10 أفلام هتدخلك في مود الكريسماس
بمناسبة الأجواء الشتوية دي جمعنالك 10 أفلام هتدخلك المود:
1-Home Alone
مبدأيا كده لو ماتفرجتش على الفيلم ده لازم تروح تتفرج عليه حالا هو وأجزائه ده لو ماكنتش أتفرجت عليه زمان من وأنت صغير!
والفيلم بيحكي عن الطفل كيفن اللي أهله بيقرروا يسافروا فرنسا يقضوا إجازة الكريسماس لكن بسبب الزحمة والفوضى بينسوه في البيت بالغلط وبيمر كيفن بمغامرات مضحكة كتيرة خصوصا لما بيحاول أتنين حرامية سرقة بيته.
2-It’s a Wonderful Life
الفيلم بيحكي عن جورج رجل محبط وبيفكر ينتحر ليلة الميلاد لأنه حاسس إنه ماعملش حاجة مهمة لكن بيظهرله ملاك بيساعده يشوف إزاي هيكون شكل حياته وحياة الناس اللي حواليه لو ماكانش موجود وإزاي أبسط حاجة بيعملها لها تأثير كبير على اللي حواليه.
3-love actually
الفيلم بيحكي عن حياة كذا شخص في مراحل عمرية مختلفة وبنشوف المشكلات العاطفية اللي بتقابلهم والتعقيدات اللي في حياتهم ومعنى الحب بالنسبالهم بأشكاله المختلفة وده بيحصل قبل شهر من احتفالات عيد الميلاد.
4-last christmas
الفيلم بيحكي عن كيت اللي بتشتغل في محل لبيع هدايا عيد الميلاد بتمر في حياتها بمشاكل وقرارات غلط كتيرة وفي ليلة بتتعرف على توم اللي بيغير حياتها وبيخليها تكتشف حاجات جديدة عن نفسها لكن بيفضل في أسرار مستخبية بنكتشفها مع الوقت.
5-Violent Night
الفيلم أكشن كوميدي وبيحكي عن عصابة بتقتحم بيت يوم عيد الميلاد وبتاخد العيلة كرهائن لكن سانتا كلوز بيكتشف ده بالصدفة وبيحاول يساعد الأسرة وينقذها من العصابة.
6-Spirited
الفيلم من نوعية الأفلام الموسيقية مأخوذ من قصة عيد الميلاد الكلاسيكية اللي كتبها “تشارلز ديكنز” وبيحكي عن راجل بخيل وبيتعامل بأنانية مع الناس اللي حواليه لكنه بيدخل في مغامرة خيالية سحرية في 3 أزمنة مختلفة بتخليه يعرف السبب اللي خلاه يبقى وحيد.
7- THE PRINCESS SWITCH
الفيلم بيحكي عن الأميرة مارجريت اللي بتقابل بنت من العامة شبهها بالظبط وبتقرر تبدل معاها هي تعيش حياتها والبنت تكون مكان الأميرة ولكن القصة بتتعقد أكتر لما كل واحدة فيهم بتحب حبيب التانية!
8- Jingle Jangle: A Christmas Journey
الفيلم بيحكي عن جد بيحب يصنع الألعاب بيقضي إجازته مع حفيدته الذكية اللي بتحب المغامرات واستكشاف كل حاجة ورحلتهم مع بعض اللي من خلالها بيخترعوا اختراع سحري بيغير حياتهم.
9- Surviving Christmas
الفيلم بيحكي عن درو رجل أعمال غني لكنه شخص أناني ووحيد
فبيحاول يقضي عيد الميلاد مع ناس تانية علشان مايبقاش لوحده زي كل مرة فده بيخليه يعرض على أسرة ساكنة في بيت عيلته القديم إنه يقضي العيد معاهم مقابل أي حاجة يطلبوها وبنشوف إيه اللي هيحصل معاه.
10-Love Hard
الفيلم بيحكي عن ناتالي اللي بتتعرف على شاب عن طريق Dating app عايش في بلد تانية لكن لما بتسافر علشان تقابله ليلة الميلاد وبتوصل بتكتشف إنه شخص تاني غير اللي كانت بتكلمه.
