لعبة James Bond قادمة وأخبار تانية في الملخص الأسبوعي

مساء أو صباح على جيمرز جلوكال حسب وقت قراءتكم للموضوع ده، ده ملخص الأسبوع اللي بنتكلم فيه عن أهم الأخبار اللي حصلت خلال الأسبوع اللي فات في عالم الفيديو جيمز وما يخصه، وخلونا نبدأ الملخص بمشكلة شركة Epic Games اللي تم تغريمها 520 مليون دولار بسبب انتهاك خصوصية الأطفال بعد ما اتقدم ضدها أكتر من شكوى بسبب لعبة فورتنايت وإنهم كانوا بيفرضوا على الأطفال، عمليات شراء في اللعبة غير مرغوب فيها.

خلال الأسبوع ده طلبت لجنة التجارة الفيدرالية من Epic Games إنهم يسددوا 245 مليون دولار عشان يرجعوا للاعبين فلوسهم، واللجنة أطلقت صفحة عشان اللاعبين المتضررين يقدروا يسجلوها عليها عشان يستعيدوا أموالهم تحت بنود وشروط معينة.

وباستكمال الكلام عن لعبة فورتنايت وEpic Games، فا الشركة أعلنت عن وقف دعم نظام ويندوز 7 وويندوز 8 للعبة بداية من الموسم الرابع ولازم اللاعبين يحدثوا الويندوز بتاعهم لويندوز 10 على الأقل.

سوني أعلنت عن قائمة الألعاب المجانية واللي هتتوفر في 21 مارس الحالي لمشتركي خدمة PlayStation Plus.

استوديو IO Interactive أعلن وقف العمل على جزء جديد من سلسلة Hitman للتركيز على لعبة James Bond والمنتظرة من فترة طويلة.

اللعبة تم الاعلان عنها من 3 سنين وبيتم تطويرها مع استوديوهات MGM المطورة لسلسلة أفلام جيمس بوند.

واستوديو IO Interactive حاليا بيقوم بعمليات توظيف لعدة مشاريع من ضمنهم جيمس بوند ولذلك من المتوقع رؤية لعبة RPG عظيمة قريب.

وباستكمال الكلام عن الألعاب المهمة، استوديو Hangar 13 حاليا بيقوم برضه بعمليات توظيف لمشروع لعبة AAA متعددة المنصات وبيتم تطويرها بمحرك Unreal 5.

التسريبات بتقول إن اللعبة دي قد تكون Mafia الجديدة أو لعبة Top Spin 5.

من أيام قليلة، اتعرضت الحلقة الأخيرة من مسلسل The Last of us ولكن إحنا مش هناقش أي حاجة ليها علاقة بالمسلسل عشان مايبقاش في حرق ولكن هنتكلم عن الموسم التاني من المسلسل.

نيل دراكمان وكريج مازن قالوا في مقابلة مع مجلة GQ إن الجزء التاني من المسلسل مش هيكون من اللعبة وإن أحداث الجزء التاني من اللعبة، هتحتاج لأكتر من موسم واحد.

دراكمان قال إنهم هيجروا بعض التغييرات في حبكة الموسم التاني عن اللعبة زي ما حصل في الجزء الأول.

من فترة سمعنا عن لعبة The Last of Us الجماعية وكان من المتوقع إنه يتم إصدارها على بلايستيشن 5 كلعبة حصرية ولكن موقع Insider Gaming قال إن استوديو Naughty Dog المطور للعبة طلب مختبرين عشان يجربوا اللعبة ولازم المرشحين للوظيفة يكون عندهم خبرة في التعامل مع بلايستيشن 4 وبلايستيشن 5.

البعض اعتبر إن ده مؤشر على إن اللعبة هتيجي للجيل القديم من بلايستيشن، واللي بيأكد ده هو تصريح نيل دركمان إن الاستوديو كان شغال على اللعبة بقاله سنتين، وبلايستيشن 5 تم إصداره بنهاية عام 2020.

Related Articles

Back to top button