هل القطط بتحب تتحضن؟

معروف إن القطط كائنات كاريزما وليهم شخصيات مختلفة، في قطط بتحط مساحة لنفسها ممنوع حد يعديها وقطط تانية بتنطلق مع الناس، وكذلك في موضوع الحضن، حسب موقع petmd بعض القطط بتحبه، والبعض التاني لا.. خلونا نبدأ بالنوع الأول

تعرف إزاي إن قطتك بتحب تتحضن؟

– لما بتشوفك مش بتجري منك
– بتعمل صوت زي القرقرة أو الخرخرة بصوت عالي، وده معناه إنه مبسوط 

طيب تتعامل معاها إزاي؟

– متخضهاش مفاجأة، سواء قاعدة في حالها بتفكر في علبة تونة أو نايمة أو بتأكل، لإنها في الغالب هتبشك في وشك.
– بسبسلها بالراحة كدة وقرب منها وشوف هي متحمسة وجاتلك ولا مش مديالك اهتمام وابتديت تسيبك وتمشي
– متمسكش القطة بشكل عنيف، لو بدأ يحفرك وعايز ينزل لازم تنزله، سيبه هو اللي يجيلك
– روح اقعد جمب القطة، لو جاتلك يبقى هي مستعدة تلعب وتتحضن، القطط بتحبنا بس بشروطها هي
– لما تحضن القطة وأنت بتكلمها بصوت هادي وناعم هيفهم إن الحضن شيء كويس، وكل ما الحضن كان قصير كل ما كان أحسن يعني لو لقيته بيفرك وعايز ينزل نزله، وارجعله تاني لما يكون مبسوط وطبعا أقصر طريق لقلب القطة هي علبة توناو

طيب ليه في قطط على الجانب الآخر مش بتحب تتحضن؟

القطط رغم إنسجامهم مع البشر إلا إن لسه في جزء من حمضهم النووي لأجدادهم القدماء بيقولهم إنهم مفترسين وفريسة، يعني القطط بتصطاد حشرات صغيرة ولكن ممكن كائنات أكبر منهم تصطادهم وتأكلهم.

فا لما بيتم احتضان القطة بشكل جامد، ده بيخليهم يحسوا إنهم في حالة قتال، فا هتلاقيهم بيخربشوا وبيعضوا، وفي قطط تانية من الخوف بيكونوا في حالة ثبات وتجمد من الخوف.

طيب تعرف إزاي إن قطتك مش بتحب تتحضن؟

القطة لو مش بتحب الحضن فا هي هتفضل تحاول تطلع من الموقف ده وده بيسببلها إجهاد، والإجهاد ده له علامات زي إنها بتحاول تبعد وبتحرك ديلها وحدقة عينها بتوسع وإنها بتبدأ تخربش، وفي علامات تانية على الإجهاد زي إنها بتعمل حمام برا الليتر بوكس بتاعها، وبتستخبى طول الوقت.

في النهاية وزي ما قولنا في الأول، القطط شخصيات، في منهم اللي بيفضل حاجات ومنهم اللي مش بيفضلها، وفي الآخر هي كائن حي له تفضيلاته،