شكل عينك بيقول إيه عن شخصيتك!

بيقولوا إن العين هي أكتر حاجة ممكن تعرف منها الشخص اللي قدامك سواء بيفكر في إيه أو رد فعله هيكون عامل إزاي أو عايز يقول إيه.. بس مش لحد هنا بس العين بتقول عن الشخصية فشكل العين نفسه كمان ممكن يوصف كتير عن شخصيتك زي ما قال موقع “timesofindia” في واحد من مقالاتة:

1- العين الكبيرة: 

حجم العين الكبيرة مرتبط دايما بالحماس والانفتاح والإبداع.. وبيميل الاشخاص اللي عينهم كبيرة وواسعة إنهم يتصرفوا بشكل عاطفي أكتر وأقل منطقية.

2- العيون الصغيرة: 

الأشخاص اللي عينهم صغيرة عرضة أكتر إنهم يبقوا منطقيين وبيحبوا يحسبوا كل خطوة وبيعرفوا يركزوا كويس من غير ما حد يشتت انتباهم، والاعتقاد بتاع إن الأشخاص اللي عينهم صغيرة باردين مش حقيقي لإن المشاعر بتيجي بعد التفكير فهما مش عايشين من غير قلب لمجرد إنهم مابيسبوش مشاعرهم تسيطر على حياتهم.

3- العيون المدورة:

بيميل الأشخاص اللي عينهم مدورة إنهم يكونوا مبدعين أكتر.. وبترتبط شخصيتهم بالأشخاص اللي عينهم كبيرة لإن الاتنين بيركزوا أوي على العواطف، ولو ماقدروش يسيطروا على عواطفهم فخيالهم بيزيد وده بيخليهم يعانوا من تقلب المزاج والأفكار غير الواقعية.

4- العيون اللي شكلها لوزي:

بتربط بالأشخاص اللي بيميلوا أكتر للحذر، وده مش بالضرورة حاجة وحشة لأنها بترتبط في أوقات كتير باللطف والتفاؤل. وبسبب إنهم بيبقوا قادرين يسيطروا على نفسهم في المواقف الصعبة فالحذر بيخلي الشخص حياته متوازنة أكتر.. ده غير إن شكل العين ده بيجذب الناس له.

5- العيون المقلوبة سواء فوق أو تحت:

أشخاص مندفعة وطموحة، ومعظم الناس اللي حواليهم معتقدين إنهم منفتحين..وعندهم رغبة دايما في التحسين المستمر.. وبيميلوا إنهم يسمحوا لطموحهم يتحكم في سلوكهم. وبيكونوا أشخاص اعتمادية وكتومة.

6- العيون العميقة أو الجاحظة:

غالبا بيقوا أشخاص عندهم ميزات عاطفية وخصوصية أكتر، وبالرغم من إنهم شفافين إلا إنهم برضه عندهم حتة غموض كبيرة، وبيفضلوا يخبوا مشاعرهم الحقيقة ويشاركوها بس مع الناس القريبين منهم جدا وعينهم بتقول إنهم أشخاص طيبة وحنينة وغالبًا بيظهروا بشخصية منفتحة لكن عندهم طبيعة مثيرة للقلق.

7- العيون القريبة والواسعة:

الأشخاص اللي عينها قريبة دي بتبقى علامة على الشخص التقليدي والشخص اللي بيحس براحة في الوضع الحالي.. الأشخاص دي مابيبقوش حريصين على التغيير زي باقي الناس، وبيحبوا النظام جدا، وغالبا بيكون أشخاص بيحسوا بالأمان والراحة مع الطريقة حياتهم ماشية بيها، لكن الأشخاص اللي عينها واسعة عن بعض بيقدروا يتكيفوا مع أي وضع أسرع وماعندهمش نظام وصعب يلاقوا الرضا في الحياة والأشياء المجهولة عموما.