كأس العالم اتسرق يا رجالة.. اعرف إيه الحكاية!

من فترة بدأت الناس تتكلم عن إن كأس العالم اللي موجود دلوقتي ده مش الكأس الحقيقي.. وإنه حاجة كده بس نفس الشكل وخلاص.. ولو بتقول في سرك مين الناس اللي بتتكلم دول أنا ماقولتش حاجة.. هقولك اصبر بس خلينا نسأل الأسئلة المهمة.. هو كأس العالم اللي نعرفه ده هو الحقيقي ولا اتبدل؟

الكأس الأول

لو رجعنا سنة 1930.. في أول بطولة كأس عالم في الدنيا اللي اتلعبت في الأوروجواي.. هنلاقي إن شكل كأس العالم أصلًا ماكنش هو بتاع دلوقتي.

النسخة الأولى من الكأس اتسمت باسم “كأس النصر”.. وبعدها بشوية بقت “كأس جول ريميه”.. وده الرئيس الأول للاتحاد الفرنسي لكرة القدم.. واللي بقى رئيس الاتحاد الدولي كله بعد كده.

و”ريميه” يعتبر هو رئيس الفيفا الوحيد اللي فضل في الخدمة حوالي 33 سنة.. من أول سنة 1921 لـ 1954.. فأقل واجب نسمي الكأس باسمه يعني!

كأس ريميه كان معمول من الفضة ومطلي بالدهب والقاعدة بتاعته كانت من الرخام الأبيض قبل ما تتبدل سنة 1958 وتبقى لازورد أزرق.

وده اللي صممه النحات الفرنسي “أبيل لافلور” وخلاه قريب من شكل أيقونة النصر عند اليونانيين وساب حتة كده صغيرة يتكتب فيها اسم المنتخب اللي هيفوز بالبطولة.

الحرب العالمية وكأس العالم؟ الاتنين؟

في الحرب العالمية الثانية ماكنش فيه بطولات كأس عالم شغالة.. أصل إحنا في إيه ولا في إيه يعني.

بس قبلها بسنة كان منتخب إيطاليا هو بطل كأس العالم لسنة 1938.. وده تاني مرة ياخد فيها البطولة.. وفي وسط “معمعة” الحرب.. كان “أوتورينو باراسي” المسؤول بالاتحاد الإيطالي لكرة القدم خايف إن الكأس يتسرق أو يضيع.. فسحب الكأس من البنك اللي كان موجود فيه وقتها في روما وخباه جوه علبة الجزمة بتاعته تحت السرير في بيته.

والحقيقة إن اللي كان خايف منه حصل والألمان راحوا يفتشوا في بيته لكن ماجاش في بالهم إنه ممكن يكون مستخبي في علبة جزمة!

 وبعد ما خلصت الحرب العالمية التانية جه عمنا “أوتورينو” رجع الكأس تاني عشان يبدأوا في تجهيزات البطولة الجديدة سنة 1950.

الكأس اتسرق!

بعد ما عدت شوية سنين كمان.. وقبل 7 شهور من النسخة الثامنة لكأس العالم اللي اتعملت في إنجلترا سنة 1966.. الكأس اتسرق!

الكأس وقتها كان معروض في جامعة كرة القدم الإنجليزية وتحت حراسة أمنية مشددة.. بس والحراس بيلفوا حوالين المبنى لاحظوا إن الشبابيك مكسورة والباب الخلفي مفتوح.. فقالوا خير يا رجالة هو الجو حر ولا إيه؟

ولما دخلوا اتفاجأوا  بإن الكأس مش موجود.

لكن تاني يوم المفاجأة اللي بجد إن رئيس الجامعة “جو ميرس” جاتله مكالمة بتقوله إنزل نادي تشيلسي عشان عمك لقى حتة آثار وعايز اللي يصرفها.

ولما راح فعلًا لقى جواب مكتوب فيه إنه عشان ياخد الكأس لازم يدفع 15 ألف جنيه استرليني.

وطول الأيام اللي بعد كده الشرطة ماقدرتش تحدد مين صاحب الرسالة.

لكن يوم 27 مارس 1966.. فيه مواطن اسمه”ديفيد كوربيت” كان ماشي في أمان الله هو والكلب بتاعه “بيكلز” في لندن.. وهو مروح البيت الكلب شم حاجة غريبة جنب السور بتاع البيت.. ولما قرب لقى جرنال قديم مبهدل ملفوف فيه كأس العالم.. وبعدها سلمه للشرطة واتعملت البطولة من غير فضايح الحمد لله.

الكأس اتسرق.. تاني!

سنة 1970 في مونديال المكسيك.. كسب المنتخب البرازيلي وفاز باللقب للمرة التالتة.

وكان من حقه يحتفظ بالكأس على طول وده وفقًا لقوانين الفيفا وقتها.

واتحط الكأس في مقر الاتحاد البرازيلي لكرة القدم في ريو دي جانيرو جوه خزنة إزاز مضادة للرصاص.. بس لأن كل حد فاضي شوية بيعدي يسرق كأس العالم.. فالكأس اتسرق تاني يوم 19 ديسمبر 1983.. ودي كانت النسخة الأصلية وماحدش يعرف مكانها لحد دلوقتي.

نيو لوك

بعد آخر سرقة في البرازيل دي الفيفا قالت كفايه بقى ده الكأس ده نحس إحنا نعتمد كأس جديد.

وبعد 53 عرض من فنانين ونحاتين من 7 دول مختلفة.. الاختيار وقع على النحات الإيطالي “سيلفيو جازانيجا”.. وهو ده الكأس اللي انت تعرفه وبتشوفه دلوقتي يا عزيزي القارئ.

الرهوان التاني.. ها.. التاني!

وعشان لا يلدغ مؤمن من جحر مرتين.. فالفيفا حطت قانون جديد وهو إن الكأس الأصلي دة مفيش فرقة تقدر تمتلكه طول حياتها.. فبقت تعمل كل بطولة نسخة طبق الأصل من الكأس الحقيقي.

لكن وقت الاحتفال بس هيحتفل المنتخب الكسبان بالكأس الحقيقي ونرجعه مكانه تاني وياخد النسخة التانية المطلية بالدهب يحتفظ بيها براحته.

ومن هنا المفروض نتعلم حاجتين.. الأولى إن السرقة حرام.. التانية إن كل حاجة فيه منها مضروب حتى كأس العالم.