لو كنت بتتفرج على مسلسل لا تُرد ولا تستبدل هتلاقي نفسك تلقائي بتتعاطف مع دينا الشربيني.. بس هل فكرت في “نادر” اللي بيعمل دوره صدقي صخر؟

نادر من الأول وهو بيحاول يحل المشكلة بس بطريقة مختلفة شوية.. كلم السكرتيرة تشوف متبرع وجابت حد فعلًا بس الموضوع ماكملش.. وفي وسط التدوير كان ليه آراء دايمًا متشافة إنه مش مهتم أو مش حاسس بمراته بس من الزاوية التانية هو كان بيحاول يفكر بمنطقية.. فهو ماكنش موافق على إن “دينا الشربيني” تدخل تدور على جروبات الفيسبوك ولما عملت كده راحت قابلت واحد مجرم.. والمرة اللي بعدها لما حس إن المتبرع نصاب.. كان عايز يوقف الموضوع لكن مراته أصرت إنهم يدوه الفلوس كاملة.. وفعلًا نصب عليهم.

وده يخلينا نسأل سؤال تاني.. هو لو صاحبك أو شريكك في مصيبة أو مريض أو في ظرف صعب.. بيبقى مطلوب منك بس تسانده في كل قرراته ولا المفروض تبقى المنطقي اللي مش بيوافقه على حاجات حتى لو ده هيطلعك إنك مش مهتم أو مش حاسس بيه\ا؟

الشخص المريض بمرض مزمن بيكون حاسس بتوتر وإنه مابقاش متحكم في حياته.. والتوتر لما بيزيد حاجة في المخ اسمها “الجهاز الحوفي” هي اللي بتكون مسيطرة وهي مسؤولة عن الاستجابات السلوكية والعاطفية المرتبطة بالبقاء وبيتم تهميش قشرة الفص الجبهي المسؤولة عن المهام المعرفية المعقدة زي التفكير المنطقي واتخاذ القرار فتلاقي دايمًا الشخص اندفاعي وبيتوتر بسرعة وممكن يتخانق كتير لأسباب عادية.. وده لأنه جسمه محطوط دايمًا في موقف البقاء.

عشان المريض دايمًا حاسس بتوتر وتهديد.. ده بيؤدي إنه يحس دايمًا إنه متهدد.. عشان كده هتلاقي إن أي حد بيديله نصيحة أو رأي غير اللي في دماغه.. ممكن أوي يعتبر ده تهديد ليه.. أو إنه محاولة سيطرة على حياته اللي هو أصلًا حاسس إنه مش مسيطر عليها بسبب المرض.

طيب نعمل إيه؟

أكيد مش الصح إننا نوافقه على أي حاجة خصوصًا لو هي حاجة هتأثر على صحته أو هتزود المشكلة.. بس لازم قبل ما نقول اقتراحات وآراء للشخص.. نكون حاطين نفسنا مكانه وفاهمين إيه اللي بيدور في دماغه وعشان كده لازم الأول يحس إنك مش جاي تاخد منه السيطرة أو إنك بتقلل من ألمه وده بيحصل بالكلام والأفعال.. بإنك تقوله مثلًا إنك لو مكانه هتكون بنفس الإحساس بس هتحب إن حد يفكر معاك.. وتطلب إذنه قبل ما تقول رأيك وتوضح بكل الأشكال إنك بتفكر معاه مش بتفرض عليه حاجة وإن القرار بتاعه في الآخر.

والحاجات دي مش بتحصل وقت ما انت رايح تقوله حاجة مختلفة وبس.. لكن مهم طول الوقت يكون حاسس بتعاطفك ومساندتك عشان مايحسش إنك بتقول كلمتين عشان تفرض رأيك.. ووقتها تقدروا تتناقشوا بشكل أحسن.. وخليك فاكر دايمًا إن الشخص اللي بيعاني دماغه بتشتغل بطريقة مختلفة.. عشان كده لازم تديله أعذار.