حكاية “موسيالا” لاعب بايرن ميونخ مع المرض ورحلته للنجومية
ما بين ماتش وماتش تحولت حالة جمال موسيالا الصحية من مجرد لقطة مُقلقة على أرض الملعب لقصة شغلت جمهور بايرن ميونخ وألمانيا وكل متابعي الكرة في العالم.. موسيالا وقع فجأة على الأرض مرتين خلال 4 أيام قبل ما يخرج بنفسه ويكشف إن اللي حصل مش مجرد إغماء بسبب الإجهاد لكن مرتبط بحالة عصبية تم تشخيصها على إنها نوبات غياب قصيرة ومؤقتة وقابلة للعلاج.
الحكاية بدأت يوم 15 أغسطس خلال الودية اللي جمعت بايرن ميونخ ولايبزيج.. موسيالا تعرض لحالة إغماء على أرض الملعب في الدقائق الأخيرة وسط أجواء حر شديدة ووقتها كان الاعتقاد الأول إن الحرارة أو الإجهاد ممكن يكونوا السبب.. قدر يخرج من الملعب بمساعدة الجهاز الطبي.
لكن بعد 3 أيام بس حصلت المفاجأة اللي خلت القلق أكبر.. موسيالا دخل بديلًا في مباراة بايرن الودية أمام هايدنهايم وبعد حوالي 6 دقائق بس وقع مرة تانية على أرض الملعب بنفس الطريقة وأفراد الجهاز الفني اتجهوا له بسرعة وكان المشهد صادم خصوصًا إن الواقعة التانية حصلت بعد أيام قليلة جدًا من الأولى.. موسيالا تلقى المساعدة الطبية وخرج من الملعب قبل ما بايرن يكمل المباراة ويحقق الفوز 4-2.
بعد المباراة، نشر اللاعب رسالة عبر حسابه على إنستجرام قال فيها إنه بخير وإنه ممتن جدًا لكل الرسائل والدعم اللي وصله وكشف لأول مرة طبيعة حالته الصحية وقال أنه تم تشخيصه بنوبات غياب قصيرة ومؤقتة لكنها قابلة للعلاج ومرتبطة بخلل عصبي.
والأهم بالنسبة للجمهور إنه أكد إن الأطباء لم يرصدوا خطرًا صحيًا إضافيًا وإنه بيتلقى رعاية طبية ممتازة وإنه متفائل جدًا بالتعامل مع الحالة وقال كمان إن أطباء الأعصاب سمحوا له بمواصلة حياته اليومية وممارسة الحاجة اللي بيحبها أكتر وهي لعب كرة القدم مع استمرار المتابعة الطبية.
إيه أصلًا نوبات الغياب دي؟
ببساطة نوبات الغياب هي نوع من النوبات العصبية بيحصل فيها انقطاع قصير جدًا في الوعي أو الإدراك نتيجة نشاط كهربائي غير طبيعي ومؤقت في المخ.. الشخص ممكن يبقى واقف أو بيتكلم أو بيعمل حاجة عادية وفجأة يدخل في حالة غياب لثوانٍ يبص في الفراغ أو يتوقف عن النشاط، وبعدها يرجع لطبيعته بسرعة.
وعشان كده النوع ده من النوبات ممكن يعدي من غير ما حد ياخد باله منه أصلًا.. مؤسسة الصرع الأمريكية بتوضح إن النوبات ممكن تكون قصيرة لدرجة إنها تتفوت تمامًا وفي حالات كتير يتم تفسيرها غلط على إنها سرحان أو عدم تركيز وفي المعتاد بتستمر النوبة لثوانٍ معدودة وفيبعض الأنواع غير النمطية ممكن تستمر لفترة أطول.
والغريب في حالة موسيالا إن سقوطه على أرض الملعب بالشكل اللي شافه الجمهور مش هو الصورة التقليدية لنوبات الغياب البسيطة.. طبيًا نوبات الغياب عادة مبتخليش الشخص يقع على الأرض وده سبب إن الأطباء بيحتاجوا تقييم الحالة بشكل دقيق جدًا ومش صح إن أي حد يحاول يشخص الحالة من الفيديوهات أو اللقطات التلفزيونية.. التشخيص عادة بيعتمد على التاريخ الطبي ووصف النوبات وفحوصات عصبية ومن أهمها تخطيط كهرباء المخ اللي ممكن يظهر النمط الكهربائي المرتبط بنوبات الغياب.
مشوار موسيالا
موسيالا اتولد في شتوتجارت لكن طفولته الكروية اتشكلت في إنجلترا و بدأ مع ساوثهامبتون وبعدها انتقل إلى أكاديمية تشيلسي وهناك بدأ اسمه يظهر وسط المواهب الصغيرة.. بايرن نفسه بيذكر إن موسيالا قضى الفترة من 2011 إلى 2019 في تشيلسي قبل ما يقرر في صيف 2019 الانتقال إلى ألمانيا والانضمام إلى قطاع الناشئين في بايرن ميونخ.
والانتقال ده كان نقطة التحول الحقيقية.. موسيالا ماخدش وقت طويل علشان يلفت نظر المدربين وخلال شهور قليلة انتقل من فرق الناشئين للفريق الأول وفي يونيو 2020 دخل تاريخ الدوري الألماني بعدما أصبح أصغر لاعب يشارك مع بايرن في البوندسليجا وهو عنده 17 سنة و115 يومًا.
وبعدها بشهور قليلة في سبتمبر 2020، سجل أول أهدافه مع الفريق الأول أمام شالكه وأصبح وقتها أصغر هداف في تاريخ بايرن بالدوري الألماني ومن هنا بدأت رحلة موسيالا الحقيقية.
اللاعب اللي بدأ حياته بين ألمانيا وإنجلترا كان قدامه اختيار كبير على المستوى الدولي ألمانيا ولا إنجلترا؟. موسيالا كان مثل المنتخبين في مراحل الناشئين لكن في فبراير 2021 حسم قراره واختار تمثيل ألمانيا وبعدها بفترة قصيرة أصبح وهو عنده 18 سنة و117 يومًا أصغر لاعب يمثل ألمانيا في بطولة أوروبا.
ومع مرور السنوات ما بقاش موسيالا مجرد موهبة صغيرة في بايرن لكنه تحول إلى عنصر أساسي في الفريق والمنتخب لكن مشواره ماكانش كله نجاحات من غير مطبات.
موسيالا عانى خلال السنوات الماضية من مجموعة إصابات وأوقات غياب من بينها إصابات في العضلات والفخذ وأوتار الركبة والركبة بالإضافة إلى فترات مرض قصيرة.
وأصعب محطة في مسيرته كانت صيف 2025.. في مباراة بايرن أمام باريس سان جيرمان في ربع نهائي كأس العالم للأندية تعرض موسيالا لإصابة مرعبة في الكاحل بعد تدخل من الحارس جيانلويجي دوناروما.. الفحوصات أكدت إصابته بكسر في عظمة الشظية مع خلع في الكاحل، واضطر وقتها للخضوع لجراحة والابتعاد لفترة طويلة.
الإصابة دي غيبته حوالي 6 شهور لكنه رجع، واستعاد مكانه مع بايرن ومنتخب ألمانيا وشارك في كأس العالم 2026 قبل ما يخضع لاحقًا لعملية بسيطة كانت مقررة ضمن المتابعة الطبية لإصابته القديمة
