7 نصايح لو بتشتري أو بتفكر تشتري عربية مستعملة لأول مرة
في الوقت اللي أسعار العربيات بتقل فيه.. ويعني بقى فرصة شراء عربية أكبر.. وعشان دايمًا العربيات المستعملة ليها سوق.. سواء عشان الميزانية أو عشان أول مرة تسوق ومش عايز تبهدل عربية جديدة.. فدي شوية نصايح لو بتشتري أو بتفكر تشتري عربية مستعملة.
مبدأيًا كده قبل ما نبدأ النصائح.. الكلام ده مش للناس اللي بتدور على عربية معينة عشان بتحبها.. لكن ده للي عايز توصيلة ومش داخل على نوع معين.
- 99% من اللي هيبقى بيبيع ليك العربية هيقولك “فبريكا بره وجوه” و 90% منهم هتلاقي العربية مقلوبة وراشة كل حاجة فيها.. فماتاخدش كلام حد ثقة.. ولازم تكشف على العربية عند مركز ثقة.. ودول مفيش أكتر منهم
- فيه عربيات بيبقى شكلها حلو أو شركات معروفة وبتلاقيها رخيصة.. وبيبقى دايمًا الموديل ده أرخص من باقي الموديلات فيها.. ماتتبسطش أوي عشان غالبًا ده بيكون بسبب إن صيانتها غالية أو قطع غيارها مش موجودة.. فاسأل حد شغال فيها الأول عشان ماتجبهاش وتركب انت وهي مواصلات
- العربيات الأوروبي شكلها أحلى والمميزات اللي فيها أكتر.. بس الكوري والياباني اعتمادية أكتر وأي حد بيشتغل فيها.. فخليك عارف ده وانت بتشتري عشان ماتتفاجأش
- أي حد بيكتب في إعلان عربيته “ممنوعات” “تكييف تلاجة” “حالة شاذة” “استخدام طبيب” غالبًا العربية بتكون عاملة حادثة قبلها وده تاجر عايز يبيع بأعلى سعر
- لو قررت خلاص تشتزي نوع عربية معين.. اسأل حد معاه زيها عنها لو تعرف.. أو اسأل عن مكان شغال فيها ثقة عشان تعرف عيوبها وتبقى عامل حسابك عليها.. والكلام ده طبعًا مش للعربيات اللي أي حد بيشتغل فيها
- فيه ناس لما تعرف إنك هتشتري هتديك نصيحة بجد.. وفيه ناس تانية هتكرهك في كل العربيات ماعدا النوع اللي معاهم.. فرق بينهم وابعد عن النوع التاني عشان هيرفعلك الضغط
- لو خلاص قررت واشتريت.. ماتسمعش بقى للي هيقولك عيوب العربية عشان انت خلاص لبست.. فاتبسط بيها وأهي أحسن من مفيش
