7 أسباب ليه في ناس بتميل للشخصيات الشريرة الخيالية

من صغرنا بنميل للأشخاص الطيبة في الأفلام والمسلسلات زي ابيه حسام في مسلسل “الحقيقة والسراب” وبنكره الممثلين الأشرار ونخاف منهم حتى في الحقيقة رغم إنه مجرد تمثيل! وبنستنى دايمًا النهايات السعيدة اللي البطل بيقضي فيها على الأشرار.. بس لما بنكبر بنعرف إنها نهاية خيالية وإن الخير مش هو اللي بينتصر في الواقع فجايز ده بيغير تفكيرنا وإحنا كبار في اختيار الشخص اللي عايزين نشجعه أو نبقى في فريقه وبنختار المرة دي اختيار تاني خالص غير متوقع وهو الشخص الشرير  وبنبدأ نشجعه و نتعاطف معاه كمان.. عشان كده في الموضوع ده هنقولك ليه في ناس بتميل للشخصيات الخيالية الشريرة أكتر من غيرها مؤخرًا؟.. وفقًا لموقع brightside وموقع scienceconnected.



1-في بحث اتنشر في مجلة Psychological Science قال الباحثين فيه إن الأشرار الخياليين بيكونوا محبوبين لما بيبقى فيهم صفات مشتركة مع البشر العاديين فبينجذب الناس ليهم لأنهم بيحسوا إنهم شبههم على الرغم إننا بنقفل من الأشرار في الحقيقة لكن الخيال بيدينا مساحة من الأمان إنها مش حاجة واقعية وده بيخلينا مرتاحين شوية ومش بنحط أحكام على نفسنا لو اعجبنا بيهم.. وكمان بيكون عندنا فرصة نقارن نفسنا بيهم ماهو في مساحة للخيال الواسع بقى براحتنا!.. وبتقول كمان دكتورة “ريبيكا كراوس” “إن الأشخاص اللي بيشوفوا نفسهم صعب التعامل معاهم وفوضويين بيميلو إنهم ينجذبوا لشخصيات زي الجوكر مثلا لأنه بيمثل جزء من شخصيتهم مخفي.

2-الطيبين والشخصيات الكويسة في الأفلام بنلاحظ إنهم طيبين بزيادة على عكس الطبيعة البشرية اللي مليانة عيوب عشان كده الأشخاص بيميلو إنهم
يلاقوا حاجات تربطهم بصفات الأشرار الواقعية لإنها بالنسبالهم بتكون منطقية أكتر.

3-الشخصيات الشريرة في الأفلام والمسلسلات دلوقتي بتكون معقدة مش سطحية زي زمان وعندها أسباب غالبًا وصلتها لكده فبالتالي بيتم التعامل معاها على إنها شخصية اتظلمت بسبب المجتمع أو البيئة اللي نشأت فيها وده بيخلينا نحط نفسنا مكانهم شوية.


4-ده غير إن الأشرار بيكون عندهم جزء مأساوي أو زي مابيقولوا “dark side” وده في الأغلب اللي بيخلينا نتعاطف معاهم لأن كلنا عندنا مأسي مختلفة مرينا بيها شكلت شخصيتنا بأوجه مختلفة.

5-الشرير بياخد ACTION مش شخص سلبي.. بيسعي للإنتقام على عكس الإنسان العادي بيتقبل الحاجات اللي بتحصله وممكن مايحبش يستخدم العنف ويمكن ده سبب كمان يخلينا بنعجب بالشرير الخيالي لأنه بيقدر يعمل حاجة احنا كبشر عندنا قيم ومبادىء مانقدرش نعملها فبنشوف فيه نفسنا اللي نفسنا نكونها.

6-في النهايات على الأغلب بنشوف الخير انتقم من الشر لكننا مابنعرفش الشرير حصله إيه وده بيخلينا عندنا فضول أكبر تجاهه.. ده غير إننا كمان مابنقدرش نتنبأ باللي الشرير ممكن يعمله فده بيخلينا مترقبينه وعندنا حماس نعرف خطوته الجاية إيه؟

7-ده غير إننا بنحس أحسن تجاه نفسنا لما بنلاقي في حد شرير أكتر بكتير من أفعالنا الصغيرة اللي مابتعجبناش فبالتالي بيبقى بطلنا في كل حاجة وبيحسسنا إننا كويسين وإن الأمور ماوصلتش للدرجة دي معانا.

في سؤال جه على دماغك دلوقتي بس هل بقى لو احنا بنحب الأشرار في الأفلام هنحب الأشرار الحقيقيين وكده بقينا شريرين؟
الإجابة لا ماتقلقش..جربت الدراسة اللي اتنشرت في مجلة Psychological Science  إنها تشوف الناس اللي بيعجبوا بالشخصيات الخيالية ممكن ينجذبوا برضه لشخصيات واقعية زي القتلة المتسلسلين أو أي حد مؤذي حقيقي ولا لا؟

لكن كل المشاركين قالوا إنهم ماحسوش بالراحة إنهم يختاروا شخصية شريرة حقيقية تمثلهم زي الأبطال الخياليين..
فاتطمن الدنيا لسه فيها خير!