أرقام قياسية في الميركاتو الشتوي.. فلوس بالمليارات وسيطرة إنجليزية
سوق الانتقالات الشتوية في يناير 2026 كان واحد من أكتر الفترات سخونة في تاريخ الكورة.. سواء عند الرجالة أو السيدات.. حركة كبيرة جدًا.. وأرقام بتأكد إن الميركاتو بقى صناعة تقيلة مش مجرد انتقالات لاعيبة رغم إن كان فيه آراء كتيرة مش شايفة إن الميركاتو المرة دي قوي.. بس لغة الأرقام هي دايمًا اللي بتتكلم.
رقم قياسي في عدد الصفقات
يناير 2026 شاف أعلى عدد انتقالات دولية في تاريخ الميركاتو الشتوي للرجالة.. أكتر من 5900 صفقة اتسجلت رسميًا.. وده رقم عمره ما حصل قبل كده في شهر يناير.. وزيادة أكتر من 3% عن الرقم القياسي اللي اتسجل السنة اللي فاتت.
ورغم الزحمة الكبيرة دي.. الإنفاق كان أقل شوية من يناير 2025.. الأندية صرفت حوالي 1.9 مليار دولار على رسوم الانتقالات الدولية.. بانخفاض يقرب من 18%.. لكن في نفس الوقت الرقم ده لسه أعلى بحوالي 20% مقارنة بيناير 2023.
إنجلترا في الصدارة للرجال
الأندية الإنجليزية تصدرت قائمة أكتر الأندية إنفاقًا في كرة القدم للرجال.. بإجمالي مصروفات عدّت 360 مليون دولار في يناير بس.. ودي قائمة أكتر خمس دول صرفًا “إنجلترا.. إيطاليا.. البرازيل.. ألمانيا.. وفرنسا”.
بس الأندية الفرنسية كانت أكتر أندية كسبت من بيع اللاعبين.. بأكتر من 215 مليون دولار رسوم انتقال.. وبعدها أندية إيطاليا.. البرازيل.. إنجلترا.. ثم إسبانيا.
حركة اللاعبين عالميًا
على مستوى استقبال اللاعبين.. البرازيل كانت الدولة الأولى عالميًا.. بعدها إسبانيا.. ثم الأرجنتين.. إنجلترا.. وأخيرًا البرتغال.. أما في تصدير اللاعبين.. الأرجنتين جات في الصدارة.. بعدها إنجلترا.. ثم البرازيل.. إسبانيا.. وأخيرًا الولايات المتحدة.. والأرقام دي بتأكد إن أمريكا الجنوبية لسه المصدر الأهم للمواهب.. وإن أوروبا هي السوق الأكبر للاستهلاك.
قفزة تاريخية بفلوس السيدات
كرة القدم النسائية كانت المفاجأة الكبيرة في يناير 2026.. ولأول مرة في التاريخ.. ورسوم الانتقالات الدولية تعدّي حاجز 10 ملايين دولار في ميركاتو شتوي.
والرقم ده يمثل زيادة أكتر من 85% عن الرقم القياسي اللي اتسجل في يناير 2025.. وبيعكس النمو السريع والاستثمار الحقيقي في اللعبة.
وعدد الصفقات وصل لأكتر من 420 انتقال دولي.. بانخفاض بسيط أقل من 6% عن السنة اللي فاتت.. لكن القيمة المالية كانت أعلى بفرق واضح.
سيطرة إنجليزية برضه للسيدات
وقبل الختام بقى لازم تبقى عارف إن كمان الأندية الإنجليزية ما سيطرتش بس على ميركاتو الرجالة.. لكنها كمان كانت الرقم واحد في كورة الستات.
وأكتر من 5 ملايين دولار اتصرفوا في انتقالات اللاعبات.. ومعهم أكبر عدد انتقالات واردة.. وده بيأكد إن الاستثمار في الكورة النسائية بقى جزء أساسي من خطط الأندية الكبيرة.
