كتير مننا اليومين دول بيسمع عن حد يعرفه جاتله جلطة وماكنش ملاحظ.. والموضوع بقى مالوش علاقة بالسن وشباب كتير بتحصل ليهم.. فدي شوية علامات جسمك بيقولها ليك لو لاحظتها هتساعدك تكتشف الجلطة بدري.

في البداية الجلطة هي تجمع دموي.. يعني الدم بيتحول من حالته السائلة لحالة صلبة وبتحصل داخل الأوعية الدموية فبتمنع تدفق الدم وممكن تتنقل من مكان لمكان جوه الجسم.. طب إيه الأعراض اللي لو حسيت بيها محتاج تاخد بالك وتستشير طبيب؟

تشنجات \ تورم في الساق

تشنجات الرجل والتقلصات والوجع في الرجل ممكن يكون دليل على وجود جلطة وغالبًا الوجع بيبدأ من السمانة

تغير لون الجلد

لون البشرة ممكن يتغير ويبقى أغمق أو أحمر وأوقات ده بيكون دليل على وجود جلطة في المكان ده

تغير حرارة الجسم

أوقات بيكون دليل على وجود الجلطة هو تغير درجة حرارة مكان الإصابة سواء بتعلى أو بتقل

كمان فيه أعراض تانية خاصة بالرئة زي:

ألم في الصدر بيزيد وقت التنفس
الشعور بالدوخة
تسارع ضربات القلب
كحة فيها دم

وأعراض الجلطة الدماغية وهي الأشهر بتكون:

تنميل في الوجه أو الذراع
صعوبة في الكلام
مشاكل مفاجئة في الرؤية

طب إيه طريقة التعامل الصح مع الجلطات؟

لو معاك حد وحس بأي حاجة من دول.. فمهم جدًا إنه يروح مستشفى في أسرع وقت وماتستناش تشوف هيحصل تحسن ولا لا.. وده لأن الوقت بيفرق جدًا في الحالات دي.. كمان خليك جنب الشخص وساعده في إنه مايبلعش لسانه وحاول تراقب وظائفه الحيوية زي التنفس.. لكن بيفضل أهم حاجة هي سرعة الذهاب لمستشفى.

طبعًا مش كل الأوقات الإحساس بالأعراض دي معناها وجود جلطة.. لكن خليك دايمًا فاكر ان انت تطمن حتى لو مفيش حاجة أحسن بكتير من إنك تطنش.