خدعة وقع فيها ChatGPT هتخليك ماتاخدش أي معلومة طبية من الـ AI تاني
ساعات لما بتتعب بتفتح ChatGPT وتكتب الأعراض اللي حاسسها وتسأله عن التشخيص بدل ما تروح لدكتور.. وممكن تعتمد على كلامه أو حتى تاخد الأدوية اللي بيكتبها ليك.. بس فيه بحث كشفت بيه باحثة سويدية إن الذكاء الاصطناعي لو دخلتله معلومات مضللة بس مكتوبة بشكل أكاديمي هيصدقه وهيتعامل معاها إنها حقيقة طبية موثقة
إيه هو Bixonimania ؟
الباحثة “ألميرا عثمانوفيتش ثونستروم” السويدية من جامعة “جوتنبرج” اخترعت مرض وهمي وسمته “Bixonimania” بتقول إنه مرض بيصيب العين نتيجة التعرض الطويل للضوء الأزرق والمدة الطويلة اللي بيقضيها الشخص قدام الشاشات.. والأعراض بتبقى أحمرار الجفون وحكة وألم شديد
الهدف من المرض الوهمي ده إيه؟
الباحثة هدفها من التجربة دي هو كشف الثغرات الموجودة بالذكاء الاصطناعي.. وتشوف لو هيتخدع بالمعلومات اللي هتدخلها له عن المرض المزيف وهيتعامل معاها على إنها معلومات صحية موثوقة
طب الباحثة عرفت تخدع الـ AI إزاي؟
- الباحثة “ألميرا” درست أساليب كتابة أنظمة الـ AI لطلابها في الجامعة.. وعارفة تأثير صياغة المعلومات اللي بندخلها للـ AI على طريقة مسحه للبيانات الموجودة والنتيجة اللي بيديهالك.. فتوجيهك للـ AI بيغير من النتيجة.. بالظبط زي الأطفال لما بتخيرهم بين اختيارين فبيختار الخيار الأخير اللي بيسمعه
- الباحثة قالت إنها تعمدت تختار اسم سخيف وحطت كلمة “مانيا” ودي بتستخدم في الطب النفسي مش في أمراض العيون.. فحتى الدكاترة وأي فرد من أفراد الطاقم الطبي هيبقوا عارفين إن دي حالة وهمية لأن مفيش مرض كده بيصيب العين.. فالمفروض إن الـ AI يبقى عارف
- في بداية الدراسة الباحثة حطت تنبيه للقراء بيقول إن البحث مزيف فحتى لو محدش شاف البحث لأخره ففيه تحذير من البداية.. وألفت اسم جامعة وهمي وهو جامعة “أستيريا هورايزون” في مدينة “نوفا سيتي” الوهمية بولاية كاليفورنيا.. وزيفت اسم لصاحب البحث وعملت صورته بالـ AI.. وحتى الدكاترة الموجودين في البحث اللي كانوا حوالي 50 دكتور ألفت ليهم أسامي وهمية
- بدأت الباحثة تكتب البحث صيغة علمية وطبية بحتة وكأنه مكتوب بشكل أكاديمي وحقيقي جدًا
الناس عرفوا منين إنهم اتخدعوا؟ وعملوا إيه؟
-
- الباحثة “ألميرا” طلعت التجربة دي لأول مرة سنة 2024 ورفعت ورقتين بحثيتين على ويكيبيديا ومواقع بحثية تانية.. ولما سألت Copilot و Gemini في نفس اليوم جاوب إنه مرض نادر في العين نتيجة التعرض للشاشات الزرقاء ونصحهم بزيارة دكتور.. وPerplexity AI قال للمستخدمين ده مرض بيصيب 1 بين كل 90,000 شخص
- الباحثين اللي معاهم ماجستير في المعلومات الصحية المضللة بدأوا يشكوا في المعلومات.. وبدأ دكتور منهم اسمه “أليكس رواني” قال إن الـ AI لو مقدرش يفلتر المعلومات الصح من الغلط فكده محكوم علينا بالفشل خاصة إن ده مثال حي على تأثير المعلومات المضللة على حياة الناس.. وعشان كده موقع “SciProfiles“_ منصة خاصة بنشر النسخ الأولية من الأبحاث”_ مسحت النسختين الأولتين للبحث يوم 10 أبريل 2026
وفي الآخر الذكاء الاصطناعي ميقدرش يدي معلومة صحيحة 100% ولا يقدر يقوم بدور أي حد خاصة في المواضيع المهمة اللي تتعلق بحياتك وصحتك.. فالأحسن لما تتعب روح للدكتور وهو اللي هيعرف فعلًا يساعدك ومعلوماته ثقة
