اعرف شخصيتك من نوع شنطتك:
كل واحد فينا له طريقة معينة بيشيل بيها حاجته ومتعلقاته الشخصية وهو خارج، على حسب راحتهم وحسب نقط كتير الناس بتختار اللي بيحبوا يشيلوه وهم خارجين..وبمناسبة اليوم العالمي لشنطة الإيد جمعنا لكم معلومات من موقع (اسياكو، اليوم السابع و عرب فاشون) لشنط اليد اللي بتحدد أنواع الشخصيات من خلالها:
1- “المحفظة العادية” شخص عملي:
طريقة رجالي شويتين عشان الرجالة ما بتحبش الزحمة، باصين لقدام وبيركزوا كويس انهم يحافظوا على فلوسهم ويصرفوها في الحاجات المهمة بس خصوصاً لو مسؤول عن أسرة وبيت.
2- “المحفظة أو الشنطة المستطيلة” شخص منظم:
واللي بيستخدموها الستات اللي بتحب النظام والروتين في كل حاجه وكل مكان وأي تغيير بيعمل مشاكل.. بتكون شخصيتهم لايقه اكتر على شغل البنوك والشغل اللي بيعتمد على التحليل وبيكونوا كمان شاطرين في التكنولوجيا، وحتى في العلاقات الشخصية بيحبوا يحسبوا كل حاجة بالورقة والقلم.
3- “محفظة مستطيلة بـ إبزيم” شخص متميز:
قبل أي حاجة الإبزيم ده إسورة بتمسك منها المحفظة بدل ما تشيلها زي كتب الدرس، بيشيلها الناس اللي بتحب التميز ومبدعين ومش بس كده لأ كمان واثقين من نفسهم.. ما تفرحش اوي كده عشان ده معناه إنك غالباً بتخاف شوية على الفلوس.
4- “شنطة الظهر” شخص ستايلش:
لو انت من منهج انا روش اوي يا ماما فا غالباً هتبقى بتحب تلبس شنطة ضهر عشان بتعشق المغامرة والتجربة واكتساب الخبرات الجديدة وعندك ثقة بالنفس وأي حاجة غير ضيق التنفس.
5- “شنطة يد Hobo” شخص دقيق:
غالباً الستات بتحب الدقة في التفاصيل وبيحبوا الشنطة دي عشان يشيلوا كل اللي يقدروا عليه لأن ممكن نحتاجها في أي وقت من ميكب للتليفون بـ لوازمه من شاحن وهاند فري للأدوية وهدوم احتياطي وترابيزات بينج وبلياردو.. دايماً بنلجألهم لما نتعب أو موبايلنا يفصل.
6- “شنطة Cluch” شخص كلاسيكي أنيق:
طبعًا في رجالة كتير هتبقى أول مرة تعرف ان في شنطة اسمها كلاتش، ودي لزوم السهر والحفلات وغالباً بيكون فيها حاجات بسيطة اوي زي الموبايل وصباع روچ وشوية فلوس كده مش اكتر.. عشان دي حفلة يعني مش طالعين رحلة.
7- “شنطة Cross” شخص عملي:
ودي نفس سكة الستايل الرجالي حبتين بس عند الستات، بدل الزحمة بتشيل الحاجات المهمة اللي هتحتاجها بس وده غالباً هيكون في المشاوير الحكومية بس.
8- “شنطة Satchel” شخص منظم نص نص:
مش هنستغرب أسماء الشنط تاني بس هي شنطة شبة شنطة المدرسة بتبقى من علامات الست المبدعة والمنظمة بس في نفس الوقت ما بتعرفش توازن اوي بين حياتها الشخصية وشغلها.. بتعمل اللي ربنا يقدرها عليه.
9- شنطة The Shopper:
حد هيسأل ماحطيناش شخصية ليه هقوله عشان كلنا بنتسوق يعني فا هي بتمثلنا كلنا، شبه شنطة السوق بتاع جداتنا وأمهاتنا زمان بس شكلها عالموضة عشان محدش يتحرج وهو شايلها ودي بتكون شبه شنطة Hobo اللي قولنا عليها فوق بتشيل كل حاجة (ماعادا الهموم).
10- “من غير شنطة” شخص مريح دماغه:
دي شنطة ملهاش وجود وعلشان كده بنستخدم بدالها جيوبنا غالباً بتكون رجالي بنحط فيها كل اللي عايزينه (مفاتيح، فلوس، بطاقة والموبايل وأي حاجه بترن)، غالباً بيستخدمها كمان مراقبين الامتحانات بس بدل جيوبه بيشيل كل حاجته في ايد واحدة.
