دليلك للمتاحف والمسارح المفتوحة مجانًا يوم 6 أكتوبر 

وزير الثقافة الدكتور أحمد فؤاد هنو قرر إن يوم الأحد 6 أكتوبر هيتم فتح كل المتاحف الفنية والقومية والمسارح والسيرك القومي مجانًا للجمهور وده بمناسبة الاحتفالات بذكرى النصر 

قرر الدكتور أحمد فؤاد هَنو وزير الثقافة، فتح جميع المتاحف الفنية والقومية والمسارح والسيرك القومي مجانًا أمام الجمهور، يوم الأحد 6 أكتوبر 2024، تزامنا مع احتفالات بذكرى النصر.

وبمناسبة الأماكن اللي مفتوحة مجانًا للجمهور تعالى نقولك لو عايز تستفاد بالقرار ده وتخرج شوية خروجات من غير ما تدفع فلوس كتير خصوصا إن الجو هيبقى حلو يومها.. تعالى نقولك شوية من الأماكن مفتوحة مجانًا للجمهور:

1- متحف محمود مختار: 

وده متحف موجود جوا حديقة الحرية اللي قدام دار الأوبرا المصرية في القاهرة وتم افتتاحه سنة 1962.. وفيه 175 عمل من أعمال محمود مختار وأدواته اللي كان بيستخدمها في النحت ووثائق وصور له وأهم جوايز وأوسمة عالمية حصل عليها.

2-  متحف طه حسين

وهو موجود في مبنى فيلا “رامتان” في الهرم في محطة مدكور وعاش فيها طه حسين من سنة 1955 لسنة 1973 وعاشت فيها بعده مراته لحد ما توفيت سنة 1989 وبعدها اتحول لمتحف لما اشترته وزارة الثقافة وبعدها في يوليو 1993 عيلة طه حسين قدمت لوزارة الثقافة  قلادة النيل الكبرى وأوسمة ونياشين وشهادات علمية وفخرية ومخطوطات نادرة حصل عليها عشان يبقوا في المتحف.

والمتحف فيه مكتبة طه حسين العربية واللي فيها أكتر من 3 آلاف كتاب.. وبعد افتتاح المتحف في 1997 اتعمل ملحق على جزء من حديقة الفيلا واسمه “مركز رامتان الثقافي” عشان يكون مركز ثقافي.

3- متحف أحمد شوقي:

وهو موجود في ميدان الجيزة بجوار كوبري الجامعة والمتحف عبارة عن دورين بيتكونوا من 11 أوضة.. وفيه حوالي 1153 قطعة آثرية منهم مقتنيات وآثاث ولوحات وتحف وصور ونياشيت ولابس أحمد شوقي نفسه وهدايا ووثائق اتقدمتله بمناسبة تتويجة بلقب أمير الشعراء

4- متحف المنصورة القومي:

المتحف موجود في شارع بورسعيد ميدان الموفي في المنصورة.. وبيتقسم لـ 3 أقسام وهما الجزء الأثري وبيشمل دار ابن لقمان وهي الدار الأثرية اللي أنشأها القاضي فخر الدين بن لقمان قاضى مصر واللي بتطل على النيل وأنشأها سنة 1218 ميلاديًا وتم أسر الملك لويس التاسع فيها

الجزء التاني هو الجزء الحديث: وهو عبارة عن صالة عرض حديثة فيها مقتنيات فنية من التماثيل واللوحات اللي بتعبر عن نضال أبناء المنصورة ضد الصليبيين وخرايط مجسمة بتوضح الموقع الجغرافي لمصر ومجموعة من الأسلحة البيضاء وخطابات من الملك الفرنسي للملك نجم الدين وفيه كمان تمثال للملك لويس التاسع وهو أسير والملكة شجرة الدر ولوحات زيت بتوضح المعركة البحرية وهروب الفرنسيين

والجزء التالت هو ملحق وفيه صالة لعروض الفن التشكيلي وفيه قاعتين للعروض الفنية المتغيرة

5- متحف بورسعيد:

المتحف موجود في شارع يوليو الغرب بور فؤاد.. وبيرجع تاريخ إنشاءه لسنة 1964 واتعمل تخليد لذكري مقاومة أهل بور سعيد للعدوان الثلاثي على المدينة وتم وافتتاحه في ذكري احتفالات محافظة بورسعيد بالعيد القومي لها يوم 23 ديسمبر 1964

المتحف علي مساحة 7000 متر وبيتكون من حديقة للعرض المتحفي المكشوف، والمبني الرئيسي للمتحف واللي بيشتمل كذا قاعة

6- متحف الفنون الجميلة:

وهو موجود في 6 شارع منشأ محرم بك في الاسكندرية ويعتبر من أهم العلامات الثقافية والفنية في إسكندرية.. واتبني سنة 1954 عشان يبقى المتحف الفني لإسكندرية.

أما بالنسبة للمسارح اللي ممكن تزورها في نفس اليوم برضه هم: 

1- البيت الفني للمسرح: في 27 شارع عبدالخالق ثروت

2-  المسرح القومي: في ميدان العتبة

3- المسرح الكوميدي/ المسرح العائم: في شارع عبدالعزيز آل سعود المنيل

4-  مسرح الطليعة: جوار محطة مترو الأنفاق في العتبة

5- مسرح القاهرة للعرائس: جوار محطة مترو الأنفاق في العتبة

6- مسرح القومي للطفل «متروبول»: في ميدان حليم أول شارع 26 يوليو

7- مسرح الغد: جوار مسرح البارون في العجوزة

8- مسرح الحديقة الدولية: في امتداد شارع عباس العقاد مدينة نصر

9- مسرح ميامي: في شارع طلعت حرب وسط البلد جوار سينما ميامي 

10- مسرح الميدان: داخل دار الأوبرا المصرية في الجزيرة

11- مسرح فرقة إسكندرية: مسرح بيرم التونسي في لورانس الشاطبي في إسكندرية

12- مسرح ليسيه الحرية: في شارع فاخر جوار كوبري الجامعة في إسكندرية

13- مسرح السلام بالإسكندرية: شارع مصطفى كامل

14- مسرح المنصورة: أول شارع العباسي أمام مديرية الأمن الجديدة