إزاي تقنع شخص بحاجة مهما كان معترض عليها؟
أكيد من وإحنا صغيرين بنحاول طول الوقت نقنع اللي حوالينا بأي حاجة إحنا عايزينها من أول ما بنبقى عايزين بابا وماما يجيبولنا حاجة نفسنا فيها واتعلمنا إن العياط والزن مش هو اللي هيأثر فيهم لحد ما بقينا نحاول نقنع اللي حوالينا في الشغل بوجهات نظرنا وبقينا نقنع شريكنا بوجهات نظرنا في أفعالنا ومنطقنا في الحياة أو حتى بنحاول نقنع صحابنا بخروجة عايزين نخرجها
ويمكن فيه مواقف وحاجات أكتر بتستعدي إن الشخص يبقى عنده مهارات عشان يقنع الطرف التاني باللي عايز يعمله واه ساعات لازم يتستلم إن اللي قدامه مش هيقتنع وإنه عنيد أو إن الدنيا كلها مش هتمشي على هواه.. بس مفيش مانع يعمل محاولات اقناع وعموما الاقناع مش مهمة صعبة زي ما بتبان وأنت بتعملها بطريقة عشوائية هي طريقة ليها شوية أساليب وخطوات بسيطة.. فلو عايز تقنع أي حد بحاجة تعالي نقولك شوية حاجات تعملها تسهل عليك الاقناع حسب ما قال موقع “MindTools” وموقع “Psychology Today” في مقالاتهم:
1- افهم وجهة نظره كويس:
لو عايز تقنع حد بحاجة فلازم تفهم هو ليه شايف الحاجة دي من زاويته، واسأله أسئلة مفتوحة وخلّيه يشرح وجهة نظره وركز كويس عشان تعرف كل التفاصيل اللي بيفكر فيها.. لإن ده هيساعدك تعرف إيه اللي ممكن يأثر فيه لما تتكلم معاه وتحدد النقط اللي ممكن تبني عليها حوارك.
2- اتكلم بلغة سهلة ومفهومة:
لو بدأت كلامك بكلام صعب أو مصطلحات معقدة غالبًا مش هتوصل له، وهيزهق من أول دقيقة.. فركز إنك تتكلم بأسلوب بسيط وبلغة الشخص اللي قدامك، ده هيساعده يفهمك بسهولة ويشعر إنك قريب من تفكيره.
3- ادعمه بأمثلة وحقايق:
واحدة من أهم الحاجات اللي بتساعد الناس يقتنعوا بفكرة معينة هي الأدلة والحقايق جيب أمثلة حقيقية أو اذكر أبحاث تدعم وجهة نظرك وده هيخلي الشخص اللي قدامك يفكر في الموضوع بجد لإن الأمثلة بتيجي على الجرح وبتخليه يشوف الفكرة كأنها حصلت قدامه.
4- استخدم أسلوب المقارنة:
لو الموضوع اللي عايز تقنعه بيه له بدائل أو خيارات تانية قارنهم بطريقة ذكية. مثلًا لو بتحاول تقنعه يختار حاجة معينة بدل تانية، وضح له الفروق بين الاختيارات وإيه اللي هيكسبه أو يخسره لو اختار غير اللي انت بتعرضه.
5- اختار الوقت الصح:
كتير من الناس بيفتكروا إنهم يقدروا يقنعوا أي حد في أي وقت،وده مش حقيقي، فحاول تتكلم لما تحس إن الشخص اللي قدامك عنده استعداد يسمعك مش وهو مشغول أو مضايق.
6- خليك صبور:
مش دايمًا الناس بتتغير آراءها بسهولة، خصوصًا لو الفكرة دي عندهم بقالها فترة فخليك صبور وممكن ترجع تتكلم معاه في الموضوع أكتر من مرة لحد ما يحس إنه عايز يشوف وجهة نظرك.
في الآخر خلينا نقولك إنك لو كنت هادي ومهتم تسمع وتوصل وجهة نظرك بطريقة منظمة، هتلاقي إنك قادر تقنع الشخص اللي قدامك بسهولة أكبر.. والفكرة إنك تبني جسر بين وجهة نظرك ووجهة نظره، وده اللي هيخليه يشوف الأمور بعيونك.
