موضوع مايهمكش: معلومات ماتعرفهاش عن سلطة الحمص في يومها العالمي
يوم 13 مايو هو اليوم العالمي لسلطة الحمص Hummus.. ايوه زي ما قرأت كده.. حتى سلطة الحمص ليها يوم عالمي للاحتفال بيها.. وبالمناسبة دي جمعنا شوية معلومات ممكن تبقى ماتعرفهاش عن هذه السلطة الرايقة.
- سلطة الحمص بتتعمل من مكونين أساسيين بمنتهى البساطة، وهم الحمص والطحينة.
- سلطة الحمص بدأت من الشرق الأوسط وانتشرت منه لكل مكان في العالم، وطبعا أقدم بداية ليها كانت من مصر في القرن الـ 13، وتم نشر كتب طبخ فيها وصفات سلطة الحمص من القاهرة.
- حصلت خناقات كتير على أصل سلطة الحمص، وبدأت منين، ومين اللي اخترعها، والخناقات دي كان أغلبها دول البحر المتوسط، وعلى الرغم من الإداعاءات المختلفة إلا إن كل المؤشرات التاريخية بتقول إن سلطة الحمص ماظهرتش قبل العصر العباسي في مصر.
- أنت ممكن تحط سلطة الحمص أو تاكلها مع أغلب الأكلات تقريبا، وممكن تاكلها لوحدها حتى، وموجودة في أغلب المطاعم، وممكن تاكلها مع العيش أو تحطها مع السلطة.
- سنة 2010، لبنان دخلت موسوعة جينيس للأرقام القياسية لأكبر طبق سلطة حمص في العالم وكان وزنه 10450 كجم.
- سلطة الحمص بتتعمل بنفس الطريقة تقريبا في كل مكان في العالم باختلاف حاجات بسيطة في المكونات، زي كمية الحمص وكمية الطحينة وكمية الكمون، وفيه دول ومناطق بتحط عليها زيت زيتون، وممكن تختلف طريقة تقديمها من مكان للتاني بس المكونات شبه واحدة.
أنت لسه قاعد؟ قوم اعملك طبق سلطة حمص بسرعة مفيش وقت للتفسير!
