إيه ظاهرة “حاجز أوميجا” الجوية اللي بتضرب أوروبا وأعلنوا بسببها حالة طوارئ مناخية؟
اليومين دول فيه موجة حر شديدة بتضرب قارة أوروبا ودرجات الحرارة واصلة لأكتر من 40 درجة مئوية.. وده خلى دول أوروبية كتيرة ترفع حالة “طوارئ مناخية”.. فبلجيكا لغت رحلات قطارات كتيرة وكمان آلاف المدارس اتقفلت في فرنسا ومات بسببها أكتر من 40 شخص وده في فرنسا بس.. فإيه الموجة الحارة اللي بتحصل في أوروبا؟
ظاهرة حاجز أوميجا
- بتحصل لما كتلة كبيرة من الهواء السخن اللي ضغطه مرتفع بتتحجز بين كتلتين هوائيتين باردتين ضغطهم منخفض
- التيارات الهوائية بتبدأ تتشكل على شكل الحرف اليوناني “أوميجا – Ω” عشان كده متسمية بالاسم ده
- التيارات دي بتخلي حركة الأنظمة الجوية بطيئة.. ففي الظروف العادية التيار بينتقل بثبات من الغرب للشرق.. بس في ظاهرة “حاجز أوميجا” بيتعطل التدفق ده للتيار وبيتحرك للشمال والجنوب وده.. وأنظمة الضغط بتتحجز في مواقعها فترة طويلة والكتل الهوائية مابتتجددش
- ظاهرة “حاجز أوميجا” بتستمر بين 3 و10 أيام بس ساعات بتطول لأسابيع
حالة الجو خلال ظاهرة “حاجز أوميجا”؟
- في منطقة الضغط المرتفع بتبقى الأحوال الجوية جافة وحارة.. لأن السحب مابتتكونش فبالتالي السماء بتبقى صافية أوي ومشمسة دايمًا.. فالأرض بتكون متعرضة بشكل مباشر لآشعة الشمس
- درجات الحرارة بتبقى عالية جدًا في المناطق الضغط المرتفع زي في فرنسا وبلجيكا وإسبانيا وأجزاء من إيطاليا
- المناطق الموجودة في الضغط المنخفض المحيط بالكتلة الحارة دي بتبقى العكس تمامًا.. فبتكون أكثر برودة وممطرة جدًا.. زي بريطانيا حاليًا واللي فيها اختلاف كبير بين الجنوب والشرق اللي حارين جدًا والشمال والغرب اللي معتدلين
إيه رأي العلماء؟
- العلماء مش متفقين لسه على طريقة تأثير تغير المناخ على تكرار الحواجز الجوية زي “حاجز أوميجا”.. بس فيه اتفاق بينهم على إن تغير المناخ بيزود من تكرار موجات الحرارة وشدتها
- المنظمة العالمية للأرصاد الجوية قالت إن موجة الحر اللي بتضرب أوروبا ظاهرة قياسية بس شايفة إنه من السابق لأوانه إنها تجزم بده
- الباحثة في الظواهر المناخية المتطرفة بكلية إمبريال كوليدج لندن “كلير بارنز” قالت إن موجات الحر الموجودة دلوقتي في أوروبا بقت أكثر سخونة بدرجتين أو 4 درجات مئوية مقارنة باللي كانت هتبقى عليه بسبب أنشطة الإنسان على المناخ.. فلما بتتشكل ظواهر جوية زي “حاجز أوميجا” بتضخم آثار الاحترار العالمي فدرجات الحرارة بتبقى أعلى وبتقعد فترات أطول من العادي
