حاجات ممكن تخلي شكل منتخب مصر أحسن في كأس العالم

بعد خروج منتخب مصر من أمم إفريقيا الأخيرة في المغرب بالمركز الرابع وشكله كويس على الورق.. بدأت أسئلة كتير نسمعها في الشارع المصري بشكل عام.. خصوصًا إن التوقعات قبل البطولة ما كانتش عالية لكن في نفس الوقت الأداء كشف إن فيه حاجات محتاجة واقفة قبل كأس العالم اللي فاضل عليه حوالي 4 شهور في أمريكا وكندا والمكسيك.. السؤال دلوقتي.. إزاي منتخب مصر هيشارك بشكل أحسن ويبقى منتخب الناس تحسب له حساب؟ 

المدرب أولًا

ناس كتير شايفه إن الجهاز الفني هو أهم ملف واستمرار حسام حسن اتحسم خلاص.. لكن في آراء بتقول إن المرحلة الجاية محتاجة دعم أكبر جوه الجهاز نفسه خصوصًا بعناصر شابة عندها أفكار أحدث ونظرة مختلفة للكرة بشكل عام.

واللي بان في أمم إفريقيا إن المنتخب اعتمد كتير على الحلول الفردية ورد الفعل أكتر من إنه يفرض أسلوبه.. وده بيخلي أي غياب أو تراجع مستوى يأثر بسرعة.. عشان كده في ناس بتطالب بوجود مدرب مساعد على الأقل عنده رؤية معاصرة يساعد في بناء طريقة لعب واضحة.. حتى لو ده احتاج وقت وتجربة. 

تجديد الدم

زي ما بنقول بغلة الكورة كده “تجديد الدم” مهم جدًا في المنتخب لإن إحصائيًا منتخب مصر كان من أعلى المنتخبات في معدل الأعمار في البطولة وده فرق باين بدنيًا وفنيًا.. عشان كده رأي منتشر إن المرحلة الجاية لازم تشهد تقليل متوسط الأعمار مع الحفاظ على عنصر الخبرة.

كمان فيه كلام كتير عن توسيع دائرة الاختيار.. بدل ما نلف دايمًا حوالين نفس الأسماء.. وجود بدائل جاهزة بنفس المستوى بقى مهم جدًا.. خصوصًا في بطولة طويلة زي كأس العالم.

وفي مراكز زي حراسة المرمى اللي مفروض بقى نبني عليها الفترة الجاية والدفاع والوسط والهجوم برضه مهمين.. وفي آراء بتطالب بفتح الباب أكتر للتجربة والتجديد حتى لو هنبدأ نبص على المحترفين المصريين بره عاملين إزاي سواء صغيرين أو كبار.. وندي فرص حقيقية للاعبين الشباب والمحترفين اللي بيلعبوا باستمرار مع فرقهم.
 

مزدوجي الجنسية

ملف مزدوجي الجنسية والمحترفين برة مصر ناس كتير شايفاه لسه مش مستغل كويس.. أغلب منتخبات إفريقيا دلوقتي معتمدة على لاعيبة اتربت في مدارس كروية أوروبية.. وده فرق واضح في السرعة والتنظيم والانضباط.

وفي لاعيبة من أصول مصرية بتلعب في أوروبا وبتحتاج متابعة بدري وتواصل مستمر.. مش بس لما اللاعب يلمع.. الفكرة المطروحة إن وجود لجنة واضحة وقاعدة بيانات ممكن يفتح اختيارات أكتر ويزود المنافسة جوه المنتخب. 

الرسالة الأخيرة

تطوير منتخب مصر مش محتاج معجزة.. هو محتاج تخطيط وصبر وقرارات محسوبة.. أمم إفريقيا كانت جرس إنذار.. وكأس العالم فرصة حقيقية لإعادة ترتيب الصورة.. والآراء بتجمع إن البداية بدري.. والتجديد المتوازن.. وتوسيع قاعدة الاختيار.. ممكن يخلي مشاركة مصر في المونديال مش مجرد حضور وخلاص لكن مشاركة بشكل أقوى وشخصية أوضح

وفي الآخر برضه.. كل ده مطروح للنقاش.. ورأي الناس دايمًا هو الأساس في الحكم على اللي جاي.