ليه أول سنة جواز بتبقى مليانة مشاكل.. وإزاي تعديها؟

كل الناس بتدخل الجواز وهي عندها أحلام وتوقعات وردية خصوصا بعد ما لعالم بقى فيه ريلز وفيديوهات تيك توك بيعلوا “اكسبكتيشنز” الشخص بس لما يبدأوا الحياة مع بعض، بيكتشفوا إنها مش وردية زي الأفلام والريلز وفيديوهات انستجرام وتيك توك.. ومهما كانوا الأشخاص مرتبطين أو بيحبوا بعض بقالهم سنين فأول سنة خصوصا في الجواز 

 أول سنة جواز تعتبر أكتر مرحلة متعبة في أي علاقة.. الاتنين بيبدأوا يتأقلموا على حياة جديدة ومليانة تحديات والعيشه مع أي حد حتى لو كان صاحب عمرك بتبقى مش سهلة.. 

فلو أنت داخل على جواز أو لسه متجوز جديد تعالى نقولك ليه ده بيحصل وإزاي ممكن تعدي المرحلة دي بكل هدوء وسلام حسب ما قال موقع “Psychology Today” وموقع “Brides” وموقع “Marriage”:

في الأول تعالى نفهم الأسباب الأساسية للمشاكل في أول سنة جواز:

1- الاختلاف في الطباع والعادات:

كل واحد اتربى في بيت وله عادات معينة وتفاصيل حياة معينة اتعود عليها وعاش جزء كبير من حياتها عليها.. فلما ييجوا يعيشوا مع بعض بيبدأوا يكتشفوا إنهم مختلفين في تفاصيل بسيطة زي مثلا ترتيب البيت، أو طريقة الأكل، أو مواعيد النوم والصحيان.. ومهما شوفنا الأمور دي بسيطة أو كبيرة فالحاجات دي ممكن تسبب توتر لو مافيش تفاهم ومرونة فعلا.

2- التوقعات العالية:

ناس كتير بتدخل الجواز بتوقعات مش واقعية زي إن الحياة كلها رومانسية وهدايا وخروجات واحتفالات، بس الواقع مختلف الجواز فيه مسئوليات وشغل وضغط، ولو الطرفين ماكانوش مستعدين للواقع ده المشاكل بتزيد.

3- المسئوليات المالية:

الشراكة في المصاريف والفواتير بتمثل تحدي كبير، خاصة لو فيه فرق في طريقة إدارة الفلوس بين الزوجين. لو كل واحد مش واضح من البداية بخصوص دوره المالي، ده ممكن يعمل خلافات كبيرة.

4- قلة التواصل:

ناس كتير بتبقى فاكرة إن شريكها هيعرف كل حاجة عنها من نظرة عينها ومن غير كلام، بس أكيد ده مش حقيقي فلو مافيش كلام صريح ومباشر عن المشاكل اليومية حتى اللي بيعدوا بيها زي أنت ماطلعتش كيس الزبالة برا ليه وماجبتش عيش معاك امبارح ليه كان المفروض تعرف لوحدك.. المشاكل الصغيرة ممكن تكبر.

5- التدخلات الخارجية:

بنشوف ناس كتير بتبقى مش عارفة إزاي تحل مشاكلها فبيلجأوا للحل الأسهل وإنهم يكلموا أهلهم وصحابهم يشتكوا لهم ويدخلوهم عشان يساعدوهم في حل المشاكل الجديدة اللي أول مرة بيتعرضولها دي.. فاللي بيحصل إن التدخل ده بيكون سبب رئيسي للمشاكل في أوقات.. ولو عديت بالتجربة دي هتعرف إن كل واحد من الطرفين لازم يحدد حدوده مع أهله من البداية.

6- الغيرة وانعدام الثقة:

كده كده الشك والغيرة والثقة القليلة بتعمل مشاكل بين أي اتنين متصاحبين.. فتخيل بقى مع اتنين قاعدين وعايشين مع بعض في نفس البيت.. وأكيد أنت عارف لوحدك من فترة الخطوبة إن الثقة المتبادلة هي أساس أي علاقة ناجحة.

طيب نيجي بقى للجزء التاني والأهم هو لو إنك اتعرضت للمشاكل دي فعلا إزاي تحلها وإزاي لو وجهتك نوعية مشاكل أول سنة جواز دي تعديها.. فتعالى نقولك شوية نصايح عشان تزوق أول سنة أو سنتين دول:

1- التفاهم والصبر:

أول حاجة أنتوا أكيد طالما عديتوا بفترة الخطوبة هيبقى فيه بيتكوا تفاهم بس اللي محتاجة في الفترة دي هو الصبر.. ولازم تكونوا عارفين إن التكيف مع حياة جديدة بياخد وقت، فماتستعجلوش على النتائج واصبروا على بعض.

2- التواصل الواضح:

اتكلموا عن كل حاجة، حتى لو صغيرة.. لو حاجة مضايقاك قولها براحة في الأول وبطريقة ماتجرحش الطرف التاني.

3- قسموا المسئوليات:

ماينفعش واحد يشيل كل حاجة لوحده والتاني يقعد يتفرج عليه، لازم تتفقوا على تقسيم الحاجات اللي وراكوا سواء في البيت والترويق وغسيل المواعين والنضافة أو المسؤوليات المادية والحاجات دي الاتفاق عليها بيظهر ويوضح أكتر مع كل موقف بتعدوا بيه فزي ما قولنا في الأول الصبر والاتفاق.

4- المرونة:

حياة المتجوزين أو المرتبطين عموما في أي نوع علاقة بجد بتحتاج شوية تنازلات من الطرفين.. فمش كل حاجة هتمشي زي ما كنت متعود أو بتحب ومش كل حاجة هتمشي على مزاجك أنت بس فيه طرف تاني في حياتك بشكل مهم جدا دلوقتي.

5- الاهتمام والتقدير:

في وسط زحمة المسؤوليات والتعود والحياة الجديدة دي.. ما تنسوش تعبروا عن حبكم لبعض عادي حتى لو بشوية حاجات بسيطة زي كلمة حلوة، مفاجأة، أو حتى اهتمام يومي من نوعية إنك تبعت لشريكك رسالة تسأله عملت إيه النهاردة في الشغل.. الحاجات دي بتعمل فرق كبير.

6- اتعلم من غلطاتك:

لما يحصل خلاف ماترجعوش لنفس الغلط تاني.. واتعلموا تتجنبوا الحاجات اللي بتعمل مشاكل، واعرف إن دي ميزة المشكلة أو الغلطة اللي حصلت وهي إنها ماتتكررش تاني.

7- حطوا حدود مع الأهل:

حددوا من الأول حدود تدخل الأهل في حياتكم.. وكل طرف بيبقى مسئول عن حماية خصوصية العلاقة دي.

ولو المشاكل زادت ومقدرتوش تحلوها مش عيب تروحوا لمتخصص يساعدكم في حلها.. وخليكوا فاكرين بس إن في الأول والأخر الجواز عبارة عن شراكة، وكل واحد فيكم مسؤول عن نجاح العلاقة في شكلها الجديد ده.. وإن المشاكل حاجة طبيعية بس المهم هو إزاي تعرفوا تتكلموا وتحلوها مع بعض.