صلاح قعد دكة ماتشين ورا بعض في الدوري الإنجليزي.. يا ترى هو مشكلة ليفربول فعلًا؟

لأول مرة من صيف 2017 وقت ما صلاح انتقل لليفربول يبقى على الدكة في ماتشين ورا بعض بالدوري الإنجليزي.. الموضوع حصل قبل كده مع المدرب يورجن كلوب وغاب عن الفريق 3 مباريات لكن وقتها كان بسبب الإصابة مش لأسباب فنية وده بيخلينا نسأل.. هل فعلًا محمد صلاح هو المشكلة الأكبر حاليًا في ليفربول؟ 

“إذا كنت مكان أرني سلوت سأحاول أن أقوم بتغيير كبير في الفريق.. سأضع صلاح على دكة البدلاء لأنه لا يساعد الفريق دفاعيًا بشكل جيد”

التصريح ده كان البداية في القصة اللي بنعيشها حاليًا.. تصريح واين روني نجم مانشستر يونايتد المعتزل على BBC بس قبل ما نحاول نشوف هي المشكلة في صلاح ولا ليفربول كله اللي أصلًا عنده مشكلة.. هنحتاج نفهم شوية حاجات في سياق ليفربول والدوري الإنجليزي الموسم ده

الموسم اللي بعض الناس شايفة إنه أصلا مش بالمتعة اللي كان معروف بيها.. وده لأنك لو بصيت بنظرة أوسع على فرق الدوري الإنجليزي وأوروبا عمومًا هتلاقي إن كل الفرق الكبيرة تقريبًا عندها مشاكل مش قليلة خالص

إدارة ليفربول في الموسم ده قررت تستثمر حوالي 470 مليون دولار عشان تعمل صفقات تعزز بيها الفريق وبالفعل جابت لاعيبة كتير بمبالغ كبيرة أغلبهم في مركز نص الملعب وكمان باك يمين وشمال.. كل واحد من الأفضل في مركزه

وفي سياق آخر تكتيكي ليفربول وبعد صرف كل الفلوس دي في سبيل تطوير طريقة لعبه وزيادة وجود لاعيبة كويسة في تمرير واستلام الكرات تحت الضغط زي فيرتز مثلا وماك أليستر من قبله.. هنلاقي إن ليفربول السنة دي اعتمد بشكل واضح على لعب الكرات الطويلة المباشرة 

 وبالإحصائيات البسيطة مثلا هنلاقي إن نسبة الكرات الطويلة لليفربول من أول الموسم طبقا لموقع “Sofa Score” هي 46.3%‎ يعني نص تمريرات الفريق تقريبًا بتبقي كرات طويلة.. وده منطقيًا من وجهة نظر ناس كتير منافي للمنطق اللي تم التعاقد بيه مع الصفقات في الصيف

كمان فيه ناس كتيرة توقعت أن فوز الريدز بالدوري الموسم اللي فات كان ليه عامل مش قليل في زيادة الإنهيار حتى الآن في الموسم ده لأنه زود الضغط على الفريق  .. صلاح مثلاً قدر إنه ينهي الموسم اللي فات وهو هداف الدوري بـ 29 هدف وأكتر لاعب صنع أهداف بـ 18 هدف وبالتالي ده زود التوقعات الموسم ده من صلاح تحديداً وليفربول بشكل عام 

وفي الموسم اللي فات مع سلوت كان في شبه اعتماد على فكرة الكرات الطويلة برضه عادي من سلوت ولكن مع وجود حد زي أرنولد مثلًا كان له تأثير في دقة الكرات الطويلة دي وإزاي بتوصل في وجود المساحات اللي كانت متاحة لصلاح وجاكبو في مباريات كتيرة وطبعًا بالإضافة لفورمة ليفربول إجمالًا وصلاح تحديدًا اللي كانت أعلى من الموسم ده رقميًا

فهل شايف أن ليفربول فعلًا مشكلته هو صلاح؟ ولا المشاكل أكبر من كده بشوية؟