7 حاجات هتساعدك تركز في رمضان

مع بداية شهر رمضان بنكون لسه ماتعودناش على الصيام كل يوم وكمان يومنا بيتقلب فده بيخلينا ننام ساعات أقل وتركيزنا يكون شبه معدوم .. خاصة الناس المتعودين يشربوا قهوة أو كافيين كتير عشان يقدروا يركزوا..
عشان كده في الموضوع ده هنقولك شوية نصايح هتساعدك تركز وأنت صايم وفقا لموقع flair-magazine

أشتغل بذكاء:

حاول تقسم الشغل حسب أهميته خلي الحاجات البسيطة قبل الفطار واللي محتاجة مجهود وتركيز بعد الفطار عشان تقدر تنفذها صح.. وحاول تاخد بريك بعد كل حاجة تخلصها عشان تكون ريحت دماغك شوية.

ابعد عن الحاجات اللي بتشتتك:

ممكن ماتستخمدش الموبايل وأنت بتشتغل عشان التريندات والبوستات الرمضانية أكيد هتسحلك معاها وتخليك ماتركزش كويس في شغلك خلي السوشيال ميديا والحاجات دي لبعد الفطار أحسن.

لازم تتسحر كويس:

مهم أوي نتسحر كويس لأن السحور هو اللي بيدينا طاقة نكمل بيها لتاني يوم.. عشان كده لازم نهتم بيه ونأكل أكلات غنية بالبروتين والألياف والدهون الصحية اللي تشبعنا وتساعدنا نركز ومانحسش بالإرهاق.

قسم أكلك وقت الفطار:

من الحاجات المفيدة للجسم وبتساعده عالنشاط إنك تقسم وجباتك عالفطار واحدة واحدة عشان ماتاكلش مرة واحدة وتتقل باقي اليوم وتبقى عايز تنام ومش قادر تعمل حاجة.

أشرب مياه كتير:

حاول تشرب مياه كتير  حوالي 8 كوبايات على الأقل من بعد الفطار لحد السحور عشان مايحصلكش جفاف وكمان حاول تاكل فاكهة وخضار  وتبعد عن الأملاح.. لأن الجفاف هو اللي بيخلينا نصدع ونكون مش مركزين أوقات كتير.

قلل من الكافيين:

مدمني الشاي والقهوة ومشروبات الطاقة هما أكتر ناس هيحسوا بالمعاناة وعدم التركيز لأن جسمهم أتعود إنه ياخد الطاقة والنشاط من الكافيين فلما بتبطله فجأة جسمك بيحس إنه تعبان وعايز يريح وينام..

حاول تمارس أي نوع من الرياضة:

الرياضة من أكتر الحاجات اللي بتخلي الجسم نشيط وصحي دايما.. عشان كده حاول تمارس أي تمارين بسيطة سواء قبل الفطار أو بعده وممكن تنزل تتمشى بعد الفطار شوية مثلا كل يوم.

جرب تعمل الحاجات دي واحدة واحدة وهتفرق في تركيزك طول رمضان
وفي حالة إنك قدرت تركز وتقرأ الموضوع للأخر يبقى أنت كده على الطريق الصح..