١٤ علامة إنك شخص سيء ولازم تاخد بالك

من المعروف إن الناس أنواع، وبيبانوا في ردود أفعالهم المختلفة على كل موقف وتصرف، زي مثلًا لما تحس إن فيه هجوم عليك، فيه ناس هتسأل نفسها “هو أنا شخص وحش؟” وناس تانية هتستمتع بده، وممكن تشوفه نوع من الاهتمام أو الغيرة اللي ناتجة عن تميزهم ونجاحهم!

عشان كده وعشان نحاول نحسم الجدل، جمعنا شوية علامات معناها إنك شخص وحش فعلًا ولازم تاخد بالك إنك مش شجرة مزهزهة بيقذفها الناس بالحجارة!

1- بتلوم الناس باستمرار ومش قادر تفتكر آخر مرة اتحطيت في موقف وكنت شايف نفسك غلطان فعلًا.

2- بتتكلم كتير على الناس من ورا ضهرهم، وممكن بسهولة تتساق لأحاديث سيئة أو تافهة عن أشخاص تانيين لمجرد إن عندك خلاف معاهم، ما بتعرفش تاخد موقف حاسم من حوار سلبي على حد من وراه ممكن يأذيه، وبتستمتع “بالحواديت” الجديدة على زمايلك في العمل أو في أي مجال آخر.

3- بتاخد من الناس طاقة واهتمام وخدمات أكتر ما بتديهم وبتقف جنبهم لما بيحتاجوك، فيه بعض الأوقات الواحد بيبقى محتاج ناس جنبه من غير طاقة للعطاء، لكن الموضوع بيكون خطر لو انت عندك باستمرار طلبات ما بتفكرش هتقدر تردها إزاي، ومش بيفرق معاك إنك ما تعرفش تعمل ده.

4- الناس بتختفي من حواليك، لو لقيت نفسك في يوم سعيد أو مناسبة زي عيد ميلادك ومفيش حد مهتم يتواجد معاك، فلازم تسأل نفسك فعلًا انت بتعمل إيه عشان ما يبقوش موجودين؟

5- حياتك سلسلة من الدراما الكتير، مش عشان بيحصل معاك حاجات وحشة، لا! عشان انت بتزدهر وبتسعد بالاهتمام اللي بيجي من وجود أزمة ومشاعر سلبية وبتهول الحكايات.. دراما كوين يعني!

6- على طول عايز تبقى صح، بيأثر فيك بشكل كبير وحقيقي إنك حد يطلعك غلطان في موقف أو ما ياخدش بوجهة نظرك.

7- بتحس بالسعادة والانتصار لما تحس إنك فعلاً ضايقت حد مش بتحبه أو إنه بيتكلم عنك وحش دلوقتي!

8- مقتنع إن دمك الخفيف ودعاباتك ما ينفعش تقف مهما كان الموقف درامي أو اللي قدامك بيتكلم جد.

9- ما بتحسش أبدًا بالذنب أو الندم.

10- عنصري بأي شكل من أشكال العنصرية، يعني بتفضل حد عشان لونه، شكله، دينه، جنسه.

11- متلاعب في الكلام وسعيد  بنفسك إنك كده.

12- بتتعامل بشكل سيء مع الحيوانات بمعنى إنك بتضرهم.

13- بتختار أصدقائك على أساس ممكن تستفاد منهم إزاي.

14- لما حد بيقولك سر بتبقى متشوق عشان تروح تحكيه لحد تاني.