ليه بنحس إن وزننا لسه زايد بعد ما بنخس؟

كتبت: ندى خالد

خسارة الوزن شيء صعب جدا وبيحتاج مجهود و إرادة كبيرة من صاحبها وبيعاني بسببها فترات طويلة لحد ما يوصل للنتيجة اللي عايزها لكن للأسف في ناس من اللي بيفقدوا وزنهم مبيعرفوش يتبسطوا بالنجاح والمجهود اللي عملوه ده وبيتخلق عندهم فكرة  سلبية عن أجسامهم وبيفتكروا إن لسه وزنهم زايد وشكلهم مش زي ما عايزين علشان كده فى المقالة دي هنقولكم ايه هو ال Phantom fat طبقا لموقع Health enews.

الPhantom fat أو متلازمة  الدهون الوهمية هى اضطراب خطير جدا بيأثر على الإنسان وبيخليه عنده شعور بالقلق المفرط تجاه شكله وجسمه و بيبتدي يدقق فى كل حاجة و يركز على عيوب في جسمه صغيرة جدا ممكن محدش يشوفها غيره.

جراح السمنة Allen Mikhail بيقول إن فقدان الوزن بشكل كبير يعتبر تغيير كبير في حياتنا زيه زي الجواز،أو أننا نبدأ شغل جديدة،أو يبقى عندنا طفل لأول مرة كلها حاجات بتحتاج وقت كبير علشان نعرف نتكيف معاها وكمان بيقول إن مش كل الناس بتحس بسعادة لما بيفقدوا وزنهم رغم أنهم حققوا هدفهم وفي فرق كبير في شكلهم لما بيبصوا في المرايا  لأنهم بيحسوا إن جسمهم مبقاش مثالي زي ما كانوا متخيلين وكمان عقلهم بيبقى لسه مش مستوعب التغيرات دي  ومحتاج وقت علشان يجمع.

دكتور Allen Mikhail بيقترح شوية نصايح ليهم علشان تساعدهم يتقبلوا جسمهم وهي:-

1- أننا نبص على صورنا القديمة في رحلتنا لخسارة الوزن ونشوف الفرق الكبير ونفتكر أهدافنا من الرحلة دي ونفتخر بإننا حققناه.

2-حاوط نفسك بالإيجابية و خلي عندك مفكرة أكتب فيها كل الحاجات الإيجابية والأحداث اللي حصلت في حياتك وأنت ممتن ليها.

3- بص لنفسك بنظرة عميقة أكتر أنت إنسان عمل حاجات مهمة اوي في حياته وعنده مواهب واهتمامات وحياة أكبر من كونه مجرد شخص فقد وزنه.

4- جرّب تعمل أنشطة جديدة كان نفسك تعملها زمان وكنت فاكر إنك مش هتقدر تعملها بسبب وزنك. 

5- ألبس ستايلات جديدة تكون مناسبة أكتر لوزنك الجديد ودلع نفسك وغير تسريحة شعرك لأن الحاجات دي بتفرق في شكلنا.

ومع الوقت لما تحب نفسك وال support system اللي حواليك يدعموك هتتكيف مع شكل جسمك الجديد وتكون راضي عنه ومبسوط بيه لأنك عملت مجهود عظيم يستحق الفخر الاحتفاء بيه فخليك لطيف مع نفسك.

Related Articles

Back to top button