شخصيتك من الاكسسوارات اللي بتحبها أو بتلبسها
معظمنا بيحب الاكسسوارات وبيلبسها وهي مش بس حاجة بتعكس ذوقنا في الموضة أو ستايلنا.. هي كمان بتعبر عن شخصية اللي لابسها وأهم ميزة ليها إن هي بتحط لمسة كده مميزة بتكمل ستايلك في اللبس والشكل العام.. وفي الموضوع ده حبينا نوضحلك الاكسسوارات اللي بتلبسها بتقول إيه عن شخصيتك.
نبدأ بالساعات:
1- لو بتلبس ساعة كلاسيك فده دليل إنك بتهتم بالتفاصيل جامد وعندك دقة في المواعيد وبتحب البساطة
2- أما لو ساعة رياضية فأنت غالبًا نشيط وفريش بتحب الحركة والحرية.. والأهم إنك بتدور على الحاجة العملية ومش مهم الشكل أوي
3- بالنسبة للـ Smart Watch بقى بتقول إنك بتجمع بين حاجتين وهما حب التكنولوجيا والتواصل.. كمان بتقول إنك بتهتم بالمستجدات وشخص ديناميكي مليان حيوية وقوة ومقرمش من بره
من الساعات للأساور – Bracelets
1- لو بتلبسها بسيطة ورفيعة كده ده معناه إنك شخص هادي وأسلوب حياتك مريح وكمان مابتحبش التكلف.. يعني من الآخر مابترسمهاش وتعيش الدور وأنت من جوه فاااااضي
2- أما لو كبيرة بقى أو فيها زينة كتيييير فأنت بتحب التميز وعايز الأضواء كلها تبقى عليك وبتحب تلفت الأنظار.. وغالبًا أنت شخصية جريئة ومنفتح على التجربة ولما تيجي تحكي قصة حصلت لازم تمثلها وأنت بتحكي كده ماينفعش تحكيها وأنت قاعد هادي لأ
نخش في الخواتم
الأول لو بتلبس خواتم فأنت شخص دقيق وبتهتم بأصغر التفاصيل وعايز يبقى عندك نظام واضح.. لكن فيه حالتين:
الأولى
1- خواتم بسيطة خالص ودي بتدل على إنك شخصية هادية ومتحفظة وبتدي اهتمام كبير للتفاصيل
2- أما لو بتحب الزيطة في الخواتم بقى سواء يبقوا كتير أو مزخرفة وفيها نقوشات كتير فأنت عندك حس فني وبتحب التجديد ومحب للحياة ودي مش أكيدة أوي عشان لو فاقد الشغف ماتجيبش العيب علينا
التانية
لو مالكش أصلا في الخواتم والكلام ده.. هنا أنت مش عايز حاجة تعطلك وبرضه مش متكلف وواثق في نفسك حبتين يعني مش خاتم اللي هيميزك لأ أنت مميز من غير حاجة.. شخص عملي بس مستقل مابتحبش التقيد ولا الالتزامات وشكلك كده عايز تبقى سينجل!
بالنسبة للسلاسل
1- الناس اللي بتلبس سلسلة صغيرة وبسيطة غالبًا هتكون خجول حبتين وبتحب حضورك يكون هادي وبتميل للأناقة.. بس من غير مبالغة
2- السلاسل الكبيرة بقى دي بتقول إن شخصيتك اجتماعية ومش بس كده لأ جريئة كمان.. وفي الغالب بتبقى مؤثر على اللي حواليك
النظارات الشمسية
1- هنا النظارة الكلاسيكية العادية هتقول إنك بتدور على الأناقة بس من غير مجازفات لأنك برضه بتدور على الراحة معاها
2- لو نظارتك تصميمها جريء ومميز كده فأنت مابتخافش من كسر القواعد وقلبك ميت حبتين
ولو بتلبس نظارة عامة فأنت شخص غامضضض!
الحلقان
وبما إن الحلقان زيها زي الخواتم فهنقول لو بتلبس حلقان شخصيتك تبقى إيه ولو مابتلبسش تبقى إيه:
1- لو بتلبس حلقان فغالبًا أنت شخص اجتماعي وبتحب الناس تكون حواليك أغلب الوقت وكمان بتعرف تمشي حياتك إزاي سواء العملية أو الشخصية
- البسيطة طبعًا هتدل على الهدوء والكلاسيكية والدقة
- المشخللة والكبيرة دي أو المزخرفة فأنت بتحب الحياة وبتحب التجديد وعندك حس فني
2- لو مابتلبسش.. فأنت شوية بتحب الخصوصية وتبعد عن الأنظار وكمان حساس لأن وجود الحلقان نفسه بيبقى رخم بالنسبالك فا ما بالك بالبني آدمين!
الأحزمة
1- لو بتلبس حزام بسيط كده وهادي فأنت بتحب كل حاجة تبقى في مكانها الصح ويهمك الجودة وشخصية عملية
2- لو حزام فيه زينة كده أو لونه مختلف وزاهي فأنت بتحب الانطلاق ومالكش في التقليدي.. عاشق للاختلاف
3- لو مالكش في الأحزمة خالص فأنت شخص متحرر ومش عايز حاجة تحسسك بالربطة كده وشخص مريح وبسيط
وأخيرًا الشنط
ودي لو حابب تعرف عنها بالتفصيل ممكن تقرأ موضوعنا ده “شخصيتك من نوع شنطتك”
في النهاية الاكسسوارات هي مش مجرد زينة بس هي حاجة ممكن تعبر عن حالتنا المزاجية في الوقت اللي لابسينها فيه وحتى لو مش لابسين بتعبر برضه عن حالتنا.. فأنت محتاج كل مرة بتختار فيها اكسسوار معين تشوفه هو فعلًا بيعكس اللي جواك لأن ممكن توصل بيه رسالة صامتة كده للناس اللي حواليك أو تقول حاجة عنك من غير ماتتكلم!
لو وصلت لحد هنا فأنت كده كده شخصية محترمة وبنحبها.. قولنا بقى أنت أنهي شخصية من دول وبتحب اكسسوارات إيه من اللي قولناها؟
