ليه أول عشر أيام من شهر “ذي الحجة” أعظم أيام السنة كلها.. ونستغلهم إزاي؟
فيه أوقات كتيرة ربنا بيميزها عن الباقي.. سواء عشان الدعاء فيها مستجاب أو عشان نتعلم منها حاجة.. أو حتى كطريقة من الطرق اللي نكسب بيها شوية حسنات ينفعونا.
بس نيجي عند ذي الحجة ولينا وقفة بقى.. لأن في الآية التانية من سورة الفجر ربنا قال: وَلَيَالٍ عَشْرٍ.. تخيل كده لما ربنا يحلف بحاجة.. هتكون عظيمة إزاي؟
وفي حديث ابن عمر: “ما من أيام أعظم عند الله ولا أحب إليه من العمل فيهن من هذه العشر.. فأكثروا فيهن من التهليل والتكبير والتحميد”
ليه فضلهم كبير؟
- أول حاجة مهم نعرفها عن عشر ذي الحجة وهي إنهم أخدوا المكانة والمنزلة دي كلها عشان اجتمع فيهم “أمهات العبادات”.. صلاة وصيام وصدقة وحج.. وده مش موجود في أيام تانية مجتمعة.
- يوم عرفة.. وده يوم مغفرة الذنوب كلها.. ربنا بيعتق فيه عباده من النار وصيامه بيكفر سنتين كاملين.
غير كمان إن الصحابة كانوا بيجهزوا دعواتهم لليوم ده مخصوص ويقعدوا يدعوا طول اليوم.. وكانوا بيقولوا إن مابتعديش السنة وبيجي يوم وقفة عرفات اللي بعده إلا والحاجة اللي دعوا بيها اتحققت.
- أعظم الأيام.. وفي وسط عشر ذي الحجة بيجي أول يوم العيد اللي بنضحى فيه وده بيتسمى “يوم النحر” اللي يعتبر أعظم الأيام عند ربنا.. وبيجي بعده تاني أعظم يوم.. وهو “يوم القر” وبيوافق يوم 11 من شهر ذي الحجة.. واتسمى كده لأن الحجاج بيكونوا خلصوا طواف الإفاضة والنحر وبيروحوا يستقروا ويرتاحوا في مشعر منى.
- شهادة النبي.. شهد النبي صلى الله عليه وسلم أنها أعظم أيام الدنيا.. وإن العمل الصالح فيها أفضل منه في غيرها وأفضل حتى من الجهاد في سبيل الله.. فعشان هم كام يوم وهيعدوا بسرعة حاول تستغلهم صح.
طب نعمل إيه؟
الأعمال الصالحة كتير.. وبتشمل أي وكل عمل ربنا بيحبه.. بس لو انت مشغول في شغلك أو بتذاكر عشان دخلة الإمتحانات حاول تعمل الكام حاجة دول:
1. خطط وقت ولو بسيط للعبادة.. نص ساعة قراءة قرآن مش هيأزموك في يومك وهتحس إنك عملت حاجة كبيرة.
2. وانت نازل أو راجع من أي حتة حاول تسيب الموبايل شوية وتمسك السبحة أو حتة قول أذكار الصباح وانت نازل الصبح وأذكار المساء في آخر يومك وانت مروح.. على ما تخلصهم هتبقى وصلت وتبقى عملت عبادة من غير ما تاخد بالك أهو.
3. ولو بترجع بليل مهدود خالص يبقى أحسن حل هنا سماعتك الجميلة وشغل سورة من الشيخ اللي بتحبه.
4. ممكن كمان آخر كل يوم قبل ما تنام حاول تتوضى وتصلي ركعتين زيادة.. مش هياخدوا عشر دقائق منك.
5. لو تقدر تصوم الأيام دي يبقى ياريت.. وممكن تسهل على نفسك بإنك تشجع صاحبك أو زمايل الشغل أو حد من أهلك في البيت إنه يصوم معاك.
6. وطبعا مش محتاجين نقولك.. بس بنفكرك حاول تردد التلبية.
وأخيرًا افتكر إن الأيام دي بيعدوا هوا.. فماتستهونش بأي ذكر أو دعوة.. يمكن تيجي السنة الجاية عليك وتلاقيها اتحققت.. وطبعًا أهم حاجة بس ماتبقاش تنسى تدعيلنا دعوتين حلوين معاك بقى.
