نظام لمكافحة الغش في Call of Duty وثلاثية GTA.. وأخبار تانية في الملخص الأسبوعي
الأسبوع ده كان في شوية أخبار حلوة متعلقة بالجيمز زي ثلاثية “GTA” والاعلان عن نظام لمكافحة الغش في ألعاب “Call of Duty” وأخبار تانية ولذلك خلونا نغطس في التفاصيل أكتر وأكتر.
– شركة “Rockstar Games” أعلنت بشكل رسمي عن ثلاثية “Grand Theft Auto: The Trilogy – The Definitive Edition” واللي هتضم 3 أجزاء من “GTA” زي “Grand Theft Auto 3” و “Vice City” و “San Andreas”.
الألعاب هيتم إصدارها على المنصات المنزلية زي “PS4” و “PS5” و “Xbox One” و “Xbox Series” و “Nintendo Switch” وكمان الكمبيوتر خلال العام الحالي، بالإضافة لنسخ للموبايل هتصدر خلال النص الأول من سنة 2022.
الثلاثية دي هيكون فيها تحسينات رسومية وعلى أسلوب اللعب.
فا تقريبا “Rockstar” عايزة تخلص من زن الناس على الجزء الجديد من GTA ولكن ممكن الثلاثية دي ترجعنا لأيام زمان لحد ما الجزء الجديد يتم إصداره من غير أي مشاكل لإننا مش عايزين نعيد تجربة “Cyberpunk 2077”.
– بعد معاناة لشهور، أخيرا شركة “Activision” أعلنت عن نظام “Ricochet” وهو نظام لمكافحة الغش في “Call of Duty” ومن المفترض إنه يتوفر مع إطلاق لعبة “Call of Duty: Vanguard” في شهر نوفمبر الجاي ولكن هو هيكون معانا برضه في “Warzone” اللي عانى منها لاعبين الكمبيوتر أكتر.
This is RICOCHET Anti-Cheat – a new anti-cheat system arriving on Day 1 of #Warzone’s Pacific Update later this year.
Stay tuned for more updates from #TeamRICOCHET in the following weeks. Learn more about our full anti-cheat plan: https://t.co/FvKpaS46DW pic.twitter.com/BHErfDSZ29
— Call of Duty (@CallofDuty) October 13, 2021
يسرنا أن نعلن بأن #GodofWar راڠـــنَـــروك قادمة لكم مدبلجة ومترجمة بالكامل للقوائم والنصوص.
تواصل PlayStation بدعم مجتمعها من خلال تعريب الألعاب الحصرية باللغة العربية، مما يتيح لك تجربة حماسية ومشوقة!
— بلايستيشن السعودية (@PlayStationSA) October 7, 2021
– حساب بلايستيشن السعودية أعلن على تويتر إن لعبة “God of War: Ragnarok” هيتم طرحها بترجمة ودبلجة عربية، وده خبر مهم خصوصا لمحبي اللعبة وكمان لجمهور الجيمرز العرب بشكل عام.
– شركة “EA” أعلنت إنها بتفكر تغيير اسم لعبة “FIFA” لـ “EA Sports FC”، وده بسبب بعض التقارير اللي بتقول إن في نزاع ما بين الإتحاد الدولي لكرة القدم “FIFA” وما بين شركة “EA” بخصوص تكلفة استخدام العلامة التجارية لفيفا.
فيفا عايزة تاخد من “EA” مليار دولار كل 4 سنين عشان تقدر الشركة تستخدم الاسم.
محدش عارف لسه الموضوع هيخلص على إيه ولكن في جميع الأحوال منعتقدش إن ده ممكن يأثر على شعبية اللعبة، متخوفيين شوية لإن تغيير الاسم ده بيعمل مشاكل، زي لعبة “eFootball 2022” اللي كان اسمها “PES”.
– أنباء متداولة عن إن شركة “Epic Games” عايزة تعمل فيلم عن لعبة “Fortnite” وده بيجي ضمن خطة الشركة للتوسع في الإنتاج بمجالات الترفيه.
لحد دلوقتي ده كلام ومفيش أي تصريح رسمي من الشركة ولكن زي ما إحنا عارفين، مفيش حاجة بتستخبى وكله هيوضح خلال الفترة الجاية.
