الدور الخفي للقائد محمد صلاح مع المنتخب في أمم إفريقيا

من أول يوم في معسكر منتخب مصر وأنت حاسس إن في حد ماسك الدنيا بهدوء حد مش لازم يكون دايما في الصورة ولا صاحب الهدف بس وجوده لوحده فارق محمد صلاح دخل أمم إفريقيا مش بس كنجم أو هداف لكن كقائد حقيقي جوه المعسكر واحد عارف امتى يتكلم وامتى يسيب الملعب هو اللي يتكلم.

حتى مع إن مستواه الفني كان أقل شوية قبل البطولة ورغم إنه سجل هدفين دور صلاح الحقيقي باين بعيد عن الكاميرات هدوء تركيز شحن معنوي وإحساس دايم إن المنتخب كله ماشي في سكة واحدة من أول يوم.. وصلاح حاضر بروح البطولة وعارف ينقل الثقة لزمايله ويعمل جو يخليك تحس إن المنتخب داخل ينافس مش بس يلعب ماتشات.

روح حلوة جدا نقلها صلاح لكل لاعيبة المنتخب وباينة من أول يوم وشوفنا إزاي الكل ملموم حواليه والمنتخب رجعله الروح اللي كانت غايبة من زمان.. ومن هنا تصريحات اللعيبة والصحفيين اللي عايشين جوه المعسكر بتكشف تفاصيل أكتر عن دور محمد صلاح الحقيقي جوه المنتخب دور ممكن يكون أهم من أي أرقام.

كلام قليل وثقة كبيرة
 

رغم إن البطولة دي مهمة جدا لصلاح وكان نفسه يكسبها وتدخل في إنجازاته شفنا إنه من أول يوم مبقاش ظاهر في المؤتمرات الصحفية.. ودايمًا تريزيجيه هو اللي كان بيطلع كقائد وصلاح متكلمش غير مرة واحدة بس بعد ماتش جنوب إفريقيا وأشاد بالمغرب والجمهور.

صلاح كان هادي جدا ومبعدش عن أي كلام بره البطولة ولا دخل في حسابات المنافسين وده ذكاء كبير لأنه نقل الهدوء لكل اللعيبة وده بان في الأداء والتأهل المبكر.. وده يفسر كلام حسام حسن قبل ماتش زيمبابوي لما قال إن معنويات صلاح في التدريبات عالية جدا وكأنه أول مرة ينضم للمنتخب.

دكتور نفساني

صلاح ليه دور مهم جدا في المعسكر وهو دور الداعم النفسي لكل لاعب وده باين في كلام اللعيبة.. وأحمد عيد لاعب المصري قال إن صلاح دايما بيكلم اللعيبة ويحفزهم وكلهم متفقين إنهم مينفعش يرجعوا من البطولة من غير تحقيق الهدف.

وكمان صلاح محسن اللي لبس شارة القيادة لأول مرة في ماتش أنجولا قال إن صلاح كلمه وشرح له يعني إيه تبقى قائد منتخب مصر وده كان شرف كبير له.

ومصطفى شوبير لخص كل حاجة لما قال بعد ماتش أنجولا إن محمد صلاح أسطورة حقيقية ودايما بيلهمنا جوه الملعب وبره كمان لاعب قادر يعمل أي حاجة ويتخطى كل التوقعات.

وشوبير قال كمان بس احلم وصلاح هيخلي الحلم حقيقة هو ألهم كل المصريين بمشواره وتاريخه واللي بيعمله يوم ورا يوم بيخلينا نحس بفخر كبير بوجوده معانا.. وأكد في الآخر إن قيمة صلاح أكبر من مجرد لاعب كورة ده بقى رمز للإصرار والنجاح لأي رياضي مصري 

الإيد اليمين لـ “العميد”

الصحفي محمود شوقي نائب رئيس تحرير مجلة الإذاعة والتلفزيون اللي موجود جوه معسكر المنتخب قال إن صلاح بيعمل أدوار كتير محدش شايفها وبيخلق حالة غايبة عن المنتخب من سنين.. قال إن في أوضة اجتماعات دايما وصلاح مش بيبطل يقعد مع اللعيبة سواء في وقت راحة أو لا وبيخفف الضغط عنهم وحاطط نفسه مسؤول عن أي حاجة تحصل.

وكمان بيتكلم مع أي لاعب جديد ويفهمه إزاي يتعامل مع بطولة كبيرة زي دي وعلاقته قوية جدا بحسام حسن لدرجة إن العميد بيعتبره جزء من الجهاز الفني وبيستشيره دايما وبيخليه حلقة وصل بينه وبين اللعيبة.

وهاني عبد الصبور رئيس تحرير القاهرة 24 قال إن صلاح بعد كل ماتش بيقعد مع اللعيبة يتكلم عن الإيجابيات والسلبيات وينقل لهم كلام الجهاز الفني عشان يبقوا أحسن في اللي جاي.

وكمان قال إن صلاح عمل لفتة جميلة لما وزع تيشرتات ليفربول على اللعيبة الجديدة وقال لهم إن أي لاعب في المنتخب لاعب كبير ويستحق المكان ده وده فرق جدا في معنوياتهم.

 
الروح الحلوة

ومع نهاية دور المجموعات كان صلاح شارك بعثة المنتخب بالكامل أجواء من الرفاهية شوية.. قعدوا اتفرجوا على ماتش السنغال وبنين في الجولة التالتة من دور المجموعات في معطم بأكادير وكمان اتغدوا وقضوا وقت مع بعض قبل ما نبدأ مرحلة الأدوار الإقصائية بداية من دور الـ16 وشارك كمان صلاح اللاعيبة في رحلاتهم بأكادير واتصوره ونزلوا صورهم على السوشيال ميديا.. ودي حاجة وضحت للناس إن صلاح “قائد” للمنتخب بره وجوه المعلب.