ليه مهما نشرب مياه كتير هنفضل عطشانين برضه في الصيام؟
كتبت: ندى خالد
كلنا بنشرب مياه كتير على السحور وبنفضل ندخل الحمام ونخرج من الحمام طول الليل وفي الأخر بنتفاجىء إننا بنفضل عطشانين برضه خصوصا تاني يوم الصبح!
وبعد ما دورنا كتير لقينا موقع CNN وموقع العربية كاتبين في مقالة من مقالاتهم ووضحوا فيهم سبب العطش ده بالرغم من شرب كميات مياه كتير
والسبب هو إن جسم الإنسان بيحتاج من ٢ إلى٣ لتر مياه يوميا لا أكتر ولا أقل علشان الكلى بتاعتنا متتعبش.
وكمان علشان كل ما نشرب مياه باعتدال كل ما هنحافظ على استقرار الدورة الدموية و مستوى السكر في الدم وهيكون منتظم وخصوصا فى وقت الصيام.
طيب، ليه مانزودش مياه مش يمكن نقضي على العطش فى الصيام؟
بس لا الكلام ده مش حقيقي ولا حاجة، لان كل ما بنشرب مياه أكتر من الطبيعي كل ما الكلى هتضطر تشتغل أكتر علشان تتخلص من السموم اللي في الجسم والمياه الزايدة اللي الجسم مش محتاجها، ولما بتتخلص من السموم تلقائيا هتلاقيها بتتخلص من المياه اللي شربناها دي كلها وتخلي عندنا رغبة بعدها فى دخول الحمام
وبالتالي كل اللي شربناه راح وهنرجع نعطش من أول وجديد!
طيب ممكن نحل الموضوع ده إزاي وإحنا صايمين وتعبانين؟
تقسيم شرب المياه:
نحاول نقسم شرب المياه على دفعات من بعد الفطار لحد وقت السحور نكون خلصنا ال ٣ لتر بتوعنا، وبالتالي الجسم هيحتفظ بجزء منهم بدل ما يتخلص منها كلها.
نقلل من السكريات والحلويات:
نحاول نقلل من القطايف والكنافة لأنها بتسبب ارتفاع السكر فى الدم و العطش.
ناكل فاكهة وخضار كتير:
نستبدل الحلويات بالفاكهة والخضار علشان فيهم مياه وألياف كتير بيساعدوا الجسم إنه يفضل نشيط فترة طويلة، و كمان بتساعد على إفراز المياه في الجسم.
نقلل من الأملاح والكافيين:
نحاول نقلل من الأكل اللي فيه أملاح كتير والمشروبات الغنية بالكافيين زي الشاي والقهوة لأنها كلها حاجات مدرة للبول وبتخلينا نحس بالعطش تاني يوم ونستبدلهم بالأكل الغني بالبروتين.
