدوري من ناحية “النقاط المتوقعة” (xPts) يعني كانوا بيكسبوا نقط أكتر بكتير من اللي المفروض يستحقوها.

في نص النهائي هزموا ميلوول وكانوا المفروض يقابلوا ساوثهامبتون في النهائي لكن ساوثهامبتون اتفصلوا من الملحق بعد فضيحة التجسس الشهيرة  اتضح إنهم بعتوا محلل يتجسس على تدريبات ميدلزبره وهو مختبئ جنب شجرة بموبايل! فاتلعب النهائي بين هال وميدلزبره وأولي ماكبيرني سجل هدف الفوز الوحيد في الدقيقة الأخيرة من الوقت البدل الضائع وهال رجعوا البريميرليج بعد غياب تسع سنين.

سيرجي ياكيروفيتش.. المدرب اللي جه من العدم

أكتر قصة عليها العين في كل ده هي مدرب هال الحالي.. سيرجي ياكيروفيتش من البوسنة والهرسك بمدينة موستار اتولد ديسمبر 1976 ولعب كمدافع محوري ولاعب وسط دفاعي لمدة 20 سنة في ناديات كتير في ستة دول مختلفة  البوسنة.. كرواتيا.. سلوفاكيا.. سلوفينيا.. بلغاريا.. والنمسا.. مسيرته كلاعب كانت متواضعة جداً ومحدش كان يعرفه.

بدأ التدريب بعد اعتزاله في أندية صغيرة زي سيسفيتيه وجوريكا الكرواتية.. أول نجاح كبير ليه كان مع زرينسكي موستار في البوسنة لما قاده للقب الدوري البوسني موسم 2021-22.. بعدها انتقل لرييكا الكرواتية وحقق نتايج قوية (52 فوز من 77 مباراة) وده فتحله الباب لدينامو زغرب  أحد أعرق أندية كرواتيا وقاده لثنائية الدوري والكأس موسم 2023-24.

بس رحلته مع دينامو زغرب خلصت بشكل مؤلم بعد خسارة تقيلة قدام بايرن ميونخ في دوري أبطال أوروبا أتقل خسارة في تاريخ النادي في البطولة بعدها بفترة قصيرة راح لكايسريسبور التركي في يناير 2025 والفريق كان غرقان في مشاكل الهبوط وخسر بس 4 مباريات من أصل 17 وأنقذ الفريق وده اللي لفت نظر إدارة هال سيتي ليه.

في يونيو 2025 اتعين مدرب لهال سيتي  أول تجربة ليه في الكورة الإنجليزية خالص ومن أول موسم حول فريق كان مرشح للهبوط لفريق صاعد للبريميرليج بمعدل 1.58 نقطة في المباراة طول الموسم وضمن مكان الملحق في آخر جولة بفوز 2-1 على نورويتش سيتي وبعدين كسب ميلوول في نص النهائي وميدلزبره في النهائي بثلاث مباريات نضيفة متتالية.. النادي كافأه بعقد جديد لسنتين يمتد لحد صيف 2028 مع خيار تمديد لموسم إضافي.

بداية تاريخية في البريميرليج

المفاجأة الحقيقية مش بس في الصعود.. دول كمان لسه مش واخدين هزيمة لحد دلوقتي.. من أول 4 مباريات في البريميرليج هال جمعوا 8 نقاط من أصل 12 وأهم حاجة إنهم حافظوا على نظافة شباكهم في أول 3 مباريات على التوالي  ده إنجاز ماعملهوش غير فريقين بس قبل كده في تاريخ الدوري الإنجليزي (تشارلتون أثلتيك موسم 98-99، وهدرسفيلد تاون موسم 2017-18) بعد كده تعادلوا 0-0 مع أستون فيلا وحافظوا على نفس السجل وآخر حاجة كانت تعادل مثير 2-2 في ستامفورد بريدج قدام تشيلسي بعد ما كانوا بادئين متأخرين وقلبوا النتيجة لصالحهم قبل ما تشيلسي يعادل.. النتيجة دي خلت هال يقعدوا في المركز التاني بالجدول المبكر.

ياكيروفيتش نفسه قال بعد مباراة فيلا: “لو حد كان قال لي هناخد 7 نقط بعد 3 مباريات قبل بداية الموسم كنت هوقع على الكلام ده على طول خصوصاً قدام مين احنا لعبنا معاهم!”وبعد التعادل مع تشيلسي الإعلام الإنجليزي بقى بيوصف هال بـ”مفاجأة موسم البريميرليج” بشكل رسمي تقريباً.

النادي بيمتلك لاعبين مميزين زي أولي ماكبيرني المهاجم الاسكتلندي كان نجم موسم الصعود بـ17 هدف في الدوري ولسه مستمر في مستواه.. لاعبين زي ريجان سلاتر في الوسط وتشارلي هيوز في قلب الدفاع  اللي كان من أحسن لاعبي الشامبيونشيب في مركزه  بقوا العمود الفقري للفريق في مستوى أعلى والمدرب نفسه ترشح لجايزة “أفضل مدرب في أغسطس”.

مالياً الصعود جاب لهال دعم مالي يوصل لأكتر من 200 مليون جنيه إسترليني عائدات إضافية ده غير رفع حظر الانتقالات اللي دلوقتي عندهم مساحة أكبر يتحركوا بيها في سوق الانتقالات المقبلة..قيمة النادي السوقية دلوقتي بتتقدر بحوالي 150-200 مليون جنيه إسترليني بفضل الصعود.