ماشي يحب على نفسه؟ ابنك عنده إيموفيليا يا حاج!
لو ليك صاحب بيحب بسرعة وبيعيش قصة حب كاملة في أسبوعين
وتلاقيه خارج منها مكسور وكأنها كانت جوازة عشر سنين يبقى إحنا مش قدام شاب رومانسي إحنا قدام حالة اسمها “إيموفيليا”
يعني إيه إيموفيليا؟
الإيموفيليا هي إنك تقع في الحب بسرعة وبشكل متكرر من غير ما تاخد وقت كفاية تفهم الشخص اللي قدامك.. مش مجرد إعجاب سريع لكن تعلق عاطفي قوي بيحصل بدري جدًا وده قبل ما العلاقة يبقى لها أساس حقيقي
المشكلة هنا مش إنك تقع في الحب لكن إن ده بيحصل بسرعة وبدون أساس وساعتها احتمال كبير تكون بتدور على الإحساس نفسه
وعشان نسهل الموضوع عليك.. دي شوية أعراض هتلاقيها عند الشخص اللي عنده إيموفيليا:
- أول ما تقابل حد تحس إنه “هو ده” وهو ولا يعرفك أصلًا
- تتعلق بسرعة غريبة قبل ما تفهمه أصلًا
- يبقى في حاجات واضحة زي اللمبة الليد إنها مش مريحة وتتجاهلها
- يبقى فيه تصرفات غلط تبررلها “أصله كويس من جواه”
- تبني صورة مثالية في دماغك وتصدقها يعني مش بتشوف الشخص.. لكن بتشوف نسخة اخترعتها عنه
طب هي المشكلة فين؟
مش إنك بتحب بزيادة ماعادي حب واتبسط بس المشكلة إنك بتستعجل الإحساس.. وبتاخد قرار كبير بناءً على إحساس صغير مالحقتش تتأكد منه وده بيخليك تدخل علاقات قبل ما تفهمها وتفضل فيها أكتر من اللازم أو تخرج منها مكسور ومش فاهم كل ده كان ليه!
ليه ده بيحصل أصلًا؟
هو مفيش سبب واحد واضح بس في شوية احتمالات.. زي إن دماغك مدمنة لإحساس البداية أو بتحب شعور إنك “مهم لحد”
أو مش مرتاح لوحدك فبتجري على أول فرصة
وفيه تفسير علمي بيقول إن المواد اللي بيفرزها المخ زي الدوبامين في بداية كل إحساس بالحب بتدعم عندك شعور حلو بيخليك تدمنه وتدور عليه كل شوية.. فانت بتجري ورا الدوبامين مش ورا الشخص نفسه
الخطر بقى إن وانت مستعجل على الحب ممكن تقع في حد مش سالك بيعرف يستغل ده كويس أو حد أناني أو نرجسي.. مرعبين الناس دي خلي بالك.
وغالبًا العلاقات بيبقى شكلها واحد من الاتنين
- علاقة سريعة وتخلص أسرع.. الإحساس يطلع بسرعة ويختفي بسرعة
- علاقة طولت غصب عنك.. دخلت فيها بسرعة ومش عارف تخرج
وفي الحالتين مفيش عمق حقيقي ولا في فهم بس في إحساس عالي في الأول وخازوق جامد في الآخر
طب تعمل إيه؟
- مش هنقولك اقفل قلبك لاسمح الله بس ياسيدي على الأقل هدّي الإحساس اللي ييجي بسرعة خليه يفرمل شوية
- عيش لوحدك شوية حتى لو ده صعب بس دي خطوة كبيرة وهتفرق معاك
- ولو دخلت علاقة أو حسيت بحب لحد جرب كده تسأل نفسك: أنا بحب إيه فيه فعلًا؟ ولا أنا لا بحبه ولا نيلة بس بحب إحساسي معاه؟
- ماتديش مشاعر كبيرة لحد لسه ما أثبتش نفسه بلاش الدلقة اللي بتجيب أجلك كل مرة دي
- بس بجد بقى لو حاسس إن الموضوع متكرر وبيتعبك
الكلام مع متخصص ممكن يوفّر عليك سنين لف في نفس الدايرة
وفي النهاية محتاج تدرك إن مش كل مرة قلبك يدق يبقى حب وساعات أخطر حاجة مش إنك تحب حد غلط أخطر حاجة إنك تصدق وهم الحب فتظلم نفسك وتظلم اللي معاك
