ليه فيه ناس كتير مابتحبش العرق سوس؟

كل رمضان فيه بتقوم خناقة صغيرة على السوشيال ميديا على العرق سوس ومحبين العرق سوس وناس كتير أوي بتقول إنها مابتحبهوش.. وفعلا أغلب الناس مابتحبهوش وبطنها بتوجعها بس لو كانوا اتلخبطوا وشربوه بالغلط

العرق سوس ممكن يبقى مليان فوايد لكنه طعمه مش مريح بالنسبة لأغلب الناس.. وهتلاقي فيه بيوت كتير فيها اللي بيحبه ومشروب أساسي عنده على الفطار في رمضان وناس تانية ماتقدرش تحطه في بوقها.. وبسبب إن الناس دول كتير قررنا ندور ورا الموضوع ده ونعرف ليه الناس مابتحبش العرق سوس 

العرق سوس موجود في منتجات كتير حلويات مثلا زي الكانديز والجيلى كولا وموجود في أدوية كتير عشان تغطي على الطعم الطبي للأدوية وهو بيجي من جذر نبات اسمه “Glycyrrhiza glabra” 

موقع today قال إن “مارسيا بيلتشات” العضو المنتسب في مركز مونيل للحواس الكيميائية في فيلادلفيا اللي بيبحث في مجال التذوق والشم بتقول إن الناس يا إما بيحبوه أوي أو بيكرهوه جدا وعلى حد علمها فهو مش إعجاب أو كره مكتسب.. وقالت إنها ماتعرفش لو كان فيه جين معين مرتبط بالإعجاب بيه أو كرهه لكن تقريبًا هو حاجة الناس بتتولد بيها.

وبالرغم من إن الخبراء ماعملوش أبحاث كتير عن العرق سوس إلا إن “مارسيا بيلتشات” قالت إنها مابتحبهوش لكن جوزها بيحبه جدا.. وده خلاها تشارك بعض النظريات عن حب وكره الناس له.

وقالت إن في الطبيعي لما بناكل بنستخدم حاسه التذوق والشم عشان نكتشف الطعم والطعم بيشمل الحلو والمر والمالح والحامض.. ولما بناكل حتة من العرق سوس بنتذوق مادة اسمها “الجليسيرهيزين” وهو محلى طبيعي في جذور العرق سوسو واللي طعمه بيبقى زي السكرين والمحلى ده موجود في بعض أنواع السكر الدايت.. وبالتالي السكر الزيادة ده بيخلي الناس يتضايقوا.. وبتقول إن الكره والحب للعرق سوس ممكن يبقى مرتبط بالحب والكره للسكر

وبتقول كمان إن العرق سوس فيه مادة الأنيثول وهي مادة عطرية بتلعب على حاسة الشم عنج الناس.. والأنيثول ده برضه موجود في اليانسون والشمر وكلهم هتلاقي إن الناس اللي بيكرهوا العرق سوس ممكن يتقبلوه.

وقالت “مارسيا بيلتشات” إن تقريبا كده التذوق حاسة مدمجة والناس بتقدر تدرب نفسها على حب الأكل اللي فيه توابل كتير وحاسة الشم برضه الناس بتقدر تدرب نفسها على الروايح اللي بتستجيب ليها أو بتحبها.. وبالتالي ممكن الناس يبقوا مابيحبوش العرق سوس عشان بيفكرهم بريحه مابيحبوهاش.. وقالت كمان إن الناس ممكن يبقوا مابيحبوش العرق سوس عشان طعمه مش عشان ريحته.

ده غير إن كمان الجينات بتلعب دور كبير في إدراك النكهات والروايح فدي حاجة لازم ناخدها في الاعتبار لما نتكلم على الفروق الفردية في تفضلات الأكل والروايح.