مميزات إنك تبدأ اليوم من غير تخطيط ولا To-Do List 

في الوقت اللي الناس على السوشيال ميديا بيفضلوا يقولوا إنهم بيبدأوا يومهم بتخطيط ونظام و(To-Do List) ناس كتير بتحس بضغط لما مابيعملوش كده مع إن الناس التانية دي ممكن بالعشوائية وإنهم بيشمروا ويشوفوا يومهم هيمشي إزاي مع أي خطط بيبقوا أكتر إنتاجية وإبداع لما يسيبوا يومهم يمشي بشكل عشوائي من غير ما يلتزموا بخطة ثابتة

وعلى عكس ما الناس ممكن تفتكر إن عشان كلمة عشوائية كلمة سلبية فأكيد كل اللي هيجي من وراها مش كويس لكن الحقيقة إن له مميزات كتير سواء من ناحية النفسية أو حتى العملية.. فتعالى نقولك شوية مميزات للعشوائية دي:

1- زيادة الإبداع:

لما تبدأ يومك من غير جدول ده بيفتحلك مساحة كبيرة للتفكير الحر والإبداع وعدم الالتزام بروتين معين بيخليك تستكشف أفكار جديدة أو تجيب حلول غير تقليدية.. الدراسات بتقول إن العشوائية أوقات بتخلي العقل أكتر استرخاء ومرونة، وده بيساعدك تكون شخص مبتكر أكتر وده حسب ما قال بحث اتنشر في Journal of Consumer Research إن التغييرات العشوائية في الروتين بتساعد على التفكير الإبداعي.

2- بتخليك مرن نفسيًا أكتر:

من غير التخطيط المسبق أنت مش بتحط على نفسك ضغط إنك تنجز حاجات معينة في وقت معين وده بيديك حرية إنك تتعامل مع اليوم بروح خفيفة ومن غير توتر.. فعدم وجود To-Do List ده بيخفف التوتر وبيخليك تحس إنك مرتاح نفسيا وده حسب ما قالت  دراسة اتنشرت في Journal of Occupational Health Psychology ولقت إن الناس اللي بيميلوا للتكيف مع الظروف بدل الالتزام بخطط صارمة بيكونوا أقل عرضة للإجهاد والتوتر.

3- التكيف مع الظروف المفاجئة:

العشوائية بتديك ميزة إنك تكون مرن وتقدر تتعامل مع أي حاجة تحصل فجأة يعني مثلًا لو حاجة طارئة ظهرت خلال يومك، مش هتحس إنك لازم تغير كل خططك عشان تواكبها وده ممكن يخليك أكتر تقبلًا للتحديات وبتتعامل معها بسرعة.

4- متعة اليوم:

فيه دراسة اتعملت في جامعة Stanford بتقول إن التغيير في الروتين بيساهم في تحسين الحالة المزاجية وزيادة الرضا عن الحياة.. وبداية اليوم بشكل عشوائي بتخلي اليوم أكتر متعة وحماس أنت مش عارف إيه اللي ممكن يحصل، وده بيخلي كل لحظة فرصة لاكتشاف جديد أو تجربة مختلفة فبيزود شعور السعادة والاكتفاء. 

5- بتخلصك من الالتزام الزيادة:

الـ To-Do List بتخليك أوقات تحس إنك مضغوط وبتديك إحساس إنك لازم تخلص كل حاجة في اليوم بس لما تبدأ يومك بشكل عشوائي، بتحس إن مفيش التزام بحاجة فعادي لو ما عملتش حاجة معينة مفيش مشكلة، وهنا بتحس بالاسترخاء والراحة النفسية.

في الأخر بالرغم من إن التخطيط والـ To-Do List والحاجات دي ليها مميزات كتير لكن بداية اليوم بشكل عشوائي ممكن تكون تجربة ممتعة ومليانة فوائد سواء على المستوى النفسي أو الإبداعي.. والعشوائية أوقات بتديك حرية ومرونة أكبر إنك تستمتع بيومك وتكتشف حاجات جديدة، فلو لقيت نفسك مضغوط من التخطيط الزيادة وجرب تبدأ يومك من غير خطة عادي وممكن تلاقي نفسك سعيد أكتر ومنتج أكتر.