إزاي تعرف إذا كان اللي قدامك بيكذب عليك ولا لا!

لما بتبدأ تشك في حد إنه بيكدب لو ماعكش أي دليل مادي ساعات بتلاقي نفسك بتخاف تواجهه بمشاعرك إنك حاسس إنه بيكدب أحسن تطلع بتظلمه أو يزعل منك عشان بتتهمه بده وهو ماكدبش.. بس للأسف الأبحاث بتقول إن 54% من الكدب ممكن يتم اكتشافه بدقة وإن الأشخاص الاجتماعيين بيميلوا للكدب أكتر من الانطوائيين.. ووفقًا لـ “فانيسا فان إدواردز” مؤلفة كتاب Captivate ومؤسسة موقع في Science of People قالت إن فيه 82% من الأكاذيب مابيتمش كشفها وقالت كمان وفقًا لاستطلاع عملته في 2022 إن الأمريكان بيكذبوا حوالي 4 مرات في اليوم، وفيه 53% من الناس بس بيقدروا يكتشفوا اللي قدامهم ده بيكدب ولا لا!

ويمكن في العصر اللي إحنا فيه دلوقتي إنك تصدق كدبة حد ده ممكن يكلفك كتير حتى كمان ماديًا.. وعشان كده تعالي نقولك على شوية خطوات تعرف بيها اللي قدامك بيكدب عليك ولا لا حسب ما قال موقع “forensics colleges” في أحد مقالاته:

 

1- إنه يغير أنماط الكلام:

من أكتر العلامات الواضحة اللي بتخليك تشك في اللي قدامك هو الكلام غير المنتظم، يعني صوت الشخص وسلوكياته في الكلام بيغتير لما بيكدب وده زي ما قال “جريج مكراري” وهو محلل جنائي متقاعد من مكتب التحقيقات الفيدرالي

وقال كمان إنه بيحدد طريقة الشخص وسلوكياته في الكلام عن طريق إنه بيسأله أسئلة عادية خالص زي اسمه إيه وعايش فين وده بيسمحله يشوف التغيرات في كلام الشخص لما بيسأله على حاجة تانية.

2- استخدام حركات غير متطابقة:

لو قال الشخص اه بس هز رأسه وقال لا فده بيدل إنه مابيقولش الحقيقة، وقالت الدكتورة “إلين هندريكسن” عالمة النفس السريري في مركز القلق والاضطرابات المرتبطة بجامعة بوسطن إن الحركات غير المتطابقة دي هي حركات في الجسم مش متفقة مع الكلام اللي بيقوله الشخص وحركاته دي هي الرواية الحقيقية، وقال مثال على كده لو قال شخص مثلا “طبعا هتعاون مع التحقيق” وهز رأسه شوية قليلة فده بيدل إن فيه احتمال أنه مايقولش الحقيقة كاملة.

3- مابيقولش كلام كفاية:

لما بيبقي فيه شهود وبيتسألوا عن اللي شافوه بسؤال “فيه أي حاجة تاني” بيقولوا تفاصيل أكتر لكن لما بتطلب من الشخص الكداب يقول حاجات أكتر وتفاصيل أكتر مابيقولش إلا تفاصيل قليلة أوي

ودول بيقول عليهم الباحثين في جمعية علم النفس الأمريكية (APA) إنهم أشخاص بيخدعوا اللي قدامهم عن طريقة إنهم بيغفلوه، وده عن طريق قلة وصف التفاصيل، وطبعا فيه طريقة تانية إنك تتأكد اللي قدامك بيكدب ولا لا إنك تطلب منه بشكل ما يحكي التفاصيل بالعكس وهتلاقي الشخص الكداب بيتلخبط وبيخلق قصص مختلفة.

4- الكلام كتير:

باحثين من جامعة هارفارد للأعمال قالوا إلى أن الكدابين بيبالعوا في استخدام الكلام، وممكن يضيف تفاصيل زيادة عشان يقنع نفسه أو الناس اللي بتسمعه باللي بيقوله، وممكن يستخدموا كلام اصلا في وصفهم مايقدرش الشخص اللي بيقول الحقيقة يقوله

وقالوا كمان في الدراسة دي إنهم بيستخدموا كلمات فيها ضمير الغائب كتير زي هي وهو وهم وبيبعدوا عن ضمير المتكلم خالص زي أنا وإحنا عشان يبعدوا نفسهم إنهم يتورطوا في أي حاجة.

5- انخفاض أو ارتفاع في طبقات الصوت بشكل مفاجئ:

في مقالة “APA” قال الدكتور “ديفيد ماتسوموتو” أستاذ علم النفس في جامعة ولاية سان فرانسيسكو والرئيس التنفيذي لشركة هومينتيل، وهي شركة استشارية بتدرب الناس على قراية المشاعر الإنسانية إنه لازم الناس تراعي ثقافة وبيئة الشخص لما تيجي تحدد هو بيكدب ولا لا، يعني مثلا اكتشف الباحثين إن الصينيين لما بيكدبوا بيعلوا صوتهم لكن الأسبانيين مثلا صوتهم بيكون أوطى.. فعشان كده الاختلافات الثقافية لازم تحطها في اعتبارك لما تراقب حد إذا كان بيكدب ولا لا.

6- حركة عينهم:

من المعتقدات المنتشرة في أمريكا مقلا إن الشخص لو مابصلكش في عينك فهو كده بيكدب لكن في ثقافات تانية فلو الشخص بصلك في عينك فهو كده شخص غير جدير بالثقة.

وكشفت دراسة اتنشرت في مجلة Plos One في سنة 2012 إن الناس لما بيبصوا شمال ويمين كتير بيبقوا بيكدبوا لكن فيه دراسة عملتها جامعة ميشيغان سنة 2015 اتنشرت في مجلة تايم إن 70% من الناس في 120 في فيديوهات إعلامية كدبوا مع ذلك حافظوا على التواصل البصري بشكل مباشر.

7- بيغطوا ايديهم أو عينهم:

فيه ناس كتير بتبقى عايزة تخبي كدبة أو تخبي رد فعلهم على الكدبة دي بيخبوا ايديهم أو عينهم وهما بيتكلموا وفيه ناس تانية بتغمض عينها خالص وهي بتكدب.

8- يبدأوا يعملوا حركات صغيرة لا إرادية بايديهم أو رجلهم:

فكر كده لما تسأل طفل صغير عن راحت فين أخر بسكوته فهيبدأ يعض شفايفه أو يمسك ايده أو يبص عليها أو يبص لضوافره بعد كده بيبدأ يخترع كدبة.. وده لإن استجابة القلق عندهم بتبقى بدأت والدم اتسحب من أطرافهم وكل الحركات دي بتدل على التوتر عشان هيكدبوا.

9- بيشاور بصباعة (مجازيًأ أو حرفيًا):

لما شخص يشاور على حد تاني أو يوجهله الاتهام سواء بالفعل أو بالكلام فدي بتكون رغبة منه إنه يبعد التركيز من عليه عشان الناس تلوم شخص تاني غيره.

10- لو الشخص قال إنه بيعرف يكدب كويس:

ودي طبعًا أسهل طريقة عشان تكتشف بيها شخص بيكدب وهي إنك تتعامل معاه وتشوفه وهو بيتعامل مع اللي حواليه ولو لقيته بيكدب كتير أو بيعرف نفسه وهو بيهزر كده إنه بيعرف يكدب وبيتفاخر بده فبسيطة وسهلة جدا اسمع كلامه وصدقه وبلاش تثق فيه.