مين هيثم حسن اللي ممكن يبقى خليفة صلاح مع مصر؟

منتخب مصر بقيادة حسام حسن المدير الفني ضم أسم ووجه جديد لقائمة المنتخب اللي هتلاعب السعودية وإسبانيا في التوقف الدولي الجاي ضمن استعدادات الفراعنة لكأس العالم 2026 في أمريكا وهو هيثم حسن لاعب ريال أوفييدو الإسباني واللي بيشارك في الليجا الإسبانية مع فريقه الموسم ده.

وبعد كلام كتير عن تمثيله للمنتخب اللي عايز يلعب ليه فرنسا ولا تونس ولا مصر.. اختار هيثم موطنه مصر عشان يبدأ مشواره مع الفراعنة من المباريات الدولة الجاية.

النشأة

اتولد هيثم حسن يوم 8 فبراير 2002 في بلدة باجنوليه.. اللي موجودة في الضواحي الشرقية للعاصمة الفرنسية باريس لأب مصري وأم تونسية وده اللي خلاه من بدري جدًا عنده أكتر من اختيار على مستوى المنتخبات.

بدأ هيثم مشواره الكروي مع نادي باريس إف سي لكن ما طولش هناك لأنه مشي من النادي بعد هبوطه للدرجة الأدنى.. ووقتها قرر يبدأ خطوة جديدة وانتقل لنادي شاتورو سنة 2017 علشان يلعب مع فريق تحت 19 سنة.

سرعان ما لفت الأنظار، وده خلاه يوقّع أول عقد احترافي في حياته يوم 1 يونيو 2018 وهو لسه عنده 16 سنة بس ودي كانت خطوة كبيرة جدًا في بداية مشواره.

ومع بداية موسم 2018-2019 بدأ يشارك مع الفريق الثاني لشاتورو وفي نفس الوقت أخد فرصته مع الفريق الأول وده حصل لأول مرة يوم 19 أكتوبر 2018 لما نزل بديل في مباراة قدام باريس إف سي في دوري الدرجة الثانية الفرنسي.

في أول موسم ليه، شارك هيثم في 5 مباريات (4 في الدوري ومباراة في كأس فرنسا) ونجح يصنع هدف وده كان كفاية إنه يخلي أندية كتير تبدأ تراقبه وتهتم بيه.

وفي الموسم اللي بعده زادت مشاركاته ووصلت لـ16 مباراة وقدر يصنع هدفين وبدأ يثبت نفسه أكتر كلاعب واعد.

الليجا

في صيف 2020 أخد خطوة كبيرة جدًا في مشواره لما انتقل لنادي فياريال الإسباني مقابل حوالي 2 مليون يورو ووقّع عقد لمدة 4 سنين مع الفريق المعروف باسم “الغواصات الصفراء”.

في البداية لعب مع الفريق الثاني لفياريال اللي كان بينافس في دوري الدرجة الثالثة الإسباني وشارك في موسمه الأول في 24 مباراة، سجل فيهم هدفين وصنع هدف.

بعد كده، وفي صيف 2021، خرج إعارة لنادي ميرانديس اللي بيلعب في دوري الدرجة الثانية الإسباني، ودي كانت تجربة مهمة جدًا ليه، لأنه لعب 38 مباراة، سجل 3 أهداف وصنع 6، وده ساعده يكتسب خبرة كبيرة.

وفي موسم 2023 شارك مع الفريق الثاني لفياريال في دوري الدرجة الثانية، ولعب 29 مباراة ونجح يصنع هدف، وكمان تم تصعيده للفريق الأول، وشارك في الدوري الإسباني “الليجا” وظهر كبديل في مباراتين قدام ريال مايوركا وسيلتا فيجو.

ووقّع عقد احترافي مع نادي ريال أوفيدو الإسباني في أغسطس 2024 والعقد بيستمر لحد يونيو 2027، عشان يصعد معاه الموسم الحالي للدوري الإسباني ويظهر بشكل جيد.

وعلى مستوى المشاركات الدولية هيثم حسن بدأ مشواره مع منتخبات فرنسا من بدري وانضم لمنتخب فرنسا تحت 17 سنة وشارك معاهم في كأس العالم للشباب 2019 اللي اتلعبت في البرازيل.

اللاعب كان جزء مهم من مشوار منتخب “الديوك” في البطولة وساهم في وصولهم للدور نصف النهائي قبل ما ينهوا البطولة في المركز الرابع.

وقدر هيثم يسيب بصمته كمان لما صنع هدف لمنتخب فرنسا في مباراة ربع النهائي قدام إسبانيا واللي انتهت بفوز كبير لفرنسا بنتيجة 6-1 ودي كانت من أقوى مباريات المنتخب في البطولة وقتها.

ليه حديث الجمهور؟

اللاعب بقى حديث الصحافة والجمهور المصري لأن في موسم 2025–2026 منتخب مصر بقي مهتم بضمّه للمنتخب الوطني الأول استعدادًا لمونديال كأس العالم 2026 الجهاز الفني بقيادة حسام حسن قرر إنه يضيف اسمه لقائمة اللاعبين اللي هيشاركوا في المعسكر الدولي الجاي وده بعد متابعة مستمرة منذ شهور بين اتحاد الكرة وممثلي اللاعب.

الموضوع مكانش سهل من البداية لأن هيثم كان لسه بيفكر في مستقبله الدولي وكان لسه ما حسمش قرار تمثيل مصر نهائيًا في وقت سابق وده كان بسبب علاقته بمنتخبات فرنسا اللي مثلها في الفئات السنية.

لكن التواصل اتطور بينه وبين المسؤولين المصريين وكلّ اللاعبين اللي بيشتغلوا في ملف الانضمام أكدوا إن هيثم فاهم أهمية اللعب مع منتخب مصر ومستعد لل قرار ده في أقرب فرصة خصوصًا مع اقتراب استحقاقات مهمة زي كأس الأمم الجاية وكأس العالم.

كما هيثم حسن الكل شبه بمحمد صلاح وقريب من طريقة لعبه وكمان عشان أشول والناس شايفاه انه يقدر يكون خليفة صلاح في المكان دة في مصر السنين الجاية خاصة أن مفيش لاعب أشول جه في مصر بالمكان دة واقنع الكل.