12 سؤال المفروض تبقى عارف إجاباتهم عن الشخص اللي انت مرتبط بيه
ممكن تبقى فاكر إنك عارف كل حاجة عن شريك حياتك.. واللي هو “ده الشخص اللي أنا مرتبط بيه أكيد عارف كل حاجة عنه”.. لكن عمرك فكرت تختبر معرفتك دي واصلة لفين أو قد إيه؟ وعارف الشخص اللي إنت بتحبه فعلا أو شريك حياتك.. ولا بتقنع نفسك إنك عارفه؟
وكل ما الوقت بيعدي، ناس كتير بتكتشف إنهم دخلوا في علاقة مع حد من غير ما يعرفوا فعلاً عن رغباته واحتياجاته أو أقرب الناس ليه أو نظرته للمستقبل ومشاعره.. وحاجات تانية كتير
أكيد مش مطلوب منك تعرف كل تفاصيل حياة اللي معاك لكن المفروض يعني أقل حاجة يكون عندك خلفية واضحة عن هو عايز إيه ومحتاج إيه وتجاربه في الحياة عاملة إزاي.
وحسب خبير واستشاري العلاقات Jeff Guenther فيه 12 سؤال متقسمين على 3 أقسام المفروض تبقى عارف إجاباتهم لو عدى “سنة واحدة” على علاقتك بالشخص اللي معاك.. وبما معناه يعني إن لو لسه بتتعرف على حاجات جديدة عن شريك حياتك بعد سنة من ارتباطكوا أو علاقتكوا ببعض فده ممكن يكون Red Flag.. يعني بصراحة إيه اللي كنتوا بتعملوه خلال السنة اللي قضيتوها مع بعض لو ما كنتوش بتتعرفوا على بعض أكتر؟
ولو أكتر من سنة كمان وبقالكوا سنين مثلا ومش عارفين إجابات الأسئلة الجاية دي.. فـ يادي المصيبة!
أول قسم: الرغبات والاحتياجات
1- إيه الحاجة في علاقتكوا ببعض اللي بتضايقه جدًا ومش قادر يعديها أو يتجاوزها أو يكبر دماغه منها؟
2- لما يكون محتاج دعم، إيه أكتر حاجة بتفيده وتدعمه؟ حضن؟ إنك تسمعه؟ تساعده؟ ولا حاجة تانية؟
3- إيه أكلته المفضلة اللي بيعتبرها مصدر راحة أو Comfort Zone؟
4- إيه التصرفات أو اللزمات أو الجُمل اللي أخدها منك وبيستخدمها دايمًا؟
تاني قسم: الأقرب والأعز
5- إيه إحساسه بشكل عام ناحية كل فرد من عيلته القريبة؟ اللي هم الدرجة الأولى.
6- مين أكتر صاحب قريب ليه؟ وليه الشخص ده بالذات؟
7- إيه أكبر حاجة بتسببله خوف أو عدم أمان؟ وإزاي الحاجة دي بتأثر على حياته؟
8- إيه طريقته المفضلة لو عايز يهرب من ضغط يوم صعب؟
تالت قسم: المستقبل والمشاعر
9- إيه رأيه في حياته المهنية أو مسار حياته دلوقتي؟ هل هو أو هي راضيين، محتارين، ولا بيدوروا على تغيير؟
10- إيه الحاجة اللي بيحبها فيك في السر لكن مستحيل يعترف بيها؟
11- إيه الخط الأحمر اللي مستحيل يوافق إن أي حد يتجاوزه؟ وليه الحاجة دي مهمة بالشكل ده؟
12- إيه الموضوع اللي لو بدأ فيه ممكن يفضل يتكلم عنه أكتر من 15 دقيقة؟
دلوقتي تقدر تتحرك وتروح للشخص اللي إنت مرتبط بيه وتختبروا بعض في الأسئلة.. أهو عارفين الإجابات صح برافو عليكوا إنتوا الاتنين.. ولو مش عارفين فـ جت فرصتكوا أهو عشان تعرفوها.
