كتب: فرح عادل

من وإحنا صغيرين وأهلنا والمدرسين في المدرسة وحتى الشيوخ اللي حفظونا القرآن زمان.. كانوا بيحكولنا عن قد إيه الإسلام والرسل عدوا بأوقات صعبة كتير عشان يوصلنا الدين زي ما وصلنا دلوقتي.

ولو قعدنا نتكلم عن تاريخنا الإسلامي هنلاقيه مليان حكاوي وانتصارات وعبر بتعلمنا حاجات كتير أوي.. بس المرة دي هنتكلم عن تاريخ 17 رمضان.. وغزوة بدر

بين كل المعارك اللي الإسلام عدى بيها.. فيه معركة بالذات نقدر نقول عليها المعركة اللي “بنتبارك  بيها”.. لدرجة إن الفريق سعد الدين الشاذلي في حرب 73 بعد ما حط خطة العبور للقناة غير إسم الحرب وسماها “بدر” قبل طبعًا ما تبقى حرب أكتوبر… تيمنًا بغزوة بدر الكبرى.

ومش هتكلم طبعًا عن إن فيه مساحة 18.5 ألف فدان وعدد 140 ألف إنسان عايشين في مدينة “بدر”.. والناس اللي مسمين عيالهم “بدر”.. وغيره وغيره.

بس ليه؟ اشمعنى غزوة بدر؟ ليه مانسميش مدينة “أُحُد” مثلًا؟

• أول انتصار كبير للمسلمين

غزوة بدر كانت أول معركة كبيرة بين المسلمين وكفار قريش وخلصت بانتصار المسلمين حتى وهم عددهم أقل بكتير… المسلمين وقتها كانوا حوالي 313 مقاتل بس وبإمكانيات قليلة جدًا.. في الوقت اللي كان فيه جيش قريش حوالي ألف مقاتل وبإمكانيات أعلى.

مش بتفكرك بحاجة؟.. حرب أكتوبر 73 .. عشان كده اختيار الإسم وقتها مجاش من فراغ.

• يوم الفرقان

غزوة بدر اتسمت بيوم الفرقان لأنها كانت نقطة فاصلة “فارقة” بين مرحلة الضعف والاضطهاد للمسلمين قبلها وبين انتصارهم وعزتهم وهيبتهم بعدها.. وكأن بعد “بدر” بقى معروف مين الأقوى دلوقتي في الجزيرة العربية.

• المدد الإلهي

المنطق بيقول 1 + 1 بيساوي 2.. بس في غزوة بدر كان فيه يقين بين المسلمين إنهم هينتصروا حتى لو كل الأسباب بتقول غير كده.. بس عقيدتهم وقوة إيمانهم  ويقينهم بالله بيقولوا كده.. وده اللي خلاهم ينتصروا فعلًا حتى وهما معاهم أقل القليل.

غزوة بدر جواها دروس كتير أوي.. لو بصيت لها في أي جانب من جوانب حياتك هتلاقيها بتعلمك حاجة.. بدايةً من اليقين بالله وحسن الظن بيه وإحساسك دايمًا إنه ربنا معاك وهيساعدك.. لحد إن مش دايمًا الكترة بتغلب الشجاعة ولا حاجة يعني.