مسلسلات رمضانية تسلط الضوء على مواضيع نفسية وإجتماعية مهمة

الشيء المثير للاهتمام في مسلسلات رمضان السنة دي هو وجود مجموعة من المسلسلات اهتمت بمواضيع مهم إننا نركز عليها ونغير فكرتنا عنها وكمان أدتنا إجابة لإزاي نتعامل معاها بشكل يساعدنا بعيدا عن الوصم المجتمعي المعتاد .. ومن الموضوعات دي التحرش والأمراض النفسية وكمان طريقة معاملتنا لأولادنا

وفي الموضوع ده هنقولك إزاي المسلسلات عالجت المشكلات دي

– مسلسل مسار إجباري


بنلاحظ “فرح” لما بتتعرض للتحرش من زميل ليها في الجامعة بتتصل بإخواتها علي وحسين تطلب منهم ييجولها ولما بييجوا يشوفوها بيهدوها ويسألوها إيه اللي حصل وبيتعاملوا مع الموضوع وبيجبولها حقها بدون أي كلام من نوعية أنت السبب أو أي مناقشات تدين الضحية زي ما اتعودنا في أعمال كتير قديمة وده بدوره هيشجع جزء كبير من البنات إنهم يحكوا ومايخافوش لو حصل معاهم موقف زي ده لإنهم مجرد ضحية!

-مسلسل بابا جه

المسلسل بيعرض أهمية الأباء في حياتنا بشكل كوميدي ولكن رغم كده اهتم بتفاصيل كتير نفسية بيمر بيها كل طفل وبتأثر عليه في المستقبل ومن ضمن الحاجات دي صدمات الطفولة اللي بتحصلنا واحنا أطفال وبتكمل معانا واحنا كبار
زي شخصية هشام اللي بيقوم بدورها الفنان أكرم حسني بنلاحظ إنه بسبب قسوة باباه عليه وهو صغير اتحول العكس تماما بعد ما باباه كان فاكر إنه كده هيخليه يتحمل المسؤولية في الأخر طلع مستهتر و مش بيحب يشيل أي مسؤولية بسبب خوفه منها .. وعلى الرغم إنه يبان شيء كوميدي لكن بنلاحظ خلال الحلقات عقدته من الكشري وده بسبب إن باباه كان صاحب محل كشري و حبسه يوم كامل في المحل و ماحدش قدر يفتحله وده خلاه يكره الكشري لأنه بيفكره بالذكرى دي


-مسلسل نورة:

رغم إن مسلسل نورة مسلسل كارتون لكن كل حلقة بتناقش موضوع مهم يهم الأطفال في المرحلة دي وفي درس مستفاد منه.. ومن ضمن المواضيع المهمة اللي أتكلم عنها المسلسل في حلقاته موضوع “انتهاك الخصوصية” وظهر ده من خلال حلقة اخترقت فيها نورة موبايل صاحبتها يارا ووالدتها لما عرفت الموضوع قالتلها إن ده شيء غلط جدا ومش المفروض حد يعمله
وفي حلقة تانية أتكلم المسلسل عن قضية “زواج القاصرات” من خلال صديقة نورة اللي اسمها جميلة واللي باباها كان عايز يجبرها تتجوز وبتحاول نورها وماماتها يساعدوا البنت عشان ده شيء غلط وغير قانوني لأي طفل

-مسلسل عتبات البهجة:

بنلاحظ بتسليطه الضوء على المرض النفسي في أحدى الحلقات لما بتعاني لبنى حبيبة بهدت من الحزن الشديد بسبب عدم زيارة احفادها ليها وبقت تحس إنها مش حاسة أي حاجة وبالصدفة بيلاقي صديق بهجت عرفان أدوية عندها وبيكتشفوا إن عندها مرض نفسي ثنائي القطب وبييفتكروا مواقف بتوصف الحالة المرضية اللي عندها من غير وصم للمرضى النفسيين أو إظهارهم في شكل أشخاص غير متزنيين

-مسلسل كامل العدد:

غير إنه بيوضح المشاكل اللي بتحصل بين المراهقين وأهلهم بسبب اختلاف الاجيال..بيسلط المسلسل الضوء على فكرة الفقد خصوصا بالنسبة للأطفال ومعاناتهم بعد ما حد بيحبوه بيتوفى وازاي صدمة موت الأب بتأثر على سلوكهم
والطرق اللي الناس حواليهم بيحاولوا يتعاملوا معاهم بيها

ومن خلال المسلسلات دي بنلاحظ تطور في الاهتمام بالمشكلات اللي بتواجه الكبار والصغيرين واللي كانت زمان مابتظهرش في كل الأعمال إلا نادرا.. ودي تعتبر محاولة لإظهار أثارها وإننا ماينفعش نتجاهلها ولازم نواجهها ونلاقي حلول ليها سواء بأننا نعترف بيها أو نتكلم مع حد قريب لو هى مشكلة زي التحرش أو أي أذى تعرضناله ولو هي مشكلة نفسية نلجأ لمتخصص يساعدنا