كل حاجة محتاج تعرفها عن طرابزون سبور.. فريق “محمد صـلاح” الجديد

بعد انتقال محمد صلاح إلى طرابزون سبور أنظار الجماهير المصرية والعربية كلها اتجهت للنادي التركي عشان تعرف تاريخه وحكايته خاصة إن الفريق يعتبر واحد من أكبر أندية تركيا وصاحب تجربة مختلفة قدر بيها يكسر هيمنة أندية إسطنبول على البطولات المحلية وكمان النادي داخل الموسم الجديد بطموحات كبيرة بعد التعاقد مع قائد منتخب مصر في صفقة تعتبر من أبرز الصفقات في تاريخ الكرة التركية.

 نادي اتولد عشان يغير تاريخ الكورة التركية

اتأسس طرابزون سبور رسميًا يوم 2 أغسطس 1967 بعد اندماج 3 أندية من مدينة طرابزون وهي إدمان أوجاغي وإدمان جوجو ومارتي سبور بهدف تكوين فريق قوي يمثل المدينة ويقدر ينافس عمالقة إسطنبول ومن أول يوم النادي كان شايل طموح منطقة البحر الأسود كلها وبقى رمز لمدينة طرابزون وسكانها.

قبل ظهور طرابزون سبور كان الدوري التركي شبه محتكر بين جالاتا سراي وفنربخشة وبشكتاش لكن الفريق اللي جاي من البحر الأسود قلب الموازين بعد ما توج بلقب الدوري موسم 1975-1976 وبقى أول نادي خارج إسطنبول يحقق البطولة والإنجاز ده الإعلام التركي أطلق عليه اسم “ثورة الأناضول” وبعدها كمل كتابة التاريخ وأضاف 6 ألقاب دوري تانية كان آخرها موسم 2021-2022.

بطولات صنعت مكانة النادي

على مدار تاريخه قدر طرابزون سبور يثبت نفسه كواحد من أنجح الأندية في تركيا بعد ما توج بلقب الدوري التركي 7 مرات وكأس تركيا 10 مرات وكأس السوبر التركي 10 مرات وكمان سبق له الفوز بلقب دوري الدرجة الثانية وآخر إنجازاته كانت التتويج بكأس تركيا موسم 2025-2026 عشان يؤكد إنه لسه واحد من كبار الكرة التركية.

بابارا بارك.. معقل عاصفة البحر الأسود

طرابزون سبور بيلعب مبارياته على ملعب بابارا بارك المعروف قبل كده باسم مجمع شينول جونيش الرياضي واللي بيتسع لحوالي 41 ألف متفرج.. والملعب يعتبر من أصعب الملاعب في تركيا بسبب الضغط الجماهيري الكبير لأن جماهير الفريق معروفة إنها بتعمل أجواء استثنائية طول المباراة وده بيدي الفريق أفضلية كبيرة على أرضه.

جماهير طرابزون سبور تعتبر من أكتر الجماهير حماسًا في تركيا وبتشتهر بشعار “بيزه هير يَر طرابزون” واللي معناه “كل مكان هو طرابزون” في إشارة لانتشار جماهير النادي في كل أنحاء تركيا وخارجها وتمسكهم الدائم بالانتماء لمدينتهم مهما كانوا بعيد عنها.

سر الرقم 61.. ليه محمد صلاح لبسه؟

أول حاجة لفتت نظر الجماهير وقت تقديم محمد صلاح لاعبًا جديدًا لطرابزون سبور كانت ظهوره بالقميص رقم 61 والرقم بالنسبة لجماهير النادي مش مجرد رقم لكنه بيمثل هوية مدينة طرابزون لأنه الكود الرسمي للمدينة في لوحات السيارات التركية.

وعشان كده الرقم بقى رمز مقدس داخل النادي والجماهير بتحرص في الدقيقة 61 من كل مباراة إنها تحتفل وتهتف بشكل جماعي في واحد من أشهر التقاليد الجماهيرية في الكرة التركية وكمان إدارة النادي مبتديش الرقم ده غير للاعبين أصحاب المكانة الكبيرة أو النجوم اللي بيمثلوا مشروع الفريق وده اللي يفسر اختيار محمد صلاح يلبسه من أول يوم.

ألوان وهوية خاصة

طرابزون سبور بيعتمد اللونين النبيتي والأزرق السماوي وهما اللونان اللي ارتبطوا بتاريخ النادي من وقت تأسيسه والفريق معروف بلقب “عاصفة البحر الأسود” بسبب انتمائه لمنطقة البحر الأسود وكمان الجماهير بتطلق عليه لقب “النمور” وبتستخدمه كتير في المدرجات.

ديربيات وصراعات تاريخية

رغم إن طرابزون سبور مش من أندية إسطنبول لكن مبارياته ضد جالاتا سراي وفنربخشة وبشكتاش تعتبر من أقوى مباريات الدوري التركي بسبب الصراع التاريخي بين أندية إسطنبول وفرق الأناضول وتعتبر مواجهة فنربخشة هي الأكتر حساسية بالنسبة لجماهير طرابزون خصوصًا بعد أزمة لقب الدوري موسم 2010-2011 اللي لحد النهارده تعتبر واحدة من أكتر القضايا إثارة للجدل في تاريخ الكرة التركية وكمان مواجهات بشكتاش وجالاتا سراي بتحظى باهتمام جماهيري وإعلامي كبير كل موسم.

نجوم صنعوا تاريخ النادي

على مدار تاريخه لبس قميص طرابزون سبور نجوم كبار منهم الحارس والمدرب الأسطوري شينول جونيش وجوكدينيز كارادينيز وإبراهيم ياتارا ويوسف يازيجي وعبد القادر أومور وألكسندر سورلوث وأوجورجان تشاكير ودلوقتي محمد صلاح بينضم للقائمة دي في واحدة من أكبر الصفقات اللي أبرمها النادي في تاريخه.

“مشروع جديد بقيادة “فاتح تيكي

الفريق بيدربه حاليًا فاتح تيكي واحد من أساطير طرابزون سبور واللي رجع يقود النادي وهو عنده طموحات كبيرة إنه يرجعه ينافس على لقب الدوري التركي ويظهر بقوة في البطولات الأوروبية والفريق بيضم مجموعة مميزة من اللاعبين زي أندريه أونانا وبول أونواتشو وإرنست موتشي ودينيس دراجوش بجانب محمد صلاح اللي الجماهير مستنية منه يصنع الفارق جوه الملعب.

ليه انتقال صلاح يعتبر حدث تاريخي؟

مسؤولو طرابزون سبور مش شايفين صفقة محمد صلاح مجرد تدعيم فني لكن شايفينها خطوة تاريخية هترفع القيمة التسويقية للنادي وهتزود شعبيته على مستوى العالم خصوصًا في الوطن العربي وأفريقيا وكمان الجماهير بتعول على خبرة النجم المصري إنه يقود الفريق لاستعادة لقب الدوري التركي ويكتب فصل جديد في حكاية نادي اتعود طول تاريخه إنه يتحدى الكبار ويكسر كل القواعد