مصارعة الصوابع”.. لعبة غريبة بتلحم بالأولمبياد”
مصارعة الصوابع بقالها أكتر من 50 سنة وبقت رياضة ليها بطولة عالمية.. واتحاد.. وقواعد.. وأبطال.. وجوايز فلوس.. وكمان بتحلم إنها توصل للأولمبياد.
اللعبة الغريبة دي بدأت سنة 1974 في حانة “رويال أوك” في قرية ويتون بمقاطعة ستافوردشاير الإنجليزية.. لما ابتكرها بيت تشيثام وإيدي ستانسفيلد وبيت دين وميك داوسون والفكرة كانت بسيطة لاعبين قاعدين قصاد بعض.. بيشبكوا صوابع رجليهم الكبيرة.. وكل واحد بيحاول يجبر رجل التاني إنها تلمس جنب منصة اللعب.. اللي اسمها “التوديوم”.
وكده اتولدت رياضة أول ما تسمع عنها ممكن تضحك.. بس بالنسبة للاعبينها هي منافسة حقيقية محتاجة قوة ومرونة وتحمل وتركيز.
من حانة إنجليزية لبطولة عالمية
اللعبة فضلت شغالة في إنجلترا سنين.. لحد ما اتجددت مع جورج بورجيس.. اللي اسمه ارتبط بإحيائها وتنظيم بطولة العالم وسنة 1997 بورجيس قدم طلب رسمي للجنة الأولمبية الدولية عشان يتعترف باللعبة.. بس الطلب اترفض.
ورغم كده المحاولات ما وقفتش.. الموقع الرسمي لبطولة مصارعة الصوابع بيقول إن الاعتراف الأولمبي لسه هدف أساسي للاتحاد.. وفيه خطط يقدموا الطلب تاني للجنة الأولمبية بعد ما يوسّعوا قاعدة اللعبة.. وينشئوا اتحادات دولية.. وينظموا نظام موحد للمنافسات.
أما البطولة نفسها.. بقت بتتقام كل سنة في أشبورن بإنجلترا.. وفي السنين الأخيرة بقت بتجذب متنافسين من برا بريطانيا كمان وفي نسخة 2026.. النهائيات كانت يوم 18 يوليو في ميدان سوق أشبورن.. وجوايز البطولة وصلت 9000 جنيه إسترليني.
بتتلعب إزاي؟ وليه أصعب مما تتخيل؟
القواعد شكلها بسيط.. بس تنفيذها محتاج مجهود جسدي كبير.. اللاعبين بيقعدوا قصاد بعض فوق منصة المنافسة.. وبيشبكوا صوابع رجليهم الكبيرة.. والماتش بيتلعب على أحسن 3 جولات وكل لاعب بيحاول يستخدم القوة والزاوية والمرونة عشان يجبر رجل خصمه تلمس العمود أو الجزء المحدد من المنصة.
ولازم الإيدين والجزء السفلي من جسم اللاعب يفضلوا في وضعية معينة أثناء المنافسة.. والرجل التانية تفضل مرفوعة عن الأرض.. وده بيخلي الموضوع معركة بتعتمد على عضلات القدم والساق والجذع في نفس الوقت.
واللي يلفت النظر إن الماتشات مش دايمًا قصيرة زي ما البعض ممكن يتخيل.. فبعض المواجهات ممكن تطول لحد ساعتين.. وده حسب تقرير قناة “آي تي في” البريطانية عن بطولة 2024 أما التدريبات فبتشمل تمارين خاصة لصوابع القدم.. وتمارين قوة للجزء السفلي والجذع.. مع الاهتمام بمرونة القدم وحالتها.
بن وودروف.. من أشهر لاعبي اللعبة.. وصفها بإنها رياضة جادة.. وقال إن اللاعبين “بيتدربوا زي الرياضيين الأولمبيين”.. وأشار لإمكانية تعرّض اللاعبين لكسور في صوابع القدم.. غير الفقاقيع وآلام الركبة وكشف وودروف كمان إنه عمل عملية جراحية عشان يشيل ضفر إصبعي رجله الكبيرين.. واعتبر ده جزء من استعداده للمنافسات.
ناش”.. الأسطورة.. وبروكس بطل 2026”
لما الكلام يجي عن تاريخ مصارعة الأصابع.. اسم ألان ناستي ناش بيظهر الأول.. اللاعب الإنجليزي بقى صاحب الرقم القياسي في عدد مرات الفوز ببطولة العالم في الرجال.. بعد ما كسب اللقب 16 مرة.. وده رقم موثق في موسوعة جينيس.. وكمان الموقع الرسمي للبطولة بيحطه كصاحب الرقم القياسي التاريخي.
ومن أبرز منافسين ناش في السنين الأخيرة بن توي-تال ديستراكشن وودروف.. اللي بقى من الأسماء الأساسية في اللعبة.. وكسب بطولة العالم كذا مرة.. من بينها نسخ 2022 و2023 و2024 و2025 حسب سجل البطولة الرسمي.
بس لقب 2026 راح لاسم جديد في قايمة الأبطال.. بعد ما توّج كيسي “ذا بيج تو” بروكس ببطولة الرجال.. وأبيجيل بيتش خدت لقب السيدات.. والموقع الرسمي أكد إن بروكس بقى بطل العالم في نسخة اتقامت في أشبورن قدام جمهور البطولة.
وبكده مصارعة الأصابع مبقتش مجرد لعبة طريفة بدأت في حانة إنجليزية من نص قرن.. دلوقتي بقى ليها روزنامة بطولات وتصنيف عالمي وقواعد رسمية.. وسجل أبطالها فيه أسامي حافظت على اللقب سنين.
وممكن أغرب حاجة في الرياضة دي إنها مش محتاجة ملعب ضخم ولا معدات معقدة.. يكفي “توديوم”.. وخصمين.. وصباعين كبيرين في الرجل.. والكتير من القوة والإصرار.. أما حلم القائمين عليها فأكبر بكتير وهو إن اللعبة تطلع من الحانة لحد الأولمبياد
