ريهام عبد الغفور.. من البنت الرقيقة لـ “غول التمثيل”

النهاردة عيد ميلاد “ريهام عبد الغفور” الـ 44 بعد مسيرة فنية كبيرة بدأت من حوالي 20 سنة شاركت فيها في أعمال فنية سينمائية ودرامية كتير.

ريهام في بداية مسيرتها الفنية الناس عرفتها بدور البنت البريئة الرقيقة، ودخلت قلوب الناس بسرعة من تلقائيتها وبرائتها زي دورها مثلا في مسلسل الحقيقة والسراب، ومؤخرا ناس كتير وصفتها إنها “غول تمثيل” بعد ما شافوا أدوارها المميزة في مسلسل “منعطف خطر” ومن قبله مسلسل “وش وضهر”.

سنة 2000 كان أول ظهور ليها من خلال مسلسل زيزينيا الجزء التاني قدام النجم يحيى الفخراني، والسنة اللي بعدها شاركت في 3 مسلسلات مرة واحدة: “حديث الصباح والمساء، والرقص على سلالم المتحركة، وأحلام سنابل”.

وفي 2002 شاركت مع النجم محمد صبحي في مسلسل “فارس بلا جواد” اللي حقق نجاح كبير وقتها، وفي نفس السنة شاركت في فيلم “صاحب صاحبه” مع محمد هنيدي وأشرف عبد الباقي.

ناس كتير عجبها دورها في مسلسل “العندليب” اللي اتعرض سنة 2006 لما عملت دور “فاتن حمامة”.

وليها كمان مشاركات متميزة جدا في المسرح، شاركت في مسرحية “الملك لير” مع النجم يحيى الفخراني في عرضين المسرحية في 2001 و 2019 وقدمت شخصيتين مختلفتين في كل عرض منهم وده لو هيدل على حاجة هيثبت قد إيه هي ممثلة شاطرة وبتطور من نفسها مع السنين.

أهم الأعمال اللي شاركت فيها:

 أفلام: “سحر العيون، وصاحب صاحبه، وحريم كريم، وملاكي إسكندرية، وجعلتني مجرمًا، وعجميستا، والهرم الرابع، والخلية، وسوق الجمعة”، ومسلسلات: “زيزينيا ج2، والعائلة والناس، وحديث الصباح والمساء، والرقص على سلالم متحركة، وفارس بلا جواد، وأميرة في عابدين، والعمة نور، والحقيقة والسراب، ومسألة مبدأ، والعميل 1001، ومن غير ميعاد، وشيخ العرب همام، والداعية، وحارة اليهود، وأفراح القبة، والقيصر، ورمضان كريم، والزيبق”.

في 2017، شاركت في مسلسل “لا تطفىء الشمس” وقدمت دور متميز جدا ومختلف عن الشخصية اللي الناس عرفت بيها، وكان ده زي ما كتير وصفوا “إعادة اكتشاف ريهام” وده اللي وضح قوة موهبتها ونضجها الفني.

وفي 2020 قدمت بطولة فيلم قصير “واحدة كده” من إنتاج نتفليكس، وكانت تجربة فنية جميلة أول مرة نشوف ريهام عبد الغفور فيها.

ومؤخرا، شاركت في مسلسل “وش وضهر” مع إياد نصار، و”منعطف خطر” مع باسل الخياط، والمسلسلين مفيش حد اتفرج عليهم غير لما أشاد بريهام عبد الغفور وناس كتير قالت إنها تستاهل أدوار بطولة أكتر من كدا وإنها وصلت لقمة نضجها الفني.

وفي الأخر حابين نقولك كل سنة وانتي طيبة ومتميزة وبتطوري وبتبهرينا دايمًا يا ريهام!