ليه الريال ممكن يكون محتاج مورينيو؟!

الكلام عن رجوع جوزيه مورينيو لمدريد مابقاش مجرد إشاعة لكن واقع أشبه بأنه يبقى رسمي خلال ساعات بعد توصل النادي لاتفاق مع المدرب عشان يرجع تاني للريال بعد 16 سنة خصوصًا بعد الفترة السيئة اللي بيعيشها ريال مدريد فنيًا أو في أوضة اللبس

إدارة الريال شايفة النادي محتاج شخصية قوية ترجع السيطرة من جديد ومدرب يلم النجوم حوالين هدف واحد بعد فترة الفريق فيها بقى تايه من غير هوية واضحة وعشان كده اسم مورينيو بدأ يرجع بقوة لأن ببساطة الراجل ده بيعرف يتعامل مع الفوضى أكتر من أي مدرب تاني

• طب ليه الريال محتاج مورينيو؟

1- مورينيو هيحل أكبر أزمة في ريال مدريد

أكبر مشكلة عند الريال دلوقتي مش بس في الملعب لكن جوه الفريق نفسه.. في السنين الأخيرة النادي بقى مليان نجوم كبار زي مبابي.. فينيسيوس.. بيلينجهام ورودريجو لكن رغم كده الفريق ساعات كتير كان شكله مفكك وكل لاعب بيلعب بعقلية مختلفة

فيه كلام كتير من الصحافة الإسبانية عن وجود توتر بين بعض اللاعبين وحالة عدم استقرار جوه أوضة اللبس وده ظهر بوضوح جدًا في المباريات الكبيرة لما الفريق كان بيتوتر بسرعة ويفقد السيطرة وظهر بشكل أكبر السنة دي لما الموضوع اتطور واللاعيبة “ضربت” بعض في أوضة اللبس

هنا بقى تيجي قيمة مورينيو البرتغالي طول عمره معروف إنه مدرب بيعرف يسيطر على النجوم مهما كانت أحجامهم.. وقت ولايته الأولى مع ريال مدريد كان عنده أوضة لبس مليانة شخصيات ضخمة جدًا زي رونالدو.. راموس.. كاسياس وتشابي ألونسو ورغم كل الصدامات اللي حصلت وقتها لكن الفريق كان عنده شخصية واضحة جدًا مفيش لاعب أكبر من الفريق ودي حاجة ريال مدريد محتاجها جدًا دلوقتي

2- ريال مدريد فقد هويته 

من ساعة ما زيدان مشي ريال مدريد دخل في دوامة كل شوية مشروع جديد وكل مدرب بييجي بفكرة مختلفة لكن في الآخر الفريق مالوش شكل ثابت.. مرة تلاقي الفريق هجومي زيادة عن اللزوم وبيسيب مساحات ضخمة ومرة تلاقيه بيعتمد بس على مهارات فردية من فينيسيوس أو مبابي ومباريات كتير كان واضح إن مفيش شخصية حقيقية جوه الملعب

الجمهور نفسه بقى مش فاهم الفريق بيلعب إيه ودي أكتر نقطة ممكن مورينيو يصلحها حتى الناس اللي مبتحبش طريقته تعترف إن فرقته دايمًا ليها شخصية وهوية.. أي فريق بيدربه بيكون منظم.. شرس وعارف هو بيلعب إزاي والريال دلوقتي محتاج يرجع يبقى فريق “مرعب” نفسيًا للمنافسين مش مجرد مجموعة نجوم

3- مورينيو هيخلي ريال مدريد أقوى دفاعيًا

واحدة من أكتر الحاجات اللي انهارت في ريال مدريد مؤخرًا هي المنظومة الدفاعية..الفريق بقى يستقبل أهداف بسهولة جدًا وأي فريق بيعرف يضربه في التحولات أو الكرات الثابتة وكأن ريال مدريد فقد الشخصية الدفاعية اللي كانت عنده زمان

ومورينيو تحديدًا من أفضل المدربين في الحتة دي.. ناس كتير بتفتكر إن فرق مورينيو دفاعية بس لكن الحقيقة إن ريال مدريد معاه زمان كان متوازن بشكل مرعب وقتها كان بيدافع كويس جدًا وفي نفس الوقت مرعب هجوميًا

كفاية نفتكر موسم الـ100 نقطة لما ريال مدريد كان ماكينة أهداف لكن في نفس الوقت عنده تنظيم دفاعي قوي جدًا.. مورينيو بيعرف ينظم الفريق من غير كرة وبيعرف يقفل المساحات والأهم إنه بيخلي كل لاعب عارف دوره بالضبط

وده اللي ريال مدريد فقده بقاله سنين كمان وجود مدرب بالشخصية دي ممكن يرجع أفضل نسخة من مدافعين زي إيدير ميليتاو وأنطونيو روديجر لأن مورينيو طول عمره بيعرف يطلع أفضل ما عند المدافعين نفسيًا وتكتيكيًا

4- هيرجع شخصية “البطل”

ريال مدريد دايمًا محتاج مدرب عنده شخصية قوية لأن ضغط النادي مش سهل على أي حد ودة شفناه مع كل مدرب مر على مورينيو في الفترة دي ومورينيو من نوعية المدربين اللي بتعشق الضغط.

الراجل مش بيخاف من الإعلام ولا من جماهير سانتياجو برنابيو بالعكس كل ما الضغط يزيد بيطلع أفضل نسخة عنده وده شيء ريال مدريد افتقده مؤخرًا.

الفريق في مباريات كتير كبيرة كان بيقع نفسيًا أول ما الأمور تمشي ضده لكن فرق مورينيو دايمًا عندها عقلية الحرب حتى لما مستواه الفني بيتراجع تفضل عنده قدرة رهيبة إنه يخلي لاعبيه يقاتلوا لآخر ثانية

5- الليجا نفسها محتاجة مورينيو

رجوع مورينيو مش هيبقى مكسب لريال مدريد بس لكن للدوري الإسباني كله.. الليجا خسرت جزء كبير جدًا من بريقها بعد رحيل كريستيانو رونالدو وليونيل ميسي وحتى الحروب الإعلامية اللي كانت موجودة زمان اختفت

رجوع مورينيو هيعيد الجنون ده تاني.. أي مؤتمر صحفي ليه بيتحول لتريند وأي رد فعل على الخط بياخد ملايين المشاهدات وتصريحاته دايمًا بتخلق حالة جدل رهيبة وده شيء الدوري الإسباني محتاجه جدًا دلوقتي.. الناس مش بتتابع مورينيو عشان الكرة بس لكن عشان الشخصية والعصبية واللقطات والحروب النفسية اللي بيعملها قبل المباريات الكبيرة.. فـ وجوده هيزود المتابعة العالمية لـ الليجا شويتين

ممكن ناس تختلف هل مورينيو لسه قادر ينجح في 2026 ولا لأ لكن اللي واضح إن ريال مدريد محتاج شخصية زيه جدًا في الوقت الحالي.. النادي محتاج مدرب يرجع الانضباط ويوقف الفوضى ويخلي الفريق عنده هوية واضحة من جديد

ومهما اتغيرت كرة القدم يفضل جوزيه مورينيو واحد من آخر المدربين اللي يقدروا يدخلوا نادي في أزمة ويحولوه لفريق عنده شخصية وهيبة وعشان كده فكرة رجوعه لريال مدريد دلوقتي تبدو منطقية أكتر من أي وقت فات.