7 تأثيرات للحب على عقلك وجسمك
بكل الحب.. هنتكلم عن الحب.. لإن الحب هو الغاز الذي نشعل بيه البوتاجاز.. لا بعيدا عن الهزار والهيخو، مع بداية شهر فبراير بنلاقي محلات الهدايا كلها اتقلبت بوكسات ودباديب حمرا، ومحلات الورد كذلك، وبيبقى في حالة حب جميلة كدة بتخليك تفتكر أغنية يسرا اللي كانت بتقول فيها “حب خلي الناس تحب روح للناس ياحب” ولكن بعيدا عن فهمنا للحب من خلال الأفلام والمسلسلات والأغاني الرومانسية.. يا ترى جسمك ومخك عندهم رأي تاني في تفسير الحب؟ أو هل الحب بيأثر عليهم بشكل مختلف؟ طبعا حضرتك كسنجل بائس ممكن تقفل الموضوع وتقول وأنا مالي ياعم.. لا كمل عشان لما يجي النصيب تبقى فاهم إيه التغيرات اللي بتحصل في جسمك أول ما تشوف أو تشوفي الكراش أو الشخص اللي بتحبه.
مبدئيا سيبك من كلمة “قلبي” دي، خلينا نبص على مكان تاني في الجسم وهو العقل.. بيأثر إزاي؟ ده اللي بيقولهولنا موقع Healthline في أحدى مقالاته:
النشوة أو حالة السعادة الشديدة أوي: دي الحالة اللي بيكون فيها الشخص وهو قاعد مع حد بيحبه، أو مجرد حتى يسمع اسمه واللي لما بتحصل، عقلك بيديك “دوبامين” واللي بيحسسك بالسعادة الشديدة.
وكمان في لحظات ومواقف تانية بتاخد فيها دوبامين وأنت في بتعمل حاجة بتحبها وممتعة ليك زي إنك تأكل أكلة حلوة، تسمع أغاني، تقعد مع ناس بتحبهم، تمارس الجنس والموضوع كمان بيوصل إنك لو فكرت في موضوع ده ممكن يخليك تفرز دوبامين.
والباحثين بيعتقدوا إن الموضوع ده بيلعب دور في سلوك التزاوج، لإنك لما بتحس بالسعادة والرضا مع شخص، بتبقى عايز تكمل معاه بقية حياتك، هي حاجة حمادة هلال أوي.
والموضوع مش مقتصر على الدوبامين بس، لا ده عقلك بيقولك إحنا هنتعامل بمنطق نجم الأغنية الشعبية عبدالباسط حمودة لما قال “إديني حب أكتر أديك الشوق يا سكر”.. عقلك بقى تديله حب أكتر يديك هرمونات أكتر.
مستويات الأوكسيتوسين بتزيد لما بتحس بالحب، وده بيزود من مشاعر الأمان والثقة، وده اللي بيخليك تحس بالارتباط أكتر بالطرف التاني والمشاعر بتكون أقوى بعد ما يحصل اتصال جسدي عشان كده هرمون الأوكسيتوسين بيسموه “هرمون الحب” وإفرازه بيخليك مرتبط أكتر بالطرف التاني وبيقلل اهتمامك بأي شخص تاني، وده اللي حصل مع تامر حسني لما قال للإكس في أغنية من أغانيه “الله يسهلك خدي نفسك وإمشي يابنتي.. أنا مكتفي جدا بحبيبتي”.
موقع Healthline بيأكد إن الحب مرتبط بتقليل مستويات التوتر والضغط، ده المفروض إنه يحصل فلو بتتخانقوا بطلوا خناق وترفعوا ضغط بعض.
في دراسة اتعملت في سنة 2010، لقت إن الناس اللي مش متجوزة بيكون عندهم مستويات أعلى من التوتر وهرمون الكورتيزول أكتر من الناس اللي في علاقة أو متجوزين، فلو أنت أو إنتي في علاقة والطرف التاني بيتسببلك في توتر يا تحلوها يا كل واحد يشوف طريقه لإن الحياة عايزة ناس تقلل التوتر مش تزوده وإحنا كلنا قرفانين وزهقانين يعني.
الشعور بالغيرة: ودي حاجة طبيعية بل وليها تأثير إيجابي على علاقتك بالطرف التاني، بس عالهادي، يعني لما يكون عندك مشاعر غيرة، اتكلم مع الطرف التاني وقوله بدل ما تفضل تـ Stalk الطرف التاني والموضوع يكبر وكده.
طيب كل اللي اتكلمنا فيه ده، هي تأثير الحب على العقل.. هل كدة الموضوع خلص؟ لا ده لسه فيه التأثير على الجسم نفسه.
الحب كمان بيحسن الصحة البدنية حسب موقع Heathline، وله عدة فوائد زي إنه بيخفض خطر الإصابة بأمراض القلب، وخفض ضغط الدم، وتحسن المناعة.
الحب كمان ممكن يساعدك على إنك تستمتع بحياة أطول، لما بحث اتعمل في سنة 2011 بمراجعة 95 مقالة قارنوا من خلالها معدلات الوفيات للناس اللي مش متجوزين مقارنة بمعدلات الوفيات للناس المتجوزين لقوا إن الأشخاص اللي مش متجوزين عندهم مخاطر أعلى بالوفاة المبكرة بنسبة 24%.
شوف يا أخي الحب ده غريب جدا والله، تخيل إنك لو حاسس بألم.. ممكن يكون سبب زوال الألم ده؟
دراسة صغيرة كدة اتعملت في سنة 2010 إنهم جابوا 15 شخص في علاقات رومانسية وكانوا بيعانوا من ألم ما، وخلال ده كانوا بيشوفوا صور لشريكهم الرومانسي، لاحظ مؤلفين الدراسة إن مجرد النظر لصورة الطرف التاني نشط نظام المكافأة في الدماغ والتنشيط ده بدوره قلل من إدراك الألم.
الحب مش بيتلخص في قلبي وروحي والكلام ده، لا عقلك وكامل جسمك بيدخل في التجربة دي، واللي لازم تكون تجربة صحية مش مؤذية لإن الكوكب فيه ما يكفي من القرف الحقيقة فمش ناقص نجيب حد يزود علينا، فخد وقتك وأنت بتختار.. عشان متاخدش على دماغك.
