ترتبط بالـ best friend ولا لأ
“ياجماعة أنا ارتبطت/ اتجوزت الـ best friend”
“أنا مستحيل ارتبط بـ الـ best friend بتاعي”
الفترة دي بنسمع كتير جمل شبه دي من الناس اللي حوالينا وكأن الـ bestfriend بقى أساس أي علاقة ومش هاتنجح إلا لو ارتبطت بيه.. بس الفكرة بقى زي ما الارتباط بالشخص القريب منك له مميزات هل له كمان عيوب ولا إيه؟.. عشان كده في الموضوع ده هنقولك عيوب ومميزات إتك تدخل في علاقة مع الـ bestie بتاعك/بتاعتك وفقا لموقع betterhelp و موقع regain.
بص ياسيدي/ستي ورقة وقلم واكتبي ورايا المميزات والعيوب زي ما
بيقولها الخبراء في العلاقات عشان تعرف تاخد القرار الصح…
المميزات هي:
-في حاجات كتير هتكون أسهل وسلسة أكتر لو ارتبطت بالـ best friend زي إنكوا هتكونوا عديتوا فترة الاستهبال والاستعباط وفاهمين بعض كويس أوي فده هيوفر وقت كبير عليكوا من المعاناة في محاولة معرفة خالتو اسمها إيه وأكلته المفضلة
والمشروب اللي بتعشقيه في الصيف وكل الكلام الجميل ده.
-الشعور بالراحة والأمان اللي بتحس به مع شخص عارفه هيسهل عليك التوقعات المستقبلية لأنك هتبقى already عارفه واتعاملت معاه فمش هتفضل تنسج
حاجات خيالية عنه من دماغك أو تتوقع حاجة مش هيعملها.
-التوافق.. معنى إنكوا قدرتوا تبقوا صحاب قريبين إنكوا متوافقين لحد كبير ومتفاهمين حتى لو شخصياتكوا مختلفة وده مؤشر حلو.
-الأصدقاء المشتركين مابينكوا ودول هيكونوا كتير أوي سواء من طرفك أو طرفه لإنكوا غالبًا نفس الدايرة مانتوا صحاب بقى من الأول!.. بس ياترى ده مش هيحسسك بالملل بعدين؟
طيب إيه بقى سلبيات إنك تدخل في علاقة مع الـ best friend؟
تصدق إن الإيجابيات هي نفسها السلبيات!..
هقولك إزاي يعني مثلاً:
-لو انتوا فاهمين بعض كويس وعارفين تاريخ بعض إنت والـ best ده مش معناه خالص خالص إنكوا ممكن تتأقلموا أحسن في علاقة رومانسية.. لإنك غالبًا هتبقى عارف العلاقات اللي دخلها وتاريخه الأسود قبلك فده ممكن يأثر على تعاملاتكوا مع بعض بعدين وتبدأ تشك بعد كده.
-التفاهم اللي بينكوا هيخلي العلاقة تمشي أسرع من العادي وده جايز يحسسك بالقلق والتوتر لأنك مامرتش على كل مرحلة بهدوء المفروض تمر بيها.
-بما إنكوا نفس دايرة الصحاب غالبًا هتحس إنك محتاج صاحب جديد عشان تقدر تتكلم معاه عن شريكك في الحياة اللي مابقاش ينفع تتكلم معاه عن كل مشاعرك لاتجرحه.
-وآخر حاجة تخلي بالك منها هي المخاطرة: لإنك لو ارتبطت بس خسرت العلاقة دي يبقى هتخسر مرتين مرة كصديق ومرة كحبيب ومش هتعرف تصلح أي علاقة منهم تاني!
بس خلي بالك في شوية حاجات لازم تسألها لنفسك وللشخص قبل ماتبدأوا العلاقة عشان تبقوا على نور والحاجات دي هي:
-هل فعًلا انتوا الاتنين عايزين نفس الحاجات ولا ده مجرد حماس شباب وهيروح؟
عشان لو حماس شباب وقتي فالأفضل تحافظ على صداقتك وماتدمرهاش بالتسرع
-هل ده الشخص اللي أنت عايزه ولا بس خايف ماتلاقيش حد مناسب أكتر منه؟
عشان لو السبب هو الخوف مش هيبقى الخيار المناسب إنك تختار صديقك
-هل مدرك إن طبيعة العلاقة كلها هتتغير وياترى هتتعامل إزاي مع التغيرات اللي هتحصل دي؟
وده سؤال أنت اللي تجاوبه بنفسك إنت وشريك حياتك و بالمناسبة ماينفعش حد
يغششك لازم يطلع إجابته من جوالك عشان تعرف تجاوب ترتبط بالـ best friend ولا لأ؟
وافتكر إن أيًا كانت الإجابة تاخد الموضوع بهدوء وعقل عشان ماتضيعش من إيدك علاقة مهمة ويستحسن تاخد وقت تفكر في كل الجوانب وتتأكد إن الطرف التاني عنده نفس المشاعر.. ده لمصلحتك إنت!.
