موعد متوقع لإصدار GTA 6 والشخصيات القادمة بلعبة Mortal Kombat 1 وأخبار تانية في الملخص الأسبوعي
مساء أو صباح على جيمرز جلوكال حسب وقت قراءتكم للموضوع ده، ده ملخص الأسبوع اللي بنتكلم فيه عن أهم الأخبار اللي حصلت خلال الأسبوع اللي فات في عالم الفيديو جيمز وما يخصه، نبدأ بأهم خبر وأهم لعبة أصلا منتظرة بقالها سنين، وهي لعبة GTA 6.
شركة Take-two قالت في بيان صحفي أصدرته مع تقرير أرباحها السنوي إنه هيتم إطلاق عدد من الألعاب في العالم المالي 2025 واللي بيبدأ أبريل 2024 وبيتوقعوا إنها هتحقق أكتر من 8 مليار دولار.
على الرغم من إن الشركة مذكرتش لعبة GTA 6 بشكل صحيح ولكن الناس توقعت ده، خصوصا إن لعبة GTA V لما نزلت، حققت في أول يوم ليها أكتر من 800 مليون دولار ولحد دلوقتي بتحقق أرباح بمليارات الدولارات.
واستكمالا للكلام عن شركة Take-two، في تقرير الأرباح قالوا إن GTA 5 كانت أكتر لعبة حققت نجاح للشركة مع إجمالي مبيعات للسلسلة وصلت لأكتر من 400 مليون.
في تسربيات بتقول إن لعبة Assassin’s Creed Mirage بتحتوي على قصة مدتها 15 ساعة لعب وطبعا في قصص وأحداث جانبية ممكن تخليها أطول من كدة.
كان في إشاعات في الفترة الأخيرة عن الشخصيات اللي هتتواجد في لعبة Mortal Kombat 1 وتم تأكيدها بعد تسريب متجر أمازون إيطاليا قائمة الشخصيات الإضافية في اللعبة وهما: Homelander و Peacemaker و Omni Man و Takeda و Quan Chi و Takeda
متجر ستيم أعلن عن إتاحة لعبة Metro Last Light Complete Edition بشكل مجاني لحد يوم 25 مايو الحالي، تقدروا تحتفظوا بيها للأبد من اللينك ده
وكمان متجر إيبك جيمز أعلن عن إتاحة لعبة Death Stranding ليوم 25 مايو الحالي، تقدروا تحتفظوا باللعبة بشكل مجاني من اللينك ده
